ລິ້ງ ສຳຫລັບເຂົ້າຫາ

ສັນນິບາດຊາດອາຫຣັບ ປະຊຸມກັນ ກ່ຽວກັບ ການລົງໂທດຊີເຣຍ

  • ທອງປານ ເທບວົງສາ

ພວກປະທ້ວງຊາວຊີເຣຍຍັງທໍາການປະທ້ວງຕໍ່ຕ້ານລັດຖະບານຂອງທ່ານ Bashar al-Assad ຢູ່ຢ່າງບໍ່ລົດລະ

ບັນດາລັດ​ຖະມົນຕີ​ຕ່າງປະ​ເທດແຫ່ງ​ສັນນິບາ​ດຊາດ​ອາ​ຫຣັບ ກໍາລັງ​ປະຊຸມ​ກັນ​ທີ່ນະຄອນ
ຫລວງ​ໄຄ​ໂຣ ​ປະ​ເທດ​ອີ​ຈິບ ​ໃນ​ວັນ​ອາທິດ​ມື້​ນີ້ ​ເພື່ອ​ຕັດສິນໃຈ​ວ່າ ຈະລົງ​ໂທດ​ຊີ​ເຣຍຫລື​ບໍ່
ຍ້ອນການ​ກວາດ​ລ້າງ​ຢ່າງ​ນອງ​ເລືອດ​ຂອງ​ລັດຖະບານ​ຊີ​ເຣຍຕໍ່​ການ​ລຸກ​ຮືຂຶ້ນຂອງ​ພວກ​ປະ​
ທ້ວງ​ຝ່າຍ​ຄ້ານ​ນັ້ນ.

ພວກ​ນັກ​ການ​ທູດ​ລະດັບ​ສູງ​ສຸດຈາກ​ສັນນິບາດ​ຊາດ​ອາຫຣັບ ທີ່​ມີ​ສະມາຊິກ 22 ປະ​ເທດ
ນັ້ນ ກໍາລັງ​ທໍາ​ການ​ພິດ​ຈາລະ​ນາ​ມາດຕະ​ການ​ລົງ​ໂທດ​ຫລາຍໆ​ຢ່າງ ທີ່​ສະ​ເໜີ​ຂຶ້ນ​ໃນວັນ
ເສົາ​ວານ​ນີ້ໂດຍຄະນະ​ລັດຖະມົນຕີ​ການ​ເງິນ​ຂອງ​ສັນນິບາດ. ຂໍ້ສະ​ເໜີ​ດັ່ງກ່າວ​ມີ​ໂຮມ​ທັງ
ການ​ກັກ​ຊັບ​ສິນ​ທັງ​ໝົດ​ຂອງ​ປະທານາທິບໍດີຊີ​ເຣຍ ທ່ານ Bashar al-Assad ​ແລະ​ພວກ
ລູກ​ນ້ອງໃກ້​ຊິດ​ຂອງ​ທ່ານ ແລະຫ້າມ​ບໍ່​ໃຫ້​ໄປ​ຢ້ຽມຢາມ​ພວກ​ປະ​ເທດ​ສະມາຊິກ​ສັນ​ນິ​ບາດ
ຢຸດ​ຖ້ຽວ​ບິນ​ພານິດ​ຕ່າງໆ​ໄປ​ຍັງ​ຊີ​ເຣຍ ​ແລະ​ໂຈະ​ການ​ຮ່ວມ​ມື​ກັບ​ທະນາຄານ​ກາງຂອງ
ຊີ​ເຣຍ.

ການ​ຮັບຮອງ​ເອົາມາດ​ຕະການເຫລົ່ານີ້ ​ແມ່ນ​ຈະ​ສົ່ງ​ຜົນ​ກະທົບ​ອັນ​ໃຫຍ່​ຫລວງ​ຕໍ່​ຊີ​ເຣຍ
ຊຶ່ງເປັນ​ປະ​ເທດ​ທີ່​ພູມ​ໃຈ​ຕົນ​ເອງວ່າ​ເປັນ​ແຫ​ລ່ງ​ແຫ່ງ​ຊາດ ​ນິຍົມ​ອາຫຣັບ​ມາ​ເປັນ​ເວລາ​ດົນ
ນານນັ້ນ. ນອກ​ນີ້​ແລ້ວ ການ​ລົງ​ໂທດ​ຂອງ​ສັນ​ນິບາດ​ຊາດອາຫຣັບຍັງ​ຈະເພີ່ມ​ຄວາມ​ກົດ
ດັນ​ຕື່ມ​ໃສ່​ເສດຖະກິດ​ຊີ​ເຣຍ ທີ່​ໄດ້​ຖືກ​ກະທົບ​ຍ້ອນ​ຄວາມ​ບໍ່​ສະຫງົບ​ຕໍ່ຕ້ານ​ລັດຖະບານ​ມາ
ໄດ້ແປດ​ເດືອນ​ແລ້ວນັ້ນ ​ບວກ​ກັບການ​ລົງ​ໂທດ​ຕໍ່ການ​ສົ່ງ​ອອກ​ນໍ້າມັນ​ແລະ​ຜະລິດ​ຕະພັນ
ອື່ນໆ​ຂອງ​ຊີ​ເຣຍ ​ໂດຍ​ສະຫະລັດ ​ແລະ​ສະຫະພາບ​ຢູ​ໂຣບນັ້ນ​ນໍາ.

