ພວກເຄື່ອນໄຫວເພື່ອສິດທິມະນຸດຊາວຊິເຣຍ ກ່າວວ່າ ກອງກໍາລັງຮັກສາຄວາມປອດໄພ
ຂອງລັດຖະບານ ໄດ້ສັງຫານ 7 ຄົນ ຫຼັງຈາກໄດ້ຍິງປືນເຂົ້າໃສ່ພວກປະທ້ວງ ໃນວັນພັກ
ມື້ທໍາອິດ ເພື່ອສະເຫຼີມສະຫຼອງການສິ້ນສຸດຂອງເດືອນສັກສິດ Ramadan ຂອງສາສະໜາ
ອິສລາມນັ້ນ.
ຄະນະກຳມະການປະສານງານໃນເຂດທ້ອງຖິ່ນ ກ່າວວ່າ ທະຫານລັດຖະ ບານໄດ້ສັງຫານ
7 ຄົນ ທີ່ al-Harra ແລະ Inkhit ໃນພາກໃຕ້ຂອງປະເທດ ແລະອີກຄົນນຶ່ງທີ່ເມືອງ Homs ໃນພາກກາງຂອງປະເທດ ຫຼັງຈາກ ທີ່ໄດ້ມີການສວດມົນພາວະນາ ໃນຕອນເຊົ້າຂອງ
ວັນອັງຄານມື້ນີ້ ເພື່ອເປັນຂີດ ໝາຍຂອງການສິ້ນສຸດລົງຂອງບຸນ Eid al-Fitr ນັ້ນ.
ການປາບປາມພວກຕໍ່ຕ້ານລັດຖະບານທີ່ຍັງດໍາເນີນຢູ່ຕໍ່ມາ ມີຂຶ້ນນຶ່ງມື້ຫຼັງຈາກພວກນັກ
ເຄື່ອນໄຫວກ່າວວ່າ ກອງກໍາລັງຮັກສາຄວາມປອດໄພ ໄດ້ສັງ ຫານ 6 ຄົນ ໃນຂະນະທີ່
ບຸກເຂົ້າໄປໃນຫຼາຍໆເຂດທົ່ວປະເທດ.
ກຸ່ມສັງເກດການສິດທິມະນຸດໃນຊີເຣຍໄດ້ກ່າວໃນວັນຈັນວານນີ້ວ່າ ການປະຫັດປະຫານ
ທີ່ຮ້າຍແຮງສຸດແມ່ນມີຂຶ້ນຢູ່ເມືອງ Sarameen ໃນແຂວງ Idlib ທາງພາກເໜືອປະເທດ.
ກຸ່ມດັ່ງກ່າວເວົ້າວ່າ ກອງກໍາລັງຮັກສາຄວາມປອດໄພ ໄດ້ສັງຫານ 5 ຄົນຢູ່ທີ່ນັ້ນແລະມີ
ອີກຢ່າງນ້ອຍ 60 ຄົນໄດ້ຮັບບາດເຈັບ ຂະນະທີ່ພວກເຂົາເຈົ້າຍິງປືນເຂົ້າໃສ່ໃນລະຫວ່າງ
ການປະຕິບັດງານຊອກຫາແລະຈັບກຸມຜູ້ຄົນນັ້ນ.
