ພວກທີ່ເຫັນເຫດການໃນພາກໃຕ້ຂອງຊີເຣຍ ກ່າວວ່າກໍາລັງຮັກສາຄວາມປອດໄພໄດ້ສັງຫານປະຊາຊົນ 5 ຄົນ ໃນຂະນະທີ່ທາງການຂອງຊີເຣຍຂະຫຍາຍກວ້າງອອກໄປ ການປາບປາມຕໍ່ການລຸກຮືຂຶ້ນຕໍ່ຕ້ານລັດຖະບານຂອງປະຊາຊົນ ມາເປັນເວລາ 5 ສັບປະດາແລ້ວນັ້ນ.
ພວກເຫັນເຫດການກ່າວໃນວັນຈັນມື້ນີ້ວ່າ ເຂົາເຈົ້າໄດ້ເຫັນຫລາຍສົບຢູ່ໃນລົດຄັນນຶ່ງ ທີ່ໄດ້ຖືກໂຈມຕີໂດຍພວກກໍາລັງຮັກສາຄວາມປອດໄພ ໃນເມືອງ Daraa ຫລັງຈາກລົດຖັງແລະພວກທະຫານໄດ້ເຄື່ອນກໍາລັງເຂົ້າໄປໃນເມືອງດັ່ງກ່າວ.
ບັນດາກຸ່ມປົກປ້ອງສິດທິມະນຸດກໍໄດ້ລາຍງານເຊ່ນກັນວ່າ ໄດ້ຍິນສຽງປືນຈາກພວກກໍາລັງຮັກສາຄວາມປອດໄພໃນຄຸ້ມ Douma ໃນເຂດຊາຍນະຄອນຫລວງ Damascus ນັ້ນ.
ໃນວັນອາທິດວານນີ້ ພວກກຸ່ມປົກປ້ອງສິດທິມະນຸດກ່າວວ່າ ກໍາລັງຮັກສາຄວາມປອດໄພໄດ້ສັງຫານພົນລະເຮືອນຢ່າງນ້ອຍ 4 ຄົນ ແລະຈັບກຸມພວກນັກເຄື່ອນໄຫວຝ່າຍຄ້ານອີກຫລາຍຄົນໃນເມືອງ Jableh ທີ່ຢູ່ແຄມທະເລ ຫລັງຈາກມີການປະທ້ວງນິຍົມປະຊາທິປະໄຕຕໍ່ຕ້ານລັດຖະບານປະທານາທິບໍດີ Bashar al-Assad ໃນຄືນກ່ອນນັ້ນ. ພວກເຫັນເຫດ ການກ່າວວ່າ ການເຂັ່ນຂ້າປະຊາຊົນດັ່ງກ່າວໄດ້ເກີດຂຶ້ນ ເຖິງແມ່ນບໍ່ໄດ້ມີການປະທ້ວງໃດໆເລີຍໃນເວລານັ້ນກໍຕາມ.