ບັນດາລັດຖະມົນຕີຕ່າງປະເທດແຫ່ງສັນນິບາດຊາດອາຫຣັບ ໄດ້ຮັບຮອງເອົາມາດຕະການ
ລົງໂທດຕໍ່ຊີເຣຍຢ່າງບໍ່ເຄີຍເຮັດມາກ່ອນ ໃນວັນອາທິດວານນີ້ ລຸນຫລັງທີ່ລັດຖະບານກຸງ
ດາມັສກັສ ບໍ່ຍອມຮັບເອົາແຜນການຂອງສັນນິບາດທີ່ຈະ ສົ່ງພວກນັກກວດກາ ໄປຕິດຕາມ
ເບິ່ງການກວາດລ້າງຂອງລັດຖະບານຊີເຣຍ ຕໍ່ການລຸກຮືຂຶ້ນຂອງພວກປະທ້ວງຝ່າຍຄ້ານນັ້ນ.
ລຸນຫລັງກອງປະຊຸມທີ່ນະຄອນຫລວງໄຄໂຣ ປະເທດອີຈິບ ລັດຖະມົນຕີກະ ຊວງການຕ່າງປະເທດຂອງປະເທດ ກາຕາຣ ທ່ານ ຫາມາດ ບິນ ຈັສຊິມ ແຈບເບີ ອາລ-ທານີ ເວົ້າວ່າ 19 ປະເທດໃນຈໍານວນ 22 ປະເທດສະມາຊິກຂອງສັນນິບາດຊາດອາຫຣັບ ໄດ້ລົງຄະແນນສຽງເຫັນດີໃຫ້ທໍາການລົງໂທດດັ່ງກ່າວ. ອີຣັກ ແລະເລບານອນ ບໍ່ໄດ້ອອກສຽງ. ທ່ານ ຈັສຊິມ ແຈບເບີ ອາລ-ທານີ ຍັງໄດ້ກ່າວເພີ້ມອີກວ່າ ການລົງຄະແນນສຽງນີ້ ຈະມີຜົນກະທົບ ດັ່ງທີ່ໄດ້ຫວັງໄວ້ ເຖິງແມ່ນວ່າ ອາດຈະບໍ່ໄດ້ຖືກນໍາມາໃຊ້ກໍຕາມ ຕາບໃດທີ່ ຊີເຣຍຕົກລົງທີ່ຈະເຊົາປາບປາມພວກພົນລະເຮືອນ.
ມາດຕະການລົງໂທດລວມມີ ການກັກຊັບສິນຂອງບັນດາຜູ້ນໍາຊີເຣຍ ທີ່ມີຢູ່ໃນບັນດາປະເທດອາຫຣັບ, ໂຈະການຮ່ວມມືກັບທະນາຄານກາງຂອງຊີເຣຍ, ຫ້າມພວກເຈົ້າໜ້າທີ່ຂັ້ນສູງຂອງຊີເຣຍ ບໍ່ໃຫ້ໄປຢ້ຽມຢາມພວກປະເທດສະມາ ຊິກສັນນິບາດ ແລະບໍ່ໃຫ້ປະເທດສະມາຊິກສັນນິບາດໄປລົງທຶນ ແລະທໍາການຄ້າຂາຍກັບກຸງດາມັສກັສ.
ຫົວໜ້າສັນນິບາດຊາດອາຫຣັບ ທ່ານນາບິນ ອາລ-ອາຣັບບີ ເວົ້າວ່າ ຈະມີ ການໃຊ້ຄວາມລະມັດລະວັງເປັນພິເສດ ເພື່ອໃຫ້ແນ່ໃຈວ່າ ການລົງໂທດທາງເສດຖະກິດດັ່ງກ່າວ ຈະບໍ່ສ້າງຄວາມເດືອດຮ້ອນໃຫ້ແກ່ພົນລະເມືອງຊີເຣຍ ຫລື ບັນດາປະເທດອ້ອມຂ້າງຊີເຣຍນັ້ນ.
ບັນດາລັດຖະມົນຕີຕ່າງປະເທດດັ່ງກ່າວ ຍັງໄດ້ເຫັນພ້ອມນໍາກັນວ່າ ຈະປະຊຸມກັນອີກໃນວັນເສົາທີ່ຈະມາເຖິງນີ້ ເພື່ອທົບທວນເບິ່ງຜົນກະທົບຂອງການລົງໂທດດັ່ງກ່າວ ແລະພິຈາລະນາເບິ່ງວ່າ ຄວນຈະແກ່ຍາວການລົງໂທດດັ່ງກ່າວອອກໄປຫລືບໍ່.
ການຮັບຮອງເອົາມາດຕະການເຫລົ່ານີ້ ແມ່ນສົ່ງຜົນກະທົບອັນໃຫຍ່ຫລວງຕໍ່ຊີເຣຍ ຊຶ່ງເປັນປະເທດທີ່ພູມໃຈຕົນເອງວ່າເປັນແຫລ່ງແຫ່ງຊາດນິຍົມອາຫຣັບມາເປັນເວລາດົນນານນັ້ນ. ນອກນີ້ແລ້ວ ການລົງຄະແນນສຽງໃນວັນອາທິດ ຜ່ານມາ ແມ່ນເປັນຂີດໝາຍຄັ້ງທໍາອິດ ໃນປະຫວັດສາດ 66 ປີ ຂອງສັນນິບາດຊາດອາຫຣັບ ທີ່ອົງການນີ້ທໍາການລົງໂທດທາງເສດຖະກິດ ແລະການເມືອງຕໍ່ປະເທດສະມາຊິກໃດນຶ່ງຂອງຕົນ.
