ບັນດານັກເຄື່ອນໄຫວດ້ານສິດທິມະນຸດກ່າວວ່າ ກໍາລັງຂອງຊີເຣຍໄດ້ສັງຫານພົນລະເຮືອນ
ຢ່າງໜ້ອຍ 24 ຄົນ ໃນການໂຈມຕີຕໍ່ຫລາຍຫົວເມືອງ ໃນວັນຈັນວານນີ້ ຂະນະທີ່ສະພາ
ຄວາມໝັ້ນຄົງສະຫະປະຊາຊາດພົບປະກັນເພື່ອສົນທະນາເລື້ອງການປາບປາມຢ່າງໂຫດ
ຮ້າຍທາລຸນເພີ່ມຂຶ້ນນັບມື້ຂອງປະທານາທິບໍດີ Bashar al-Assad ຕໍ່ພວກຕໍ່ຕ້ານລັດ
ຖະບານນັ້ນ.
ພວກນັກເຄື່ອນໄຫວກ່າວວ່າ ການໂຈມຕີບາງແຫ່ງໃນວັນຈັນວານນີ້ມີຂຶ້ນໃນຂະນະທີ່ປະ
ຊາຊົນທໍາການປະທ້ວງ ຫລັງຈາກການສວດມົນພາວະນາຕອນແລງ ໃນມື້ທໍາອິດຂອງ
ເດືອນພັກຖືສິນຂອງຊາວມຸສລິມ ຫລື Ramadan ນັ້ນ.
ພວກຊາວເມືອງ Hama ກ່າວວ່າ ຝູງລົດຖັງຂອງລັດຖະບານໄດ້ທໍາການລະດົມຍິງໃສ່ຕົວ
ເມືອງຢ່າງໜັກອີກໃນແລງວັນຈັນວານນີ້ ແລະ ວ່າພວກທະຫານໄດ້ຍິງປືນກົນໃສ່ພວກທີ່
ສວດມົນພາວະນາຢູ່ບ່ອນປະທ້ວງນັ້ນ. ພວກກຸ່ມປົກປ້ອງສິດທິມະນຸດກ່າວວ່າ ຢ່າງໜ້ອຍ
ມີ 80 ຄົນເສຍຊີວິດໃນທົ່ວຊີເຣຍໃນການໂຈມຕີເມື່ອວັນອາທິດຜ່ານມາ ຮວມທັງ 52 ຄົນ
ໃນເມືອງຮາມາ ແລະໝູ່ບ້ານໃກ້ຄຽງ.
ສະພາຄວາມໝັ້ນຄົງສະຫະປະຊາຊາດກໍານົດຈະພົບປະກັນອີກໃນວັນອັງຄານມື້ນີ້ ເພື່ອ
ສືບຕໍ່ສົນທະນາກັນກ່ຽວກັບຮ່າງຍັດຕິສະບັບນຶ່ງທີ່ ປະນາມການໂຈມຕີຂອງຊີເຣຍ ຕໍ່
ພວກພົນລະເຮືອນນັ້ນ.
ສະພາຄວາມໝັ້ນຄົງໄດ້ເປີດກອງປະຊຸມສຸກເສິນແບບປິດລັບຂຶ້ນໃນວັນຈັນວານນີ້ ເພື່ອ
ສົນທະນາກັນເລື້ອງການປາບປາບຢ່າງຮຸນແຮງຂອງທ່ານ Assad ນັ້ນ. ພວກປະເທດ
ມະຫາອໍານາດໃນຢູໂຣບໄດ້ນໍາສະເໜີຄືນໃໝ່ຮ່າງຍັດຕິສະບັບນຶ່ງຂອງເຂົາເຈົ້າ ທີ່ໄດ້ຮັບ
ການໜຸນຫລັງຈາກສະຫະລັດແລະໄດ້ຖືກໂຈະໄວ້ກ່ອນນັ້ນ ແຕ່ບັນດານັກການທູດມີ
ຄວາມເຫັນຂັດແຍ້ງກັນກ່ຽວກັບກັບວ່າ ສະພາຄວາມໝັ້ນຄົງທີ່ມີ 15 ປະເທດສະມາຊິກ
ນັ້ນ ຄວນຈະຮັບຜ່ານຂໍ້ສະເໜີສະບັບນີ້ ຫລືບໍ ຫລືເຈລະຈາກັນເລື້ອງຂໍ້ສະເໜີສະບັບ
ນຶ່ງທີ່ມີຜົນໃຊ້ບັງຄັບໜ້ອຍລົງນັ້ນ.
ໃນວັນອັງຄານມື້ນີ້ ເຊ່ນກັນ ອີຕາລີໄດ້ຮຽກໂຕເອກອັກຄະລັດຖະທູດຂອງຕົນປະຈໍາຊີ
ເຣຍກັບຄືນປະເທດ ຍ້ອນການປາບປາມຢ່າງໜ້າຢ້ານກົວຂອງຊີເຣຍ ຕໍ່ປະຊາຊົນພົນ
ລະເຮືອນນັ້ນ.
ສະຫະພາບຢູໂຣບໄດ້ຂະຫຍາຍການລົງໂທດຂອງຕົນຕໍ່ລັດຖະບານຊີເຣຍ ໂດຍວາງ
ຂໍ້ຫ້າມເດີນທາງເຂົ້າປະເທດຂອງຕົນແລະກັກຊັບສິນຂອງເຈົ້າໜ້າທີ່ຊີເຣຍ 5 ຄົນຕື່ມ
ອີກ ຊຶ່ງຮວມທັງລັດຖະມົນຕີປ້ອງກັນປະເທດ Ali Habib Mahmud ຕະຫຼອດທັງ
ຫົວໜ້າຮັກສາຄວາມປອດໄພພາຍໃນ ແລະຫົວໜ້າກົມສືບລັບໃນເມືອງຮາມານັ້ນນໍາ.
ທ່ານ William Hague ລັດຖະມົນຕີການຕ່າງປະເທດອັງກິດ ກ່າວວ່າ ການລົງໂທດ
ໃໝ່ນີ້ ແມ່ນສົ່ງສານບອກໃຫ້ຮູ້ຢ່າງຈະແຈ້ງວ່າ ພວກທີ່ຮັບຜິດຊອບຕໍ່ການປາບປາມ
ປະຊາຊົນນີ້ ຈະຕ້ອງໄດ້ຮັບໂທດກໍາ.
