ພວກນັກເຄຶ່ອນໄຫວຝ່າຍຄ້ານຂອງຊີເຣຍກ່າວວ່າ ພວກທະຫານທີ່ໂຕນໜີໄດ້ທໍາການໂຈມ
ຕີຄ້າຍທະຫານແຫ່ງນຶງຢູ່ໃກ້ເມືອງຫລວງດາມັສກັສ ໃນອັນທີ່ເປັນການເພີ່ມທະວີຂຶ້ນໃນ
ການລຸກຮືຕໍ່ຕ້ານລັດຖະບານຜະເດັດການຂອງປະທານາທິບໍດີຊີເຣຍ Bashir al-Assad.
ພວກນັກເຄຶ່ອນໄຫວກ່າວວ່າ ພວກກະບົດຂອງກອງທັບປົດປ່ອຍຊີເຣຍ ໄດ້ຍິງລູກສອນໄຟ
ແລະປືນກົນໃສ່ອາຄານສືບລັບກອງທັບອາກາດໃນເຂດ Harasta ຊານເມືອງຫລວງດາມັສ
ກັສ ໃນຕອນເຊົ້າວັນພຸດມື້ນີ້.
ບໍ່ມີການຢືນຢັນໃດໆ ຈາກສື່ອິດສະຫລະກ່ຽວກັບການໂຈມຕີຂອງພວກກະ ບົດ ຫລືມີຂໍ້ມູນ
ກ່ຽວກັບຜູ້ບາດເຈັບລົ້ມຕາຍ. ພວກກະບົດໄດ້ທໍາການສູ້ລົບຢ່າງນອງເລືອດຫລາຍຂຶ້ນນັບມື້ ກັບກອງທັບຂອງລັດຖະບານໃນອາທິດຜ່ານມານີ້. ແຕ່ການປະເຊີນໜ້າກັນ ແມ່ນໄດ້ສຸມຢູ່ໃນເຂດອື່ນໆຂອງຊີເຣຍ ໂຮມທັງຂົງເຂດ Idlib ກໍ້າຕາເວັນຕົກສຽງເໜືອຂອງປະເທດ ເຂດເມືອງ Homs ໃນພາກກາງ ແລະເມືອງ Daraa ທາງພາກໃຕ້ຂອງປະເທດນັ້ນ.
ການລຸກຮືຕໍ່ຕ້ານລັດຖະບານໃນຊີເຣຍ ໄດ້ເລິ່ມຕົ້ນຂຶ້ນໃນເດືອນມີນາຜ່ານມາ ໂດຍການປະທ້ວງຕາມຖະໜົນຫົນທາງຕໍ່ຕ້ານການປົກຄອງແບບຜະເດັດການມາເປັນ 11 ປີຂອງທ່ານອັສຊັດ ແລະພວກນັກເຄຶ່ອນໄຫວຝ່າຍຄ້ານໄດ້ສືບຕໍ່ໂຮມຊຸມນຸມກັນຫລາຍໆບັ້ນນັບຕັ້ງແຕ່ນັ້ນມາ ເຖິງແມ່ນກໍາ ລັງຮັກສາຄວາມປອດໄພຊີເຣຍຈະໃຊ້ອາວຸດປະຫັດປະຫານເຖິງຕາຍເພື່ອຍຸຕິການລຸກຮືດັ່ງກ່າວຢູ່ເລື້ອຍໆນັ້ນກໍຕາມ.
ເວລານີ້ທ່ານ ອາຊັດ ປະເຊີນກັບການຖືກໂດດດ່ຽວໃນຂົງເຂດ ໃນຂະນະທີ່ຄະນະລັດຖະມົນຕີຕ່າງປະເທດແລະກຸ່ມປະເທດອາຫລັບແລະເທີກີ ຕຽມພົບປະກັນໃນວັນພຸດມື້ນີ້ຢູ່ທີ່ນະຄອນຫລວງຂອງມໍຣອກໂກ ເພື່ອປຶກສາ ຫາລືກັນລົງໂທດລັດຖະບານຊີເຣຍເພີ່ມຕື່ມ ທີ່ບໍ່ຍອມຍຸຕິການກວາດລ້າງນັ້ນ. ຂະນະນີ້ພວກນັກການທູດລະດັບສູງຂອງສັນນິບາດຊາດອາຫລັບ ກໍາລັງທໍາການເຈລະຈາກັນທີ່ນະຄອນຫລວງ Rabat ປະເທດ Morocco ຢູນອກກອງປະຊຸມສະພາການຮ່ວມມື Arab-Turkish ທີ່ມີ ທ່ານ Ahmet Davutoglu ລັດຖະມົນຕີຕ່າງປະເທດເທີກີ ເຂົ້າຮ່ວມນໍານັ້ນ.
ເບິ່ງວິດີໂອ ລາຍງານຂ່າວທີ່ກ່ຽວຂ້ອງກັນ ເປັນພາສາອັງກິດ