ພວກທະຫານຊັ້ນຫົວກະທິຊອງຊີເຣຍທີ່ໄດ້ຮັບການໜຸນຫລັງຈາກພວກເຮືອບິນເຮລີຄອບເຕີຕິດອາວຸດປືນແລະລົດຖັງ ໄດ້ເຂົ້າຄວບຄຸມເມືອງ ທີ່ປະຊາຊົນໄດ້ລຸກຮືຂຶ້ນຕໍ່ຕ້ານ ໃນພາກເໜືອຂອງປະເທດນັ້ນແລ້ວ.
ສື່ມວນຊົນແຫ່ງລັດຊີເຣຍກ່າວວ່າ ພວກທະຫານຂອງລັດຖະບານໄດ້ ເຂົ້າໄປໃນເມືອງ Jisr al-Shughour ໃນເຊົ້າວັນອາທິດວານນີ້ ຫລັງຈາກປົດກະນວນວັດຖຸລະເບີດ ທີ່ພວກມືປືນຫ້າງໄວ້ຕາມຖະໜົນແລະ ຂົວແຫ່ງຕ່າງໆນັ້ນ ແລະວ່າ ທະຫານຝ່າຍລັດຖະບານຄົນນຶ່ງແລະພວກມືປືນ 2 ຄົນເສຍຊີວິດໃນການປະທະກັນໃນເຂດອ້ອມແອ້ມຕົວເມືອງ.
ຫລັງຈາກທໍາການລະດົມຍິງໃສ່ໃນເມືອງດັ່ງກ່າວແລ້ວ ພວກລົດຖັງແລະລົດຫຸ້ມເກາະຂະ
ໜາດໜັກກໍໄດ້ແລ່ນເຂົ້າໄປໃນເມືອງດັ່ງກ່າວຈາກສອງດ້ານດ້ວຍກັນ.
ໃນວັນອາທິດວານນີ້ ພວກທະຫານຊີເຣຍໄດ້ກູ້ເອົາສົບພວກກໍາລັງຮັກສາຄວາມປອດໄພ 10 ສົບອອກຈາກຂຸມຝັງສົບໝູ່ໃນເມືອງ Jisr al-Shughour ນັ້ນ. ສື່ມວນຊົນທາງການຂອງຊີເຣຍກ່າວວ່າ ຫົວແລະແຂນຂາຂອງພວກທີ່ເສຍຊີວິດຖືກຕັດ. ຜູ້ສື່ຂ່າວອົງການຂ່າວ AP ທີ່ຕິດຕາມໄປນໍາພວກທະຫານຊີເຣຍ ກ່າວວ່າ ຢ່າງນ້ອຍ 4 ສົບໄດ້ຖືກຕັດຫົວ ຫລືຖືກຂວັນສັບຫົວ.
ລັດຖະບານຊີເຣຍໄດ້ກ່າວຫາພວກແກ໊ງປະກອບອາວຸດໃນເມືອງ Jisr Al-Shughour ວ່າເປັນຜູ້ສັງຫານພວກກໍາລັງຮັກສາຄວາມປອດໄພນັ້ນ. ປະຊາຊົນໃນເມືອງດັ່ງກ່າວເວົ້າວ່າ ພວກທະຫານແລະຕໍາຫລວດບາງຄົນພາກັນໂຕນໜີແລະເຂົ້າຮ່ວມກັບພວກປະທ້ວງ ທີ່ເຂົາເຈົ້າໄດ້ຖືກບັງຄັບໃຫ້ຍິງໃສ່ນັ້ນ. ເມືອງດັ່ງກ່າວໄດ້ຕົກເປັນຈຸດສຸມຂອງການປະຕິບັດງານທາງທະຫານມາເປັນເວລາຫລາຍມື້ແລ້ວ.
ປະເທດເພື່ອນບ້ານ ເທີກີ ຊຶ່ງຕັ້ງຢູ່ຫ່າງຈາກເມືອງ Jisr Shughour ປະມານ 20 ຫລັກກິໂລເເມັດ ໄດ້ໃຫ້ພວກອົບພະຍົບປະມານ 5 ພັນຄົນທີ່ພາກັນຫລັບໜີຈາກການສູ້ລົບກັນນັ້ນ ລີ້ໄພຢູ່ຊົ່ວຄາວ. ພວກຊາວເມືອງກ່າວວ່າ ພວກອົບພະຍົບອີກຫລາຍພັນຄົນ ໄດ້ພາກັນໄປ ຫາບ່ອນລີ້ໄພຊົ່ວຄາວໃນໝູ່ບ້ານແຫ່ງຕ່າງໆຂອງຊີເຣຍ ໃກ້ໆກັບຊາຍແດນນັ້ນ.
