ປ. ອັສສັດ ແຫ່ງຊີເຣຍ ປະນາມ ການສັງຫານໝູ່ ໃນເມືອງ ຮູລາ

ປະທານ​າທິບໍດີ Bashar al-Assad ​ແຫ່ງ​ຊີ​ເຣຍ ປະຕິ​ເສດ​ວ່າ ​ລັດ ຖະບານ​ຂອງ​ທ່ານ​ບໍ່ໄດ້
ມີ​ສ່ວນພົວພັນ​ນໍາ​ການ​ສັງຫານ​ໝູ່​ໃນ​ເມືອງ​ຮູ​ລາ ​ໂດຍ​ກ່າວ​ວ່າ ​ແມ່ນ​ແຕ່​ພວກ​ສັດຊົ່ວ​ຮ້າຍ ກໍ​
ຈະ​ບໍ່​ກະທໍາເຊ່ນ​ນັ້ນ.

ຜູ້​ນໍາ​ຊີ​ເຣຍ​ໃຫ້​ຄວາມ​ເຫັນ​ເຊ່ນ​ນີ້​ ກ່ຽວ​ກັບ​ການ​ສັງຫານ​ໝູ່​ຜູ້​ຄົນ​ຢ່າງໂຫດ​ຫ້ຽມ​ໃນ​ເດືອນ
​ຜ່ານ​ມາ​ທີ່​ເມືອງ​ຮູ​ລາ ທີ່​ໄດ້​ເຮັດ​ໃຫ້​ຜູ້​ຄົນ​ຈໍານວນ ຫຼາຍ​ກວ່າ 100 ຄົນ​ເສຍ​ຊີວິດ​ ຮວມທັງ
​ພວກ​ເດັກນ້ອຍ 49 ຄົນນັ້ນ ​ໃນ​ຄໍາ​ປາໄສຄັ້ງ​ທໍາ​ອິດ​ຂອງ​ທ່ານ​ຕໍ່​ສະພາ​ແຫ່ງ​ຊາດ ​ນັບ​ແຕ່​ມີ
​ການ​ເລືອກ​ຕັ້ງ​ໃນ​ເດືອນ​ພຶດສະພາ​ຜ່ານ​ມາ​ນີ້.

ປະທານາທິບໍດີ​ອັສສັດກ່າວ​ຕໍ່​ສະພາ​ແຫ່ງ​ຊາດໃນ​ວັນ​ອາທິດ​ມື້ນີ້​ວ່າ ຊີ​ເຣຍກໍາລັງ​ປະ​ເຊີນ
ກັບ​ແຜນການຂອງ​ຕ່າງຊາດ ​ເພື່ອ​ທໍາລາຍ​ປະເທດ.

ຄໍາ​ປາ​ໄສ​ຂອງ​ທ່ານ​ມີ​ຂຶ້ນ​ນຶ່ງ​ມື້ ​ຫຼັງ​ຈາກ​ພວກ​ຜູ້​ນໍາ​ຂອງ​ສັນນິບາດ​ອາຫຣັບທໍາ​ການປະຊຸມ​ສຸກ​ເສີນກັນ​ທີ່​ Doha ກັບ​ທ່ານ​ໂກ​ຟີ ອັນ​ນັນ ທູດ​ພິ​ເສດ​ສະຫະ​ປະຊາ​ຊາດ​ແລະ​ສັນນິບາດ​ອາຫຣັບ.

ທ່ານ​ອັນ​ນັນ ກ່າວ​ວ່າ ​ເງົາທີ່​ໜ້າ​ຢ້ານ​ກົວຂອງ​ສົງ​ຄາມ​ໃນ​ຊີ​ເຣຍກໍາລັງ ໃຫຍ່​ຂຶ້ນນັບ​ມື້ ​ແລະ​ວ່າ ການກະທໍາ​ທີ່​ໂຫດ​ຫ້ຽມ​ໃນຫວ່າງ​ໄວໆ​ມານີ້ ສະ​ແດງ​ໃຫ້​ເຫັນ​ວ່າ ບັນ​ຫາ​ຂັດ​ແຍ້​ງກັນ​ໃນ​ຊີ​ເຣຍ​ກໍາລັງ​ຜັນ​ຂະຫຍາຍ​ອອກຢ່າງ​ໄວ ​ເຖິງ​ຂັ້ນ​ຄວບ​ຄຸມ​ບໍ່​ໄດ້​ແລ້ວ.

​ວັນ​ເສົາ​ວານ​ນີ້ ທ່ານ​ນາງ​ຮີນ​ລາຣີ ຄລິນ​ຕັນລັດຖະມົນຕີ​ການຕ່າງປະ​ເທດສະຫະລັດ ​ໄດ້​ໂອ້​ລົມ​ກັນ​ກັບ​ທ່ານ Sergei Lavrov ຄູ່​ຕໍາ​ແໜ່ງຈາກຣັດ​ເຊຍ ກ່ຽວ​ກັບ​ການ​ດໍາ​ເນີນ​ງານ​ຮ່ວມ​ກັນ​ເພື່ອ​ຊ່ອຍ​ຊາວ​ຊີເຣຍ ວາງ​ແຜນຍຸດ​ທະ​ສາດ​ສໍາລັບ​ການຫັນປ່ຽນ​ດ້ານ​ການ​ເມືອງ​ຂອງ​ເຂົາ​ເຈົ້າ​.

ທາງສັນນິບາດ​ອາຫຣັບກໍ​ໄດ້ຮຽກຮ້ອງ​ໃຫ້​ສະພາ​ຄວາມ​ໝັ້ນຄົງ​ສະຫະ​ປະຊາຊາດ ​ສົ່ງໜ່ວຍ​ຮັກສາ​ສັນຕິພາບ​ໄປສັບ​ປ່ຽນ​ພວກ​ນັກ​ສັງ​ເກດການ​ເກືອບ 300 ຄົນ​ໃນຊີ​ເຣຍນັ້ນ.

ການ​ສູ້​ລົບ​ກັນ​ໄດ້​ລະ​ເບີດ​ຂຶ້ນ​ໃນ​ແລງ​ວັນ​ສຸກ​ຜ່ານ​ມາ​ນີ້​ ຂ້າມ​ຊາຍ​ແດນ​ຊີ​ເຣຍ​ເຂົ້າ​ໄປ​ໃນ​ເມືອງ​ທ່າ Tripoli ​ໃນ​ພາກ​ເໜືອ​ຂອງ​ເລ​ບາ​ນອນ ​ເຮັດໃຫ້ 9 ຄົນ​ເສຍ​ຊີວິດ ຮວມທັງ​ພວກ​ພົນລະ​ເຮືອນ ​ແລະ​ບາດ​ເຈັບ​ຕື່ມອີກ ​ຫຼາຍ​ກວ່າ 30 ຄົນ. ບັນດາ​ເຈົ້າ​ໜ້າ​ທີ່​ເລ​ບາ​ນອນ​ກ່າວ​ວ່າ ການ​ ປະ​ທະ​ກັນ​ດັ່ງກ່າວ ​ແມ່ນເກີດ​ຂຶ້ນ​ລະຫວ່າງ​ພວກທີ່​ນິຍົມ​ທ່ານ​ອັສສັດ ​ແລະພວກ​ທະຫານ​ກອງ​ຫຼອນ​ຕໍ່ຕ້ານປະທານາທິບໍດີ​ຊີ​ເຣຍ.