ພວກນັກເຄື່ອນໄຫວດ້ານສິດທິມະນຸດຊີເຣຍ ກ່າວວ່າ ພວກທະຫານຂອງລັດຖະບານຍິງປືນກົນທີ່ຕິດຕັ້ງໃສ່ລົດຖັງໄດ້ບຸກເຂົ້າໄປໃນໃຈກາງ ເມືອງ Rastan ທີ່ປະສົບກັບຄວາມວຸ້ນວາຍໃນພາກກາງຂອງປະເທດ ໄດ້ເຮັດໃຫ້ປະຊາຊົນຢ່າງໜ້ອຍ 20 ຄົນໄດ້ຮັບບາດເຈັບ.
ພວກນັກເຄື່ອນໄຫວເວົ້າວ່າ ພວກທະຫານໄດ້ບຸກເຂົ້າໄປໃນເມືອງດັ່ງ ກ່າວໃນຕອນເຊົ້າວັນອັງຄານມື້ນີ້ ຊຶ່ງຕັ້ງຢູ່ຕາມແຄມຖະໜົນຫລວງ ສາຍນຶ່ງລະຫວ່າງເມືອງ Homs ແລະເມືອງ Hama ຊຶ່ງເປັນພວກຫົວເມືອງທີ່ປະສົບກັບຄວາມວຸ້ນວາຍນັ້ນ. ພາກພື້ນດັ່ງກ່າວໄດ້ເປັນ ຈຸດໃຈກາງຂອງການປະທ້ວງຕໍ່ຕ້ານປະທານາທິບໍດີ Bashar al-Assad ນັ້ນ.
ການປະຕິບັດງານດັ່ງກ່າວເກີດຂຶ້ນນຶ່ງມື້ ຫລັງຈາກທ່ານ Walid Mouallem ລັດຖະມົນຕີຕ່າງປະເທດຊີເຣຍຖິ້ມໂທດໃສ່ພວກກຸ່ມປະກອບອາວຸດຕ່າງໆກ່ຽວກັບສະຖານະການທີ່ເກີດຂຶ້ນໃນຊີເຣຍ ແລະໂຈມຕີສະຫະລັດແລະສະຫະພາບຢູໂຣບທີ່ລົງໂທດຊີເຣຍນັ້ນ.
ໃນຄໍາປາໄສໃນວັນຈັນວານນີ້ ຕໍ່ກອງປະຊຸມສະມັດຊາໃຫຍ່ສະຫະປະຊາຊາດທີ່ນະຄອນນີວຢອກ ທ່ານ Mouallem ໄດ້ກ່າວຫາສະຫະລັດແລະສະຫະພາບຢູໂຣບວ່າ ທຳລາຍຜົນປະໂຫຍດແລະຄວາມຕ້ອງການຂັ້ນພື້ນຖານຂອງຊາວຊີເຣຍ ໃນຂະນະທີ່ສະແດງຄວາມເປັນຫ່ວງເລື້ອງຄວາມປອດໄພແລະສິດທິຂອງເຂົາເຈົ້ານັ້ນ.
