ມີລາຍງານຂ່າວວ່າ ກອງກໍາລັງຮັກສາຄວາມປອດໄພຂອງຊີເຣຍໄດ້ສັງຫານພວກ
ປະທ້ວງ ຢ່າງນ້ອຍ 7 ຄົນ ໃນວັນອາທິດວານນີ່ ໃນຂະນະກຸ່ມທີ່ປຶກສາຄະນະນຶ່ງ
ສັນນິບາດຊາດອາຣັບຮຽກຮ້ອງ ໃຫ້ຖອນພວກສັງເກດການອອກໄປຈາກປະເທດ
ດັ່ງກ່າວໂດຍທັນທີ ຍ້ອນວ່າ ໜ່ວຍສັງເກດການຂອງສັນນິບາດ ບໍ່ສາມາດປ້ອງກັນ
ບໍ່ໃຫ້ກອງກຳລັງຂອງລັດຖະບານເຂັ່ນຂ້າພົນລະເຮືອນໄດ້.
ການເສຍຊີວິດ 4 ລາຍ ມີຂື້ນໃນເວລາທີ່ກອງກຳລັງຂອງ ປະທານາທິບໍດີ Bashar
al-Assad ຍິງປືນໃສ່ພວກປະທ້ວງ ໃນ Daria ໃນເຂດນະຄອນຫຼວງ Damascus.
ສ່ວນພວກພົນລະເຮືອນອື່ນໆ ແມ່ນເສຍຊີວິດ ຢູ່ເມືອງ Homs.
ພວກນັກເຄື່ອນໄຫວ ກ່າວວ່າ ໄດ້ມີ 150 ກ່ວາຄົນແລ້ວ ທີ່ຖືກຂ້າຕາຍ ໃນທົ່ວປະ
ເທດ ຫຼັງຈາກທີ່ພວກສັງເກດການໄດ້ເລີ່ມເຂົ້າໄປໃນຊີເຣຍ ເພື່ອປະຕິບັດງານເປັນ
ເວລານື່ງເດືອນຂອງພວກເຂົາເຈົ້າ ໃນເດືອນແລ້ວນີ້.
ສະພາອາຣັບ ທີ່ມີສະມາຊິກ 88 ຄົນຈາກບັນດາປະເທດສະມາຊິກສັນນິບາດຊາດ
ອາຣັບ ໄດ້ກ່າວວ່າ ຄວາມຮຸນແຮງຍັງຈະພາໃຫ້ມີຜູ້ຄົນລົ້ມຕາຍເພິ່ມຂຶ້ນຢູ່ຕໍ່ໄປອີກ
ຮວມທັງພວກເດັກນ້ອຍນໍາ. ປະທານສະພາ ທ່ານ Ali al-Salem al–Dekbas
ໄດ້ກ່າວວ່າ ຄະນະສັງເກດການຄວນຈະຖອນຕົວອອກໃນທັນທີ ຍ້ອນມີຄວາມຮຸນ
ແຮງເກີດຂຶ້ນຢ່າງຕໍ່ເນຶ່ອງນັ້ນ.
ການສະເໜີຂອງສະພາດັ່ງກ່າວນັ້ນ ບໍ່ມີອຳນາດບັງຄັບແຕ່ຢ່າງໃດ ແລະສະພາອາຣັບ
ກໍເປັນອົງການທີ່ປະຕິບັດງານຢ່າງເປັນເອກກະລາດ ຈາກສັນນິບາດຊາດອາຣັບ.
