ພວກເຄື່ອນໄຫວເພື່ອປະຊາທິປະໄຕຊາວຊິເຣຍກ່າວວ່າ ກອງກໍາລັງຮັກສາຄວາມປອດໄພ
ຂອງລັດຖະບານ ໄດ້ເຂົ້າອ້ອມເມືອງນຶ່ງທາງພາກກາງຂອງປະເທດ ທີ່ເປັນບ່ອນປະທ້ວງ
ຫລາຍໆບັ້ນຂອງພວກທີ່ຕໍ່ຕ້ານ ປະທານາທິບໍດີ Bashar al-Assad ນັ້ນ.
ພວກເຄື່ອນໄຫວກ່າວວ່າ ທະຫານຊີເຣຍທີ່ປິດລ້ອມເມືອງ Rastan ໄດ້ຍິງປືນກົນສຸມໃສ
ໃນວັນຈັນມື້ນີ້ ໃນການສືບຕໍ່ກວາດລ້າງປາບປາມການລຸກຮືຂຶ້ນ ເພື່ອປະຊາທິປະໄຕ
ທີ່ດໍາເນີນມາໄດ້ 5 ເດືອນແລ້ວນັ້ນ. ເມືອງ Rastan ຕັ້ງຢູ່ປະມານ 20 ຫຼັກກິໂລເມດ
ຫ່າງຈາກເມືອງ Homs ໄປທາງທິດເໜືອ ບົນທາງຫລວງ ທີ່ເນ່ງໄປຫາເມືອງ
Hama ຈຸດເລີ້ມຕົ້ນຂອງການລຸກຮືຂຶ້ນນັ້ນ.
ການດໍາເນີນງານດັ່ງກ່າວມີຂຶ້ນ ນຶ່ງມື້ຫຼັງຈາກຊາວເຣຍບໍ່ຍອມຮັບເອົາຄໍາຮຽກຮ້ອງ
ຂອງສັນນິບາດອາຫຣັບ ທີ່ຂໍໃຫ້ຢຸດເຊົາການກໍ່ຄວາມຮຸນແຮງທີ່ໄດ້ສັ່ນສະເທືອນທົ່ວ
ປະເທດນັ້ນ. ສັນນິບາດອາຫຣັບທີ່ມີສະມາຊິກ 22 ປະເທດ ຊຶ່ງຮວມທັງຊິເຣຍດ້ວຍນັ້ນ
ໄດ້ຮຽກຮ້ອງໃນວັນອາທິດວານນີ້ ໃຫ້ຊິເຣຍຢຸດເຊົາການນອງເລືອດເສຍກ່ອນ ທີ່ມັນ
ຈະສາຍເກີນໄປ.
ອົງການສະຫະປະຊາຊາດໄດ້ກ່າວວ່າ ໄດ້ມີ ຫຼາຍກວ່າ 2,200 ຄົນ ຖືກຂ້າ ນັບຕັ້ງແຕ່
ເດືອນ ມີນາເປັນຕົ້ນມາ ເວລາປະຊາຊົນເລີ່ມພາກັນອອກມາປະ ທ້ວງ ຮຽກຮ້ອງໃຫ້ມີ
ການປະຕິຮູບ ແລະຍຸດຕິການປົກຄອງແບບຜະເດັດການມາເປັນເວລາ 11 ປີຂອງທ່ານ
Assad ນັ້ນ.
ລັດຖະບານຊິເຣຍໄດ້ປະນາມການຮຸນແຮງດັ່ງກ່າວນີ້ໃສ່ ອັນທີ່ເອີ້ນວ່າ ກຸ່ມແກ໊ງອັນຕະ
ພານແລະພວກກໍ່ການຮ້າຍ ທີ່ໄດ້ຮັບການໜູນຫລັງຈາກພວກສົມຮູ້ຮ່ວມຄິດຊາວຕ່າງຊາດ.
