ເວລານີ້ ທ່ານໂກຟີ ອັນນັນ ທູດພິເສດສະຫະປະຊາຊາດ ກໍາລັງຢູ່ທີ່ນະຄອນຫລວງດາມັສ
ກັສ ເພື່ອພະຍາຍາມຫາທາງກູ້ແຜນການສັນຕິພາບຂອງທ່ານ ສໍາລັບຊີເຣຍ ບ່ອນທີ່ບັນດາ
ນັກເຄື່ອນໄຫວດ້ານສິດທິມະນຸດ ກ່າວວ່າ ການໂຈມຕີບັ້ນໃໝ່ຂອງລັດຖະບານໃນເມືອງຮາ
ມາ ໃນພາກກາງຂອງປະເທດ ໄດ້ສັງຫານປະຊາຊົນຢ່າງໜ້ອຍ 34 ຄົນ.
ຫລັງຈາກເດີນທາງໄປຮອດດາມັສກັສໃນວັນຈັນມື້ນີ້ ທ່ານອັນນັນໄດ້ ເນ້ນຢໍ້າຄໍາຮຽກຮ້ອງຂອງທ່ານ ຕໍ່ທຸກພັກຝ່າຍໃນບັນຫາຂັດແຍ້ງກັນທີ່ດໍາເນີນມາໄດ້ 15 ເດືອນແລ້ວ ໃນຊີເຣຍນັ້ນ ໃຫ້ຍຸດຕິການກໍ່ຄວາມຮຸນແຮງເສຍ. ທ່ານກ່າວອີກວ່າ ທ່ານຮູ້ສຶກຕົກໃຈຫລາຍນໍາອັນທີ່ທ່ານເອີ້ນວ່າ ການສັງຫານໂຫດປະຊາຊົນຢ່າງນ້ອຍ 108 ຄົນ ໃນເມືອງຮູລາ ຂອງຝ່າຍກະບົດ ໃນວັນສຸກຜ່ານມານັ້ນ.
ບັນດາເຈົ້າໜ້າທີ່ຊີເຣຍກ່າວວ່າ ທ່ານອັນນັນ ອະດີດເລຂາທິການໃຫຍ່ສະຫະປະຊາຊາດ ຈະ
ພົບປະກັບລັດຖະມົນຕີຕ່າງປະເທດ Walid Moallem ໃນວັນຈັນມື້ນີ້ ແລະກັບປະທານາທິ
ບໍດີ Bashar al-Assad ໃນວັນອັງຄານມື້ອື່ນ.
ກ່ອນໜ້າທ່ານອັນນັນເດີນທາງໄປຮອດນັ້ນ ບັນດານັກເຄື່ອນໄຫວກ່າວວ່າ ກໍາລັງຮັກສາຄວາມປອດໄພຂອງລັດຖະບານໄດ້ລະດົມຍິງໃສ່ຫຼາຍຄຸ້ມໃນເມືອງຮາມາ ຕັ້ງແຕ່ວັນອາທິດວານນີ້ມາຮອດເຊົ້າວັນຈັນມື້ນີ້ ໃນການຕອບໂຕ້ຕໍ່ການໂຈມຕີຂອງຝ່າຍກະບົດ ຕໍ່ທີ່ໝັ້ນແຫ່ງຕ່າງໆຂອງຝ່າຍລັດຖະບານນັ້ນ. ພວກນັກເຄື່ອນໄຫວ ກ່າວອີກວ່າ ການສູ້ລົບກັນໄດ້ສັງຫານທະຫານ ພ້ອມທັງພວກກະບົດແລະພົນລະເຮືອນຢ່າງໜ້ອຍ 13 ຄົນ. ແຕ່ໂຕເລກຜູ້ເສຍຊີວິດນີ້ບໍ່ສາ ມາດໄດ້ຮັບການຢືນຢັນຈາກແຫຼ່ງຂ່າວທີ່ເປັນອິດສະລະ.
ເບິ່ງວີດີໂອ ກ່ຽວກັບຄວາມຮຸນແຮງໃນຊີເຣຍ:
ໃນມື້ວັນເສົາ ທ່ານອັນນັນໄດ້ກ່າວຫາລັດຖະບານຊີເຣຍວ່າ ລະດົມຍິງປືນໃຫຍ່ແລະຍິງປືນລົດຖັງໃສ່ເມືອງຮູລາ ໃນການລະເມີດຢ່າງຈະແຈ້ງຕໍ່ຄໍາໝັ້ນສັນຍາຂອງຊີເຣຍ ທີ່ວ່າຈະຢຸດເຊົາ ໃຊ້ຍຸດທະວິທີແບບນັ້ນ.
ສະພາຄວາມໝັ້ນຄົງສະຫະປະຊາຊາດໄດ້ອອກຖະແຫຼງຂ່າວສະບັບນຶ່ງໃນວັນອາທິດວານນີ້ ກ່າວປະນາມຢ່າງແຮງຕໍ່ການລະດົມຍິງຂອງລັດຖະບານຊີເຣຍ ໃສ່ເມືອງຮູລາ ບ່ອນທີ່ພວກນັກສັງເກດການສະຫະປະຊາຊາດໄດ້ຢືນຢັນວ່າ ມີພົນລະເຮືອນຫຼາຍສິບຄົນເສຍຊີວິດນັ້ນ. ຖະແຫຼງການຂອງ 15 ປະເທດສະມາຊິກຂອງສະພາຄວາມໝັ້ນຄົງ ທີ່ບໍ່ມີຜົນບັງຄັບໃຊ້ນັ້ນ ຍັງໄດ້ປະນາມການສັງຫານຊາວເມືອງຮູລາໂດຍ ການຍິງແບບເຜົາຂົນແລະທໍາຮ້າຍຮ່າງກາຍຢ່າງຮ້າຍແຮງ ແຕ່ບໍ່ໄດ້ເວົ້າວ່າ ແມ່ນໃຜເປັນຜູ້ຮັບຜິດຊອບເລື້ອງນີ້.
ທ່ານ Bashar Ja’afari ເອກອັກຄະລັດຖະທູດຊີເຣຍປະຈໍາສະຫະປະຊາຊາດ ໄດ້ເນ້ນຢໍ້າຄໍາປະຕິເສດຂອງລັດຖະບານຂອງທ່ານ ວ່າບໍ່ໄດ້ມີບົດບາດໃດໆ ໃນການສັງຫານຊາວເມືອງຮູລານັ້ນ ໂດຍໄດ້ຖິ້ມໂທດໃສ່ພວກກຸ່ມກໍ່ການຮ້າຍປະກອບອາວຸດ ທີ່ທາງລັດຖະບານ ກ່າວວ່າ ເປັນຜູ້ຢູ່ເບື້ອງຫລັງການກະບົດນັ້ນ.