ປະຊາຊົນຊີເຣຍຫລາຍໝື່ນຄົນພາກັນໂຮມຊຸມນຸນຕໍ່ຕ້ານລັດຖະບານ ໃນຂະນະທີ່ກໍາລັງຮັກສາຄວາມປອດໄພຂອງລັດຖະບານຂະຫຍາບການປາບປາມພວກປະທ້ວງລັດຖະບານອອກອີກນັ້ນ.
ພວກທີ່ເຫັນເຫດການແລະພວກນັກເຄື່ອນໄຫວກ່າວວ່າ ຢ່າງໜ້ອຍປະຊາຊົນ 15 ຄົນເສຍຊີວິດໃນວັນສຸກວານນີ້ ຫລັງຈາກພວກກໍາລັງຮັກສາຄວາມປອດໄພໃຊ້ລູກປືນແທ້ຍິງໃສ່ພວກປະທ້ວງນັ້ນ ຊຶ່ງເຂົາເຈົ້າເວົ້າວ່າ ພວກທີ່ເສຍຊີວິດເຫລົ່ານີ້ສ່ວນຫລາຍແມ່ນມີຂຶ້ນຢູ່ໃນເຂດອ້ອມແອ້ມກຸງ Damascus ນັ້ນ.
ພວກປະທ້ວງຕໍ່ຕ້ານລັດຖະບານຍັງໄດ້ພາກັນໂຮມຊຸມປະທ້ວງຢູ່ໃນຫົວເມືອງຕ່າງໆເຊ່ນກັນ ຮວມທັງເມືອງ Homs, Dara’s, Deir al-Zour ແລະເມືອງ Quamishli. ການປະທ້ວງເຫລົ່ານີ້ມີຂຶ້ນໃນວັນສຸກທໍາອິດແຫ່ງເດືອນຖືສີນຫລື Ramadan ຂອງຊາວມຸສລິມນັ້ນ.
ໃນຂະນະດຽວກັນ ລາຍລະອຽດຕ່າງໆກໍາລັງມີຂຶ້ນກ່ຽວກັບສະຖານະການໃນເມືອງ ຮາມາ ຊຶ່ງເປັນເມືອງທີ່ທະຫານປິດລ້ອມມາຕັ້ງແຕ່ວັນອາທິດແລ້ວນີ້. ນັກເຄື່ອນໄຫວດ້ານການເມືອງຄົນນຶ່ງໃນເມືອງຮາມາ ກ່າວກັບວີໂອເອ ພະແນກພາສາເປີເຊຍໃນວັນສຸກວານນີ້ວ່າ ກໍາລັງຂອງຝ່າຍລັດຖະບານໄດ້ທໍາການຈັບກຸມແລະເຂັ່ນຂ້າປະຊາຊົນມາຢ່າງບໍ່ເລືອກໜ້າໃນຂະນະທີ່ພວກກໍາລັງເຫລົ່ານີ້ບຸກລຸກເຂົ້າໄປໃນບ້ານເຮືອນຂອງພວກນັກເຄື່ອນໄຫວນັ້ນ. ແຕ່ນັກເຄື່ອນໄຫວດ້ານການເມືອງຄົນນີ້ເວົ້າວ່າ ພວກປະທ້ວງຕໍ່ຕ້ານລັດຖະບານໄດ້ໂຮມຊຸມນຸມກັນຢູ່ຕໍ່ມາໃນວັນສຸກວານນີ້ເຖິງແມ່ນລັດຖະບານທໍາການປາບປາມກໍຕາມ.
ລາຍງານສື່ມວນຊົນແຫ່ງລັດ ກ່າວວ່າ ລັດຖະບານກໍາລັງດໍາເນີນງານເພື່ອສ້າງຕັ້ງພວາມສະຫງົບຄືນໃນເມືອງ Homs ນັ້ນຫລັງຈາກພວກກຸ່ມກໍ່ການຮ້າຍປະກອບອາວຸດຈຸນຶ່ງທໍາການເຄື່ອນໄຫວຕ່າງໆທີ່ຮວມທັງການສັງຫານແລະບ່ອນທໍາລາຍຂຶ້ນນັ້ນ.
ລັດຖະບານໄດ້ຖິ້ມໂທດການກໍ່ຄວາມຮຸນແຮງຂຶ້ນນີ້ສ່ວນຫລາຍໃນຊີເຣຍໃສ່ອັນທີ່ເອີ້ນວ່າ ພວກກໍ່ການຮ້າຍແລະແລະນັກຕໍ່ສູ້ຫົວຮຸນແຮງນັ້ນ. ອົງການຂ່າວ SANa ທີ່ລັດຖະບານຄວບຄຸມກ່າວໃນວັນສຸກວານນີ້ວ່າ ພວກມືປືນຈຸນຶ່ງທີ່ບໍ່ຊາບຊື່ວ່າແມ່ນຜູ້ໃດຫລືກຸ່ມໃດໄດ້ດັກສະກັດໂຈມຕີໜ່ວຍລາດຕາເວນຂອງລັດຖະບານຈຸນຶ່ງຢູ່ໃກ້ໆກັບເມືອງ Maarat al-Numan ຊຶ່ງໄດ້ເຮັດໃຫ້ພວກເຈົ້າໜ້າທີ່ເສຍຊີວິດໄປ 2 ຄົນ.
