ລິ້ງ ສຳຫລັບເຂົ້າຫາ

ວັນສຸກ, ໒໙ ມີນາ ໒໐໒໔

ອີຈິບຮຽກໂຕ ເອກອັກຄະລັດຖະທູດ ປະຈໍາຊີເຣຍ ກັບຄືນປະເທດ


ປະທານາທິບໍດີ Bashar al-Assad ແຫ່ງຊີເຣຍ (ຂວາ) ພົບປະກັນ
ກັບທ່ານ Zhai Jun ຮອງລັດຖະມົນຕີການຕ່າງປະເທດຈີນທີ່ກຸງ ດາມັສກັສ.
ວັນທີ 18 ກຸມພາ 2012.
ປະທານາທິບໍດີ Bashar al-Assad ແຫ່ງຊີເຣຍ (ຂວາ) ພົບປະກັນ ກັບທ່ານ Zhai Jun ຮອງລັດຖະມົນຕີການຕ່າງປະເທດຈີນທີ່ກຸງ ດາມັສກັສ. ວັນທີ 18 ກຸມພາ 2012.

ອີ​ຈິບ​ໄດ້​ຮຽກ​ໂຕ​ເອກ​ອັກຄະ​ລັດ​ຖະທູດ​ຂອງ​ຕົນ​ປະ​ຈໍາ​ຊີ​ເຣຍ ກັບ​ຄືນ​ປະ​ເທດ ຊຶ່ງ​ເປັນ​ບັ້ນ​ຫລ້າ​ສຸດ​ໃນ​ການ​ເຄື່ອນ​ໄຫວ​ທີ່​ມີ​ມາ​ຢ່າງ​ຕໍ່​ເນື່ອງ​ກັນ ທາງ​ດ້ານການ​ທູດ​ຂອງ​ຝ່າຍ​ອາຫຣັບ
ທີ່​ແນ​ໃສ່​ເພື່ອ​ທໍາ​ຄວາມ​ກົດ​ດັນ​ຕໍ່ ປະທານາ​ທິບໍດີ Bashar al-Assad ​ເພື່ອ​ໃຫ້​ຍຸດຕິ​
ການ​ກວາດ​ລ້າງປາບ​ປາມ​ພວກ​ທີ່​ຄັດຄ້ານ​ທ່ານ ທີ່​ໄດ້​ຍັງ​ຜົນ​ໃຫ້​ປະຊາຊົນ​ຕາຍ​ໄປ​ຫລາຍ​
ພັນ​ຄົນ ​ແລ້ວ​ນັ້ນ.

ບັນດາ​ນັກ​ເຄື່ອນ​ໄຫວ​ຊີ​ເຣຍກ່າວ​ວ່າ ​ໃນ​ວັນ​ເສົາ​ວານ​ນີ້ ພວກ​ກໍາລັງ​ຮັກສາ​ຄວາມ​ສະຫງົບ​ຂອງ​ລັດຖະບານ​ໄດ້​ເປີດ​ສາກ​ຍິງ​ໃສ່​ພວກ​ປະ​ທ້ວງ​ໃນ​ນະຄອນຫລວງດາ​ມັສກັສ ທີ່​ປະ​ກອບ​ສ່ວນ​ໃນ​ຂະ​ບວນ​ແຫ່​ສົ່ງ​ສະການ​ພວກ​ປະຊາຊົນ​ທີ່​ເສຍ​ຊີວິດ​ໃນ​ການ​ປະ​ທ້ວງ​ໃນ​ມື້ກ່ອນ​ນັ້ນ.

