ຈີນຮຽກຮ້ອງໃຫ້ຊິເຣຍ ເລັ່ງລັດການປະຕິຮູບ ທີ່ໄດ້ໃຫ້ຄໍາໝັ້ນສັນຍາໄວ້ນັ້ນ ອາທິດ
ນຶ່ງຫຼັງຈາກທີ່ໄດ້ຮ່ວມກັບຣັດເຊຍ ໃຊ້ສິດຍັບຍັ້ງຮ່າງຍັດຕິຂອງສະພາຄວາມໝັ້ນຄົງ
ອົງການສະຫະປະຊາຊາດ ທີ່ປະນາມຊິເຣຍໃນການປາບປາມພວກພົນລະເຮືອນ
ທີ່ທໍາການປະທ້ວງນັ້ນ.
ການໃຫ້ຄວາມເຫັນ ຂອງໂຄສົກກະຊວງການຕ່າງປະເທດຈີນ ທ່ານ Liu Weimin
ໃນວັນອັງຄານມື້ນີ້ ແມ່ນມີຂຶ້ນຫຼັງຈາກໄດ້ມີການຮຽກຮ້ອງໃນສັບປະດາແລ້ວໂດຍ
ປະທານາທິບໍດີຣັດເຊຍທ່ານ Dmitry Medvedev ທີ່ທ່ານກ່າວວ່າ ປະທານາທິບໍດີ
ຂອງຊິເຣຍທ່ານ Bashar al-Assad ຈຳເປັນຕ້ອງ ໄດ້ທຳການປະຕິຮູບຫຼືບໍ່ດັ່ງນັ້ນ
ກໍໃຫ້ລາອອກຈາກຕໍາແໜ່ງເສຍ.
ປະເທດທັງສອງໄດ້ໃຊ້ສິດຍັບຍັ້ງຮ່າງຍັດຕິທີ່ທີ່ນຳສະເໜີໂດຍ ຝຣັ່ງ, ອັງກິດ,
ເຢຍຣະມັນແລະ Portugal ທີ່ພາໃຫ້ທາງສະຫະລັດແລະຢູໂຣບມີຄວາມໂກດແຄ້ນນັ້ນ.
ໂດຍທີ່ບໍ່ໄດ້ເອີຍຊື່ຂອງປະເທດທັງສອງ, ລັດຖະມົນຕີການຕ່າງປະເທດສະຫະລັດ
ທ່ານນາງ Hillary Clinton ໄດ້ກ່າວວ່າ ຣັດເຊຍ ແລະຈີນ ຕ້ອງໄດ້ໃຫ້ການອະທິບາຍ
ກ່ຽວກັບການໃຊ້ສິດຍັບຍັ້ງດັ່ງກ່າວຕໍ່ປະຊາຊົນຊາວ ຊິເຣຍ.
ໃນຂະນະດຽວກັນ, ຜູ້ນໍາສູງສຸດຂອງສາສະໜາອິສລາມ ນິກາຍ Sunni ໃນ ຊີເຣຍ
ໄດ້ເຕືອນບັນດາປະເທດຕາເວັນຕົກໃນວັນຈັນວານນີ້ ກ່ຽວກັບການແຊກ ແຊງທາງ
ທະຫານ ໂດຍຂົ່ມຂູ່ວ່າຈະທຳການຕອບໂຕ້ຕໍ່ການໂຈມຕີດ້ວຍລະ ເບີດສະລະຊີບຢູ່ໃນ
ສະຫະລັດແລະຢູໂຣບ ຖ້າປະເທດຊີເຣຍຫາກຖືກໂຈມຕີ.