ສັນນິບາດຊາດອາຫຣັບພົບປະກັນ ທີ່ອີຈິບໃນວັນອາທິດມື້ນີ້ ເພື່ອທົບທວນເບິ່ງການປະ
ກອບພາລະກິດໃນເດືອນທໍາອິດຂອງພວກນັກສັງເກດການຂອງຕົນ ທີ່ໄດ້ຖືກໂຈມຕີຢ່າງໜັກໃນຊີເຣຍນັ້ນ. ຄາດວ່າກຸ່ມອາ ຫຣັບຈະຕໍ່ເວລາການປະກອບພາກິດດັ່ງກ່າວຂອງຕົນອອກໄປອີກແລະ ຈະເພີ່ມຈໍານວນນັກສັງເກດການ ທີ່ມີ 165 ຄົນແລ້ວນັ້ນ ຂຶ້ນອີກ.
ຫົວໜ້າສະພາປົກຄອງຊາດຊົ່ວຄາວຝ່າຍຄ້ານຊີເຣຍ ທ່ານ Burhan Ghalioun ທີ່ເດີນ
ທາງໄປຍັງກຸງໄຄໂຣໃນວັນເສົາວານນີ້ ເພື່ອພົບປະກັບບັນດາເຈົ້າໜ້າທີ່ສັນນິບາດຊາດອາ
ຫຣັບ ກ່າວວ່າຖ້າລາຍງານຂອງ ພວກນັກສັງເກດການມີລັກສະນະລໍາອຽງ ກຸ່ມຂອງທ່ານ
ກໍຈະບໍ່ຮັບເອົາ.
ລັດຖະມົນຕີການຕ່າງປະເທດສະຫະລັດໄດ້ໂທລະສັບໄປສົນທະນາກັບ ຄູ່ຕໍາແໜ່ງຈາກອີຈິບ ໃນວັນເສົາວານນີ້ ຊຶ່ງທາງກະຊວງການຕ່າງປະເທດສະຫະລັດກ່າວວ່າ ທ່ານນາງຮີນລາຣີ ຄລິນຕັນໄດ້ສົມທຽບບັນທຶກຕ່າງໆກັບລັດຖະມົນຕີຕ່າງປະເທດອີຈິບ ທ່ານ Mohammed Amr ກ່ຽວກັບການເຄື່ອນໄຫວຕ່າງໆໃນຊີເຣຍ ກ່ອນໜ້າກອງປະຊຸມຂອງສັນນິບາດຊາດອາຫຣັບນັ້ນ.
ພວກນັກເຄື່ອນໄຫວຊີເຣຍກ່າວວ່າ ພວກອະດີດທະຫານໂຕນໜີກຸ່ມນຶ່ງໄດ້ຍຶດເອົາເມືອງ Douma ໃນເຂດຊານນະຄອນຫລວງດາມັສກັສ ແຕ່ຫລັງຈາກຈາກນັ້ນ ກໍພາກັບຖອນກັບຄືນມາຍັງຖານປະຕິບັດງານຂອງພວກເຂົາ. ກຸ່ມປົກປ້ອງສິດມະນຸດ Observatory for Human Rights ຂອງຊີເຣຍທີ່ມີຫ້ອງການປະຕິບັດງານຢູ່ໃນອັງກິດກ່າວວ່າ ການສູ້ລົບກັນໄດ້ມີຂຶ້ນ ເວລາພວກກໍາລັງຮັກສາຄວາປອດໄພຂອງລັດ ຖະບານຍິງປືນໃສ່ຂະບວນແຫ່ສົ່ງສະການຂະບວນນຶ່ງ ຊຶ່ງໄດ້ເຮັດໃຫ້ ປະຊາຊົນ 4 ຄົນເສຍຊີວິດໄປ. ເມືອງ Douma ໄດ້ເປັນຈຸດຂອງຄວາມວຸ້ນວາຍຢູ່ຕໍ່ມາໃນລະຫວ່າງການປາບປາມຢ່າງນອງເລືອດຂອງຝ່າຍລັດຖະບານ ຕໍ່ພວກປະທ້ວງຕໍ່ຕ້ານລັດຖະບານ ມາເປັນເວລາ 10 ເດືອນຜ່ານມານີ້.
ສື່ມວນຊົນແລະພວກນັກເຄື່ອນໄຫວຊີເຣຍ ກ່າວວ່າ ຢ່າງໜ້ອຍປະຊາຊົນ 30 ຄົນໄດ້ຖືກສັງຫານໃນທົ່ວປະເທດໃນວັນເສົາວານນີ້ ຂະນະທີ່ບັນດາກຸ່ມຝ່າຍຄ້ານຮຽກຮ້ອງໄປຍັງສັນນິບາດຊາດອາຫຣັບ ໃຫ້ພະຍາຍາມຫາທາງໃຫ້ສະຫະປະຊາຊາດເຂົ້າແຊກແຊງໃນຊີເຣຍນັ້ນ.
ສະຫະປະຊາຊາດກ່າວວ່າ ຄວາມຮຸນແຮງທີ່ພົວພັນກັບການລຸກຮືຂຶ້ນ ໄດ້ສັງຫານປະຊາຊົນ
ໄປແລ້ວຫລາຍກວ່າ 5400 ຄົນ ແລະຝ່າຍລັດຖະບານຊີເຣຍກ່າວວ່າ ພວກກໍ່ການຮ້າຍ
ໄດ້ສັງຫານພວກກໍາລັງຮັກສາຄວາມປອດໄພໄປແລ້ວ ປະມານ 2 ພັນຄົນນັບແຕ່ຄວາມ
ວຸ້ນວາຍໄດ້ເລີ້ມຂຶ້ນມາ.
ເບິ່ງວີດີໂອລາຍງານ ຣັດເຊຍຍັງສະໜັບສະໜູນຊີເຣຍ ເຖິງແມ່ນຝ່າຍຕາເວັນຕົກ
ພິຈາລະນາຈະລົງໂທດຊີເຣຍ ຕື່ມກໍຕາມ:
