Saudi Arabia ໄດ້ຮຽກໂຕເອກອັກຄະລັດຖະທູດຂອງຕົນປະຈໍາຊີເຣຍ ກັບຄືນປະເທດ ໃນຂະນະທີ່ປະຊາຄົມນາໆຊາດ ເພິ່ມການກົດດັນໃຫ້ລັດຖະບານຊີເຣຍ ຍຸດຕິການກວາດ ລ້າງປາບປາມພວກປະທ້ວງຂອງຝ່າຍຄ້ານນັ້ນ.
ກະສັດ Abdullah ແຫ່ງ Saudi Arabia ໄດ້ອອກຖະແຫລງການ ໃນວັນຈັນມື້ນີ້ ຮຽກ ຮ້ອງໃຫ້ຊີເຣຍຍຸດເຊົາການນອງເລືອດນັ້ນເສຍ. ພະອົງຊົງກ່າວວ່າ ສະຖານນະການຢູ່ໃນຊີເຣຍນັ້ນ ແມ່ນບໍ່ສອດຄ່ອງກັນກັບສາສະໜາ ຄ່ານິຍົມ ແລະທໍານອງຄອງທໍາຂອງຂົງເຂດ. ຖະແຫລງການຂອງກະສັດ Abdullah ແມ່ນຕິດຕາມມາຫຼັງຖະແຫລງການຂອງສັນນິບາດ ອາຣັບ ແລະສະພາຮ່ວມມືເຂດອ່າວເປີເຊຍ ທີ່ປະກອບດ້ວຍ 6 ປະເທດ ຮວມທັງ Saudi Arabia ນໍານັ້ນ. ກ່ອນໜ້ານີ້ ພວກຜູ້ນໍາອາຣັບ ແມ່ນໄດ້ມິດງຽບຢູ່ເປັນສ່ວນໃຫຍ່.
ໃນຂະນະດຽວກັນ ບັນດານັກເຄື່ອນໄຫວຊິເຣຍ ກ່າວວ່າ ການລະດົມຍິງດ້ວຍປືນໃຫຍ່ ຂອງຝ່າຍລັດຖະບານ ດໍາເນີນຕໍ່ໄປອີກໃນວັນຈັນມື້ນີ້ ຕໍ່ເມືອງ Deir el-Zour ທາງພາກຕະເວັນອອກຂອງປະເທດ ບ່ອນທີ່ກອງຮັກສາຄວາມປອດໄພ ທີ່ໄດ້ຮັບການໜູນຫຼັງໂດຍລົດຫຸ້ມເກາະ ໄດ້ທໍາການໂຈມຕີມາຕັ້ງແຕ່ວັນອາທິດວານນີ້.
ພວກກຸ່ມສິດທິມະນຸດກ່າວວ່າ ມີຢ່າງນ້ອຍ 42 ຄົນເສຍຊີວິດ ຢູ່ໃນເມືອງດັ່ງກ່າວໃນວັນ ອາທິດວານນີ້. ພວກນັກເຄື່ອນໄຫວກ່າວອີກວ່າ ກອງກໍລັງທະຫານຊິເຣຍ ຍັງໄດ້ເຄື່ອນ ເຂົ້າ ໂຈມຕີເມືອງ Maaret-al-Numan ໃນແຂວງ Idlib ທາງພາກເໜືອ ຂອງຊີເຣຍໃນວັນຈັນມື້ນີ້ ແລະຂັດຂວາງບໍ່ໃຫ້ປະຊາຊົນ ເຂົ້າແລະອອກ ເຂດເມືອງດັ່ງກ່າວ.
ປະທານາທິບໍດີ ທ່ານ Bashar al-Assad ໄດ້ກ່າວປ້ອງກັນການກວາດລ້າງຢ່າງຮຸນແຮງຂອງທ່ານໃນັວນອາທິດວານນີ້ ໂດຍກ່າວວ່າ ມັນເປັນໜ້າທີ່ຂອງປະເທດຊາດທີ່ຈະຕ້ອງຮັບມືກັບ ອັນທີ່ທ່ານເອີ້ນວ່າ ພວກ ນອກກົດໝາຍ ທີ່ໄດ້ທໍາລາຍຖະໜົນຫົນທາງແລະເຂັນຂ້າປະຊາຊົນນັ້ນ ຊຶ່ງທ່ານໄດ້ກ່າວເຊ່ນນັ້ນໃນການພົບປະກັບລັດຖະມົນຕີການຕ່າງປະເທດຂອງ Lebanon ທີ່ໄປຢ້ຽມຢາມຊີເຣຍ. ທ່ານ Assad ຍັງກ່າວອີກວ່າ ຊິເຣຍກໍາລັງຢູ່ບົນ ເສັ້ນທາງຂອງການປະຕິຮູບ.
