ກຸ່ມຝ່າຍຄ້ານພັດຖິ່ນ ທີ່ສໍາຄັນຂອງຊີເຣຍໄດ້ເລືອກຕັ້ງເອົານັກປັນຍາຊົນຊາວເຄີດ
ໃຫ້ເປັນຜູ້ນໍາພາຄວາມພະຍາຍາມເພື່ອທ້ອນໂຮມຂະບວນການຕໍ່ຕ້ານ ລຸນຫລັງທີ່
ມີການຕໍ່ສູ້ຢູ່ພາຍໃນ ລະຫວ່າງກັນ ມາເປັນເວລາຫລາຍເດືອນ. ໃນຂະນະດຽວກັນ
ພວກນັກເຄື່ອນໄຫວລາຍງານວ່າ ມີພົນລະເຮືອນເສຍຊີວິດຫລາຍສິບຄົນ ໃນການ
ໂຈມຕີໂດຍກໍາລັງລັດຖະບານ ຢູ່ທົ່ວປະເທດ.
ບັນດາສະມາຊິກອາວຸໂສຂອງກຸ່ມຝ່າຍຄ້ານພັດຖິ່ນ Syrian National Council ຫຼື
ສະພາປົກຄອງຊາດຊີເຣຍ ໄດ້ເລືອກເອົາທ່ານ Abdulbaset Sieda ຊຶ່ງເປັນຊາວເຄີດ ໃຫ້ເປັນຜູ້ນໍາຄົນໃໝ່ຂອງກຸ່ມ ຢູ່ໃນກອງປະຊຸມທີ່ນະຄອນອິສຕັນບູລ ປະເທດເທີກີ
ໃນເຊົ້າວັນອາທິດມື້ນີ້. ທ່ານ Sieda ໄວ 50 ປາຍ ໄດ້ອາໃສຢູ່ໃນປະເທດສະວີເດັນ.
ບັນດາສະມາຊິກຂອງສະພາປົກຄອງຊາດຊີເຣຍ ຫລື SNC ຮວມທັງ ທ່ານ Abdel
Hamid Al Attassi ນໍາ ເອີ້ນທ່ານ Sieda ວ່າ ເປັນບຸກຄົນທີ່ໄດ້ຮັບການຍອມຮັບກັນ
ທົ່ວໄປ.
ທ່ານ Sieda ໄດ້ຖືກເລືອກຂຶ້ນແທນທ່ານ Burhan Ghalioun ທີ່ໄດ້ຕົກລົງລາອອກ
ຈາກຕໍາແໜ່ງໃນເດືອນແລ້ວນີ້ ທ່າມກາງການຕໍາໜິຕິຕຽນ ກ່ຽວກັບການນໍາພາຂອງທ່ານ.
ໃນການກ່າວຄໍາປາໃສຕໍ່ພວກນັກຂ່າວໃນວັນເສົາວານນີ້ ທ່ານ Sieda ເວົ້າວ່າ SNC
ຄວນສືບຕໍ່ປະຕິຮູບຕົນເອງ ເພື່ອດຶງເອົາບຸກຄົນທີ່ຕໍ່ຕ້ານ ລັດຖະບານ ເຂົ້າມາຮ່ວມ
ຂະບວນການເພີ້ມຂຶ້ນ.
ຂະນະດຽວກັນ ພວກນັກເຄື່ອນໄຫວຊາວຊີເຣຍເວົ້າວ່າ ກໍາລັງຮັກສາຄວາມປອດໄພ
ຂອງລັດຖະບານ ໄດ້ສັງຫານພົນລະເຮືອນຢ່າງໜ້ອຍ 52 ຄົນ ໃນການປາບປາມພວກ
ຕໍ່ຕ້ານລັດຖະບານຄັ້ງຫລ້າສຸດ ໃນວັນເສົາວານນີ້. ກຸ່ມສິ້ງຊອມສິດທິມະນຸດຊີເຣຍ ທີ່
ມີສໍານັກງານຢູ່ກຸງລອນດອນ ກ່າວວ່າ ບ່ອນທີ່ມີຄົນເສຍຊີວິດຫລາຍທີ່ສຸດ ໃນວັນເສົາ
ຜ່ານມາແມ່ນຢູ່ເຂດເມືອງ ດາຣາ, ຊຶ່ງມີ 20 ຄົນຖືກຂ້າຕາຍ ໃນການຍິງລະດົມ ໃນຕອນ
ເຊົ້າມືດວັນເສົາວານນີ້ ໃສ່ເມືອງດັ່ງກ່າວທີ່ຢູ່ທາງພາກໃຕ້ຂອງປະເທດ ແລະເປັນບ່ອນ ທີ່ການລຸກຮືຂຶ້ນສະໜັບສະໜູນປະຊາທິປະໄຕ ໄດ້ເລີ້ມຕົ້ນຂຶ້ນໃນ 15 ເດືອນກ່ອນ.
ພວກນັກເຄື່ອນໄຫວຍັງເວົ້າອີກວ່າ ປະຊາຊົນໄດ້ເສຍຊີວິດເພີ້ມຂຶ້ນ ໃນລະຫວ່າງການຍິງ
ຖະຫລົ່ມຂອງຝ່າຍລັດຖະບານໃສ່ເມືອງໂຮມສ໌ ທີ່ເປັນ ສູນກາງຂອງຝ່າຍກະບົດ ແລະໃນ ການຍິງໂຕ້ຕອບກັນລະຫວ່າງ ກໍາລັງຂອງລັດຖະບານ ແລະກໍາລັງຂອງຝ່າຍກະບົດຢູ່
ໃຈກາງນະຄອນຫລວງ Damascus ໃນຕອນເຊົ້າໆ ຂອງວັນດຽວກັນ. ຈໍານວນຜູ້ບາດ ເຈັບຍັງບໍ່ສາມາດໄດ້ຮັບການຢືນຢັນຈາກແຫລ່ງຂ່າວເອກະລາດໄດ້ເທື່ອ.
