ພວກນັກເຄື່ອນໄຫວດ້ານສິດທິມະນຸດຊີເຣຍກ່າວວ່າ ພວກກໍາລັງຮັກສາຄວາມປອດ
ໄພຂອງລັດຖະບານ ໄດ້ເຂັ່ນຂ້າປະຊາຊົນ 2 ຄົນ ຫລັງຈາກບຸກຖະລົ່ມເຂົ້າໄປໃນເມືອງ
Homs ໃນການສືບຕໍ່ປາບປາມພວກຄັດຄ້ານລັດຖະບານນັ້ນ.
ການບຸກໂຈມຕີດັ່ງກ່າວມີຂຶ້ນໃນຂະນະທີ່ຫົວໜ້າຄະນະກໍາມາທິການສະພາກາແດງສາກົນ ກໍານົດຈະທໍາການພົບປະກັບປະທານາທິບໍດີ Bashar al-Assad. ທ່ານ Jacob Kellenberger ຫົວໜ້າຄະນະກໍາມາທິການສະພາກາແດງສາກົນ ຫລື ICRC ໄດ້ພົບປະກັບທ່ານ Walid al-Moallem ລັດຖະມົນຕີການຕ່າງປະເທດຊີເຣຍທີ່ນະຄອນຫລວງດາມັສກັສ ໃນວັນອາທິດວານນີ້ ເພື່ອຊຸກຍູ້ໃຫ້ມີການສະໜອງການຮັກສາພະຍາບານແກ່ພວກທີ່ໄດ້ຮັບບາດເຈັບ ແລະເຂົ້າຫາພວກທີ່ລັດຖະບານຈັບກຸມໄວ້ນັ້ນ.
ບັນດາກຸ່ມປົກປ້ອງສິດທິມະນຸດກ່າວວ່າ ພວກກໍາລັງຮັກສາຄວາມປອດໄພໄດ້ສັງຫານພວກພົນລະເຮືອນຢ່າງໜ້ອຍ 12 ຄົນໃນວັນອາທິດວານນີ້ ໃນລະຫວ່າງການບຸກເຂົ້າກວດຄົ້ນບ້ານເຮືອນຂອງປະຊາຊົນໃນພວກຫົວເມືອງທາງພາກຕາເວັນຕົກສຽງເໜືອທ່ີປະສົບກັບຄວາມວຸ້ນວາຍນັ້ນ ຮວມທັງປະຊາຊົນ 8 ຄົນໃນແຂວງ Idlib ແລະອີກ 4 ຄົນໃນຂົງເຂດພາກກາງ ໃກ້ໆກັບເມືອງ Hama ນັ້ນ.
ໃນວັນອາທິດວານນີ້ເຊ່ນກັນ ອົງການຂ່າວ SANA ຂອງທາງການຊີເຣຍ ລາຍງານວ່າ ພວກກຸ່ມກໍ່ການຮ້າຍປະກອບອາວຸດຈໍານວນນຶ່ງໄດ້ດັກສະກັດໂຈມຕີລົດບັສຄັນນຶ່ງໃນພາກກາງຂອງຊີເຣຍ ເຮັດໃຫ້ທະຫານ 6 ຄົນແລະພົນລະເຮືອນ 3 ຄົນເສຍຊີວິດ.