ບັນດານັກເຄື່ອນໄຫວໃນຊີເຣຍກ່າວວ່າ ລະເບີດທີ່ໃຊ້ຈະຫລວດຍິງຫລາຍລູກ ໄດ້ຕົກ
ຖືກຕຶກອາຄານຫລັງນຶ່ງຂອງພັກ Baath ຂອງລັດຖະບານໃນນະຄອນຫລວງດາມັສກັສ
ໃນວັນອາທິດມື້ນີ້ ຂະນະທີ່ປະທານາທິບໍດີ Bashar al-Assad ໃຫ້ຄໍາໜັ້ນສັນຍາວ່າ
ທ່ານຈະບໍ່ກົ້ມຫົວຕໍ່ຄວາມກົດດັນຂອງນາໆຊາດ ເພື່ອໃຫ້ຜ່ອນຄາຍການປາບປາມ
ຢ່າງໂຫດຫ້ຽມຂອງທ່ານ ຕໍ່ພວກຄັດຄ້ານລັດຖະບານນັ້ນ.
ເຄືອຂ່າຍຂອງນັກເຄື່ອນໄຫວຂອງຄະນະກໍາມະການປະສານງານທ້ອງຖິ່ນ ຫລື The Local Coordination Committees ແລະຊາວເມືອງຫລາຍຄົນແຈ້ງໃຫ້ຊາບໃນວັນອາທິດມື້ນີ້ວ່າມີລະເບີດຫລາຍລູກແຕກຂຶ້ນໃນໃຈກາງນະຄອນຫລວງຂອງຊີເຣຍ.
ພວກປະຊາຊົນເຫລົ່ານີ້ກ່າວຕື່ມວ່າ ມີລົດດັບເພີງຫລາຍຄັນແລ່ນມຸ້ງໜ້າໄປຍັງຂົງເຂດດັ່ງກ່າວ ທ່າມກາງການມີໜ້າຢ່າງຫລວງຫລາຍຂອງພວກເຈົ້າໜ້າທີ່ຕໍາຫລວດ. ຍັງບໍ່ທັນມີຂ່າວອື່ນໃດຢືນຢັນຄວາມຈິງຂອງລາຍງານດັ່ງກ່າວໃນເວລານີ້ເທື່ອ ແລະພວກອື່ນໆທີ່ເຫັນເຫດການເວົ້າ ວ່າເຂົາເຈົ້າບໍ່ເຫັນຮ່ອງຮອຍຄວາມເສຍຫາຍໃດໆ.
ກອງທັບເສລີຊີເຣຍ ຫລື FreeSyrian Army ຊຶ່ງເປັນກຸ່ມພວກທະຫານທີ່ຄັດຄ້ານລັດຖະບານທີ່ມີຖານປະຕິບັດງານຢູ່ໃນເທີກີ ປະເທດເພື່ອນບ້ານໄດ້ອ້າງເອົາຄວາມຮັບຜິດຊອບໃນການໂຈມຕີຄັ້ງນີ້.
ຖ້າຫາກມີການຢືນຢັນ ການໂຈມຕີຄັ້ງນີ້ກໍຈະເປັນຄັ້ງທໍາອິດທີ່ມີການໂຈມຕີແບບນີ້ເກີດຂຶ້ນໃນນະຄອນຫລວງຂອງຊີເຣຍ ນັບແຕ່ການລຸກຮືຂຶ້ນຕໍ່ຕ້ານລັດຖະບານເລີ້ມຂຶ້ນ ໃນເດືອນມີນາຜ່ານມາ. ການໂຈມຕີທີ່ ມີລາຍງານແຈ້ງໃຫ້ຊາບນີ້ ເກີດຂຶ້ນໃນເວລາບໍ່ເທົ່າໃດຊົ່ວໂມງ ຫລັງຈາກກໍານົດເວລາເສ້ນຕາຍຂອງສັນນິບາດຊາດອາຫຣັບ ໄດ້ຜ່ານພົ້ນໄປ ສໍາລັບໃຫ້ລັດຖະບານກຸງດາມັສກັສ ຍຸດຕິການປາບປາມພວກຄັດຄ້ານລັດຖະບານ ຢ່າງນອງເລືອດຂອງຕົນ.
ໃນວັນອາທິດວານນີ້ເຊ່ນກັນ ປະທານາທິບໍດີອັສຊາດ ໄດ້ກ່າວຕໍ່ໜັງສືພິມ Sunday Time ຂອງອັງກິດວ່າ ປະຊາຊົນຊີເຣຍຈະອອກໄປປ່ອນບັດເລືອກຕັ້ງເອົາສະພາໃນເດືອນກຸມພາຫລືມີນາປີໜ້ານີ້ເພື່ອຮ່າງກົດ
ໝາຍລັດຖະທໍານະນູນສະບັບໃໝ່. ແຕ່ທ່ານໄດ້ປະຕິຍານທີ່ຈະສືບຕໍ່ການທັບມ້າງປາບປາມຂອງກໍາລັງຮັກສາຄວາມປອດໄພຂອງທ່ານຕໍ່ໄປ ຕໍ່ພວກຫົວຮຸນແຮງທີ່ທ່ານກ່າວວ່າ ທໍາການສັງຫານໝູ່ປະຊາຊົນຊີເຣຍ ໃນທຸກໆມື້ນັ້ນ.