ປະຊາຊົນ​ຫລາຍ​ພັນ​ຄົນ​ເຂົ້າ​ຮ່ວມ​ໃນ​ພິທີ​ຂະ​ບວນ​ແຫ່ງ​ສົ່ງສະການແລະ​ພວກ​ທີ່​ເຫັນ​ເຫດ
ການ​ ​ກ່າວ​ວ່າ ຜູ້​ໄວ້ອາ​ໄລ​ຄົນ​ນຶ່ງໄດ້​ເສຍຊີວິດ​ໃນການຍິງ​ໃສ່​ຂະ​ບວນ​ແຫ່​ສົ່ງສະການ​ນັ້ນ.

ໃນ​ຂະນະ​ດຽວ​ກັນ ພວກ​ປະ​ທ້ວງ​ຕໍ່ຕ້ານ​ລັດຖະບານ​ໄດ້​ເພີ່ມທະວີ​ການປະ​ທ້ວງ​ຂອງ​ພວກ​
ເຂົາ​ເຈົ້າ ​ຕໍ່​ຕ້າ​ນອໍານາດ​ປົກຄອງນັ້ນ​ຂຶ້ນອີກ ​ໂດຍມີຝູງ​ຊົນພາກັນ​ລົງ​ສູ່​ຖະໜົນ​ຫົນທາງ​ເປັນ
ຈໍານວນ​ຫລວງຫລາຍໃນ​ກຸງ​ດາ​ມັສກັສ​ ແລະ​ໃນ​ເມືອງ Aleppo.

ຄວາມ​ວຸ້ນວາຍ​ດັ່ງກ່າວ​ມີ​ຂຶ້ນ​ໃນ​ຂະນະ​ທີ່​ທ່ານ Zhai Jun ຮອງ​ລັດຖະມົນຕີ​ຕ່າງປະ​ເທດ
ຈີນ​ ທີ່ກໍາລັງ​ທໍາ​ການ​ຢ້ຽມຢາມ​ຊີ​ເຣຍ​ຢູ່ໃນ​ປັດຈຸບັນໄດ້ຮຽກຮ້ອງ​ໃຫ້​ທຸກ​ພັກ​ຝ່າຍ​ໃນ​ຊີ​ເຣຍ
ຢຸດ​ຄວາມ​ຮຸນ​ແຮງ​ນີ້ ​ແລະ​ສະ​ແດງ​ໃຫ້ການ​ສະໜັບສະໜຸນຕໍ່​ການ​ລົງ​ປະຊາ​ມະຕິ​ວ່າ​ດ້ວຍ​
ຮ່າງ​ກົດໝາຍ​ລັດຖະທໍາ​ມະນູນ​ສະບັບ​ໃໝ່​ຂອງ​ຊີ​ເຣຍ.

ຫລັງ​ຈາກ​ທໍາ​ການ​ພົບ​ປະ​ກັບ​ປະທານາທິບໍດີ Bashar al-Assad ແລ້ວ ທ່ານ Zhai
ກ່າວ​ວ່າ ທ່ານ​ຫວັງ​ວ່າການ​ລົງ​ປະຊາ​ມະຕິ ຊຶ່ງກໍານົດ​ຈະ​ມີ​ຂຶ້ນ​ໃນ​ວັນ​ທີ 26 ​ເດືອນ​ນີ້ ຈະ
ດໍາ​ເນີນ​ໄປ​ຢ່າງ​ລາບລື່ນແລະ​ການ​ປະຕິ​ຮູບ​ດ້ານ​ການ​ເມືອງ ​ທີ່​ລັດຖະບານ​ປະກາດ​ໃຫ້​ຊາບ
ຈະ​ຊ່ອຍ​ແຜ້ວ​ທາງ​ໄປ​ສູ່​ການ​ແກ້​ໄຂ​ບັນຫາ​ຢ່າງ​ສັນຕິ​ແຫ່ງ​ຄວາມ​ວຸ້ນວາຍ​ທີ່​ດໍາ​ເນີນ​ມາ​ໄດ້ 11 ​
ເດືອນ​ແລ້ວ​ໃນ​ຊີ​ເຣຍນັ້ນ.

XS
SM
MD
LG