ບັນດານັກເຄື່ອນໄຫວຊີເຣຍແຈ້ງໃຫ້ຊາບກ່ຽວກັບການໂຈມຕີຂອງພວກທະຫານໃນ 2 ຫົວເມືອງ ແລະບໍ່ມີການຖອນທະຫານຂະໜາດໃຫຍ່ທີ່ສຳຄັນໃດໆໃນວັນອັງຄານມື້ນີ້ ຊຶ່ງເປັນມື້ທີ່ລັດຖະບານຊີເຣຍອ້າງວ່າ ພວກກໍາລັງຂອງຕົນໄດ້ເລີ້ມອອກຈາກບາງຫົວເມືອງແລ້ວ ເພື່ອປະຕິບັດຕາມຂໍ້ຕົກລົງຢຸດຍິງທີ່ໄກ່ເກ່ຍໂດຍສະຫະປະຊາຊາດນັ້ນ.
ກຸ່ມປົກປ້ອງສິດທິມະນຸດ Syrian Observatory ທີ່ມີຫ້ອງການປະຕິບັດງານຢູ່ໃນກຸງລອນດອນ ກ່າວວ່າ ກໍາລັງຂອງຝ່າຍລັດຖະບານໄດ້ຍິງປືນໃຫຍ່ໃສ່ເມືອງຮາມາ ໃນພາກກາງຂອງປະເທດ ແລະໃສ່ເມືອງ Mareh ໃນພາກຕາເວັນຕົກສຽງເໜືອ ໃນຂະນະດຽວກັນກໍໄດ້ມີການຍິງປືນຄົກໃສ່ເມືອງ Homs ນັ້ນ. ກຸ່ມປົກປ້ອງສິດທິມະນຸດດັ່ງກ່າວ ຍັງເວົ້າເຊ່ນກັນວ່າ ພວກກະບົດໄດ້ສັງຫານພວກທະຫານ 6 ຄົນໃນການໂຈມຕີທີ່ດ່ານກວດກາ 2 ແຫ່ງໃກ້ໆກັບເມືອງ Marqada ໃນທະເລຊາຍທີ່ຢູ່ສອກຫຼີກຫ່າງໄກທາງໃຕ້ຂອງຊາຍແດນເທີກີນັ້ນ.
ທີ່ກຸງມອສກູ ທ່ານ Walid al-Moallem ລັດຖະມົນຕີຕ່າງປະເທດຊີເຣຍ ກ່າວວ່າ ກຸງດາມັສກັສໄດ້ເລີ້ມປະຕິບັດຕາມແຜນການເພື່ອຍຸດຕິຄວາມຮຸນແຮງຂອງທ່ານໂກຟີອັນນັນ ທູດພິເສດສະຫະປະຊາຊາດ ແລະສັນນີບາດອາຣັບນັ້ນ ແຕ່ປາກົດວ່າ ທ່ານໄດ້ຍົກເລື້ອງຄໍາຂໍຮ້ອງໃໝ່ຂຶ້ນມາ ໂດຍກ່າວວ່າ ການຢຸດຍິງຈະຕ້ອງເລີ້ມຂຶ້ນໄປພ້ອມໆກັນກັບການສົ່ງຄະນະຜູ້ສັງເກດການນາໆຊາດໄປຍັງຊິເຣຍນັ້ນ.
ສ່ວນທ່ານ Sergei Lavrov ລັດຖະມົນຕີການຕ່າງປະເທດຣັດເຊຍ ຊຶ່ງເປັນຄູ່ຕຳແໜ່ງ ຂອງທ່ານ Moallem ກ່າວວ່າ ລັດຖະບານຊີເຣຍ ຄວນຈະໄດ້ຕັດສິນໃຈຢ່າງເດັດດ່ຽວມາກ່ອນ ໃນການຈັດຕັ້ງປະຕິບັດຕາມແຜນ ການສັນຕິພາບນັ້ນ ແລະທ່ານໄດ້ຮຽກຮ້ອງໃຫ້ພວກກໍາລັງຝ່າຍຄ້ານຢຸດຄວາມຮຸນແຮງເຊ່ນກັນ. ຣັດເຊຍ ໄດ້ເປັນນຶ່ງໃນບັນດາມະຫາອໍານາດຈຳ ນວນບໍ່ເທົ່າໃດປະເທດຂອງໂລກທີ່ໄດ້ສະເໜີໃຫ້ຄວາມສະໜັບສະໜຸນບາງຢ່າງແກ່ທ່ານອັສສັສ ໃນການປະເຊີນໜ້າກັນຢ່າງນອງເລືອດກັບພວກປະທ້ວງນັ້ນ.
ໃນຂະນະດຽວກັນ ທ່ານອັນນັນເດີນທາງໄປຮອດເທີກີແລ້ວ ແລະກໍາລັງ ເດີນທາງໄປຍັງເຂດຊາຍແດນຕິດກັບຊີເຣຍບ່ອນທີ່ທ່ານຈະທໍາການຢ້ຽມຢາມຄ້າຍອົບພະຍົບແຫ່ງນຶ່ງ ທີ່ຢູ່ພາຍໃຕ້ຄວາມອຸບປະຖໍາຂອງເທີກີບ່ອນ
ທີ່ກໍາລັງຂອງຊີເຣຍ ຍິງຂ້າມຊາຍແດນເຂົ້າມາໃສ່ ຊຶ່ງໄດ້ເຮັດໃຫ້ປະຊາຊົນໄດ້ຮັບບາດເຈັບ 6 ຄົນ ຮວມທັງຄົນເທີກີ 2 ຄົນໃນວັນຈັນວານນີ້. ລາຍງານຂ່າວທີ່ບໍ່ໄດ້ຮັບການຢືນຢັນ ກ່າວວ່າ ປະຊາຊົນ 2 ຄົນເສຍຊີວິດໄປເຊ່ນກັນ.
ພວກທະຫານທີ່ຈົງຮັກພັກດີຕໍ່ທ່ານອັສສັສ ໄດ້ຍິງປືນຂ້າມຊາຍແດນທີ່ມີຄວາມເຄັ່ງຕຶງເຂົ້າໄປໃນເລບານອນເຊ່ນກັນໃນມື້ດຽວກັນເຮັດໃຫ້ນັກຖ່າຍໂທລະພາບຄົນນຶ່ງເສຍຊີວິດ.