ລິ້ງ ສຳຫລັບເຂົ້າຫາ

ວັນສຸກ, ໒໙ ມີນາ ໒໐໒໔

ປະທານາທິບໍດີຊີເຣຍ ກ່າວວ່າ ບໍ່ມີຄໍາສັ່ງ ໃຫ້ຍິງ ພວກພົນລະເຮືອນ


ປະທານາທິບໍດີ Bashar al-Assad ແຫ່ງຊີເຣຍ ກ່າວຄໍາປາໄສທີ່ມະຫາວິທະຍາໄລ ເາມັສກັສ.
ວັນທີ 10 ມັງກອນ 2012.
ປະທານາທິບໍດີ Bashar al-Assad ແຫ່ງຊີເຣຍ ກ່າວຄໍາປາໄສທີ່ມະຫາວິທະຍາໄລ ເາມັສກັສ. ວັນທີ 10 ມັງກອນ 2012.

ປະທານາທິບໍດີ Bashar al-Assad ​ແຫ່ງ​ຊີ​ເຣຍກ່າວ​ວ່າ ບໍ່​ໄດ້​ມີ​ຄໍາ​ສັ່ງ​ໃຫ້​ພວກ​ກໍາລັງ​ຮັກສາ​ຄວາມ​ປອດ​ໄພ​ຂອງ​ລັດຖະບານ​ຍິງ​ປືນ​ໃສ່​ພວກ​ພົນ​ລະ​ເຮືອນ ​ແລະ​ທ່ານ​ຖິ້ມ​ໂທດ​ໃສ່​ແຜນການຮວມຫົວ​ກັນ​ຂອງ​ຕ່າງປະ​ເທດ ທີ່​ພາ​ໃຫ້​ມີ​ການ​ລຸກ​ຮື​ຂຶ້ນ​ຕໍ່ຕ້ານ​ລັດຖະບານ​ມາ​ໄດ້ 10 ​ເດືອນ​ໃນ​ຊີ​ເຣຍນັ້ນ.

ໃນ​ຄໍາ​ປາ​ໄສຍາ​ວ 100 ນາທີ​ໃນ​ວັນ​ອັງຄານ​ມື້​ນີ້​ທີ່​ນະຄອນຫລວງ ດາມັສກັສ ທ່ານ Assad ກ່າວ​ວ່າ ການ​ຟື້ນ​ຟູ​ຄວາມ​ສະຫງົບ​ຂຶ້ນຄືນໃນ​ຊີ​ເຣຍ​ເປັນ​ເລື້ອງ​ບູລິ​ມະ​ສິດ ​ແລະ​ສາມາດ​ບັນລຸ​ຄວາມ​ສໍາ​ເລັດ​ໄດ້ໂດຍ​ທໍາ​ການ​ຕອບ​ໂຕ້​ຕໍ່​ພວກ​ກໍ່​ການ​ຮ້າຍ​ດ້ວຍ​ອໍານາດ​ທີ່​ເດັດຂາດ. ທ່ານ Assad ​ໄດ້​ກ່າວ​ຍ້ອງຍໍ​ການ​ປະຕິບັດ​ງານ​ຂອງ​ພວກ​ກໍາລັງ​ຮັກສາ​ຄວາມ​ປອດ​ໄພ​ຂອງ​ຊີ​ເຣຍນັ້ນ.

ລັດຖະບານ​ຊີ​ເຣຍກ່າວ​ຫາ​ພວກ​ກໍ່​ການ​ຮ້າຍ​ທີ່​ປະກອບ​ອາວຸດ​ວ່າ​ເປັນຜູ້​ຊຸກຍູ້​ໃຫ້​ທໍາ​ການ​ຕໍ່ຕ້ານ​ອໍານາດ​ປົກຄອງ​ແບບ​ຜະ​ເດັດ​ການ​ຂອງ​ທ່ານ Assad ມາ​ໄດ້ 11 ປີ​ນັ້ນ.