ພວກ​ເຈົ້າໜ້າ​ທີ່​ຊາດ​ອາຫຣັບສະ​ເໜີ​ໃຫ້​ລົງ​ໂທດ​ຫລັງ​ຈາກ​ຊີ​ເຣຍປະຕິ​ເສດ ​ບໍ່ຮັບ​ເອົາ​ມື້ເສັ້ນ
ຕາຍ​ຄື​ເມື່ອ​ວັນ​ສຸກ​ຜ່ານ​ມາ ​ສໍາລັບໃຫ້​ຊີ​ເຣຍ​ອະນຸຍາດ​ໃຫ້​ພວກນັກ​ສັງ​ເກດ​ການ​ຂອງສັນ
ນິບາດ​ເຂົ້າ​ໄປ​ໃນ​ຊີ​ເຣຍ ​ເພື່ອ​ຕິດຕາມ​ເບິ່ງ ການ​ຕອບ​ໂຕ້​ຂອງ​ລັດຖະບານ​ຕໍ່​ການ​ລຸກ​ຮື​ຂຶ້ນ
ນັ້ນ ​ແຕ່​ກົງກັນຂ້າມ ຊີ​ເຣຍ ​ກັບໄດ້​ຮ້ອງ​ຂໍ​ໃຫ້​ສັນນິບາດ​ໃຫ້ຄວາມ​ແຈ່ມ​ແຈ້ງ ​ກ່ຽວ​ກັບພາ
ລະກິດ​ຂອງ​ພວກ​ນັກ​ສັງ​ເກດການ.

ພວກ​ນັກ​ເຄຶ່ອນ​ໄຫວ​ດ້ານ​ສິດທິ​ຊີ​ເຣຍກ່າວ​ວ່າ ກໍາລັງ​ຮັກສາ​ຄວາມ​ປອດ​ໄພ ຊີ​ເຣຍ ​ໄດ້​ສັງ
ຫານ​ພົນລະ​ເຮືອນ​ຢ່າ​ງໜ້ອຍ 27 ຄົນ ​ໃນ​ການ​ກວາດ​ລ້າງເຂດ​ສູນ​ກາງ​ປະ​ທ້ວງ​ແຫ່ງ
ຕ່າງໆ​ເມື່ອ​ວັນ​ເສົາ​ຜ່ານ​ມາ ຊຶ່ງການເສຍ​ຊີວິດ​ສ່ວນ​ຫລາຍ​ແມ່ນ​ຢູ່​ໃນ​ແຂວງ ​ໂຮມ​ສ໌ ທາງ​
ພາກ​ກາງຂອງ​ປະເທດ. ທາງອົງ ການຂ່າວ​ລັດ SANA ​ຂອງ​ຊີ​ເຣຍ ກໍເວົ້າວ່າ ພວກ​ກໍາ​ລັງ
ຮັກສາ​ຄວາມ​ປອດ​ໄພ 25 ຄົນ ຖືກນໍາ​ໄປ​ຝັງໃນວັນ​ເສົາ​ຜ່ານ​ວານ​ນີ້ ຫລັງ​ຈາກ​ຖືກຂ້າ​ຕາຍ​
ໂດຍ​ພວກ​ທີ່​ເອີ້ນ​ວ່າ ພວກ​ກໍ່​ການ​ຮ້າຍ​ປະກອບ​ອາວຸດ ​ໃນ​ເຂດ​ຊົນນະ ​ບົດ​ຂອງ​ນະຄອນ
ຫລວງ​ດາ​ມັສກັສ ​ແລະ​ເຂດແຂວງ ​ໂຮມສ໌ ​ແລະ Hana.

XS
SM
MD
LG