ອົງການຂ່າວແຫ່ງລັດຂອງຊີເຣຍກ່າວວ່າ ພວກກໍາລັງຮັກສາຄວາມປອດໄພໄດ້ທໍາການຈັບກຸມປະຊາຊົນຈໍານວນເກືອບ 500 ຄົນແລະສັງຫານຕື່ມອີກ 10 ຄົນ ໃນຂະນະທີ່ພວກເຫັນເຫດການໃນເມືອງ Daraa ກ່າວວ່າ ພວກທະຫານທີ່ໄດ້ຮັບການໜຸນຫລັງຈາກລົດຫຸ້ມເກາະໄດ້ເຄື່ອນກໍາລັງໄປຕາມຖະໜົນຫົນທາງສາຍຕ່າງໆ ເພື່ອພະຍາຍາມທັບມ້າງພວກປະທ້ວງຕໍ່ຕ້ານລັດຖະບານປະທານາທິບໍດີ Bashar al-Assad ນັ້ນ.
ພວກຊາວເມືອງ Daraa ກ່າວວ່າ ກໍາລັງຮັກສາຄວາມປອດໄພຂອງຊີເຣຍກໍາລັງທໍາການຈັບກຸມພວກຜູ້ຊາຍອາຍຸ 15 ປີຂຶ້ນໄປ ໃນເມືອງໃນພາກໃຕ້ແຫ່ງນີ້ ຊຶ່ງໄດ້ເປັນຈຸດໃຈກາງຂອງການລຸກຮືຂຶ້ນຂອງປະຊາ ຊົນ ຕໍ່ຕ້ານລັດຖະບານ ມາເປັນເວລາ 6 ສັບປະດາຜ່ານມາ. ພວກຊາວເມືອງກ່າວຕື່ມວ່າ ພວກທະຫານໄດ້ປິດລ້ອມພວກຄຸ້ມຕ່າງໆຢ່າງເປັນລະບົບ ໃນຂະນະທີ່ພວກເຂົາເຈົ້າທໍາການຈັບກຸມປະຊາຊົນນັ້ນ. ມີລາຍງານວ່າ ພວກທະນາຍຄວາມທີ່ມີຊື່ສຽງແລະພວກນັກເຄື່ອນໄຫວໃນເມືອງ Daraa ໄດ້ຕົກເປັນເປັນເປົ້າໝາຍຂອງການຈັບກຸມເຊ່ນກັນ.
ພວກເຫັນເຫດການກ່າວວ່າ ພວກທະຫານກອງໜຸນຈຸໃໝ່ໄດ້ເຂົ້າໄປໃນເມືອງດັ່ງກ່າວໃນວັນອາທິດວານນີ້ ຊຶ່ງໄປສົມທົບກັບພວກທະຫານຫລາຍພັນຄົນທີ່ປະຈໍາຢູ່ໃນທີ່ນັ້ນກ່ອນແລ້ວ. ນໍ້າມັນເຊື້ອໄຟ ໄຟຟ້າ ນໍ້າ ແລະການຕິດຕໍ່ສື່ສານໄດ້ຖືກທໍາລາຍເສຍຫາຍໜັກໃນເມືອງ Daraa ມາເປັນເວລາ 6 ມື້ແລ້ວ ແລະກ່າວກັນວ່າ ເຂົ້າປາອາຫານກໍຫາຍາກ.
ພວກສື່ມວນຊົນຕ່າງປະເທດເກືອບທັງໝົດໄດ້ຖືກຫ້າມຈາກຊີເຣຍ ຊຶ່ງເຮັດໃຫ້ເກືອບວ່າເປັນ
ໄປບໍ່ໄດ້ ທີ່ຈະຢືນຢັນພວກລາຍງານເຫລົ່ານີ້ໄດ້ຢ່າງເປັນອິດສະລະ.