ປະທານາທິບໍດີ​ທີ່​ກໍາລັງ​ປະ​ເຊີນ​ກັບ​ບັນຫາ​ຂອງ​ຊີ​ເຣຍກ່າວ​ໃນ​ວັນ​ອັງຄານ​ມື້​ນີ້​ວ່າ ທ່ານ​ຈະລາ​ອອກ​ຈາກ​ຕໍາ​ແໜ່​ງຂອງ​ທ່ານ​ຕາມ​ເຈດ​ຕະນາ​ຂອງ​ປະຊາຊົນເທົ່າ​ນັ້ນ.

ທ່ານ Assad ​ໃຫ້​ຄໍາໝັ້ນ​ສັນຍາ​ວ່າ ຈະ​ປະ​ໃຫ້​ປະຊາຊົນ​ຊີ​ເຣຍລົງມະຕິ​ກ່ຽວ​ກັບ​ກົດໝາຍ​ລັດຖະທໍາ​ມະນູນ​ສະບັບ​ໃໝ່​ໃນ​ການ​ລົງ​ປະຊາມະຕິ​ໃນ​ເດືອນ​ມີ​ນາປີ​ນີ້ ຫລັງ​ຈາກ​ນັ້ນ​ກໍ​ຈະ​ມີ​ການ​ເລືອກ​ຕັ້ງ​ເອົາ​ສະມາຊິກ​ລັດຖະສະພາ.

ນອກ​ນັ້ນ​ທ່ານ Assad ຍັງ​ກ່າວ​ເຊ່ນ​ກັນ​ວ່າ ທ່ານ​ຈະ​ບໍ່​ປະຕິ​ເສດໃນການ​ແກ້​ໄຂ​ໃດໆ​ຂອງ​ກຸ່ມ​ອາຣັບຕໍ່​ວິ​ກິດ​ການ​ໃນ​ຊີ​ເຣຍ ຕາບ​ໃດ​ທີ່​ມີການ​ເຄົາລົບ​ນັບຖື​ອະທິປະ​ໄຕ​ຂອງ​ຊີ​ເຣຍ.

ທ່ານ Assad ​ໄດ້​ກ່າວ​ຕໍາ​ໜິຕິຕຽນ​ສື່​ມວນ​ຊົນ​ລະຫວ່າງ​ຊາດ​ວ່າ ດໍາ​ເນີນ​ການ​ຕໍ່ຕ້ານ​ຊີ​ເຣຍ ​ແລະ​ກ່າວ​ຕໍາ​ໜິຕິຕຽນ​ສັນນິບາດ​ຊາດ​ອາຣັບ​ເຊ່ນ​ກັນ ຊຶ່ງ​ໄດ້​ງົດ​ການ​ເປັນ​ສະມາຊິກ​ຂອງ​ຊີ​ເຣຍ​ໃນ​ສັນນິບາດ​ດັ່ງກ່າວໃນ​ເດືອນ​ພະຈິກ​ຜ່ານ​ມາ​ນັ້ນ.

ຄໍາ​ປາ​ໄສ​ຂອງ​ທ່ານ Assad ມີ​ຂຶ້ນ​ທ່າມກາງ​ທີ່​ພວກ​ນັກ​ສັງ​ເກດການ​ຂອງສັນນິບາດ​ຊາດ​ອາຣັບທີ​ມນຶ່ງ​ສືບ​ຕໍ່​ດໍາ​ເນີນ​ພາລະກິດ​ຂອງ​ຕົນ​ເພື່ອ​ສັງ​ເກດເບິ່ງການ​ຈັດ​ຕັ້ງ​ປະຕິບັດຂອງ​ຊີ​ເຣຍ ຕາມ​ແຜນການ​ເພື່ອ​ຍຸດຕິ​ຄວາມ​ຮຸນ​ແຮງ​ຕໍ່​ພວກ​ປະ​ທ້ວງ​ຕໍ່ຕ້ານ​ລັດຖະບານ​ນັ້ນ.

XS
SM
MD
LG