ທ່ານ Bashar al-Assad ປະທານາທິບໍດີຊີເຣຍ ມີກໍານົດຈະປາກົດຕົວທາງທີວີ ໃນວັນ
ອາທິດມື້ນີ້ ທ່າມກາງຄວາມກົດດັນຈາກທົ່ວໂລກ ເພື່ອຍຸຕິການກວາດລ້າງພວກປະທ້ວງນັ້ນ.
ຜູ້ນໍາຊີເຣຍໄດ້ຜັກດັນຕໍ່ໄປຢ່າງບໍ່ລົດລະ ໃນການກວາດວ້າງພວກປະທ້ວງ ເຖິງແມ່ນໄດ້ໃຫ້ ການຮັບປະກັນແກ່ຫົວໜ້າອົງການສະຫະປະຊາຊາດວ່າ ການປະຕິບັດການທາງທະຫານ
ຂອງຕົນ ໄດ້ຍຸຕິລົງແລ້ວກໍຕາມ.
ສະຫະລັດ ສະຫະພາບຢຸໂຣບ ແລະພວກປະເທດມະຫາອໍານາດຂົງເຂດຕາເວັນຕົກອື່ນໆ ອີກຫລາຍປະເທດ ຕ່າງກໍໄດ້ກ່າວວ່າ ທ່ານອາຊາດ ຈະຕ້ອງອອກຈາກຕໍາແໜ່ງໄປ.
ກໍາລັງຮັກສາຄວາມປອດໄພຂອງຊີເຣຍ ໄດ້ສັງຫານປະຊາຊົນຢ່າງໜ້ອຍ 2 ຄົນ ໃນແຂວງ Homs ທາງພາກກາງຂອງປະເທດ ໃນວັນເສົາວານນີ້ ມື້ນຶ່ງຫລັງຈາກກໍາລັງຮັກສາຄວາມ ປອດໄພຊີເຣຍໄດ້ສັງຫານປະຊາຊົນ ຢ່າງໜ້ອຍ 34 ຄົນ ຢູ່ໃນທົ່ວປະເທດ.
