ບັນດານັກເຄື່ອນໄຫວກ່າວວ່າ ກໍາລັງຮັກສາຄວາມປອດໄພຂອງຊີເຣຍ ໄດ້ເປີດສາກທໍາການໂຈມຕີຄັ້ງໃຫຍ່ ຢູ່ໃນເມືອງທ່າກໍາປັ່ນ Latakia ໃນວັນອາທິດມື້ນີ້ ໂດຍມີກໍາປັ່ນລົບແລະລົດຖັງ ປະກອບສ່ວນໃນການບຸກໂຈມຕີດັ່ງກ່າວ.
ພວກຊາວເມືອງກ່າວວ່າ ຢ່າງໜ້ອຍປະຊາຊົນ 6 ຄົນເສຍຊີວິດນັບແຕ່ພວກລົດຖັງແລ່ນເຂົ້າໄປໃນເມືອງດັ່ງກ່າວໃນວັນເສົາວານນີ້ ນຶ່ງມື້ຫລັງຈາກພວກປະທ້ວງຕໍ່ຕ້ານລັດຖະບານຫລາຍພັນຄົນໂຮມຊຸມກັນຢູ່ທີ່ນັ້ນ.
ປະຊາຊົນ 2 ຄົນເສຍຊີວິດໃນວັນເສົາວານນີ້ ແລະອີກຢ່າງໜ້ອຍ 4 ຄົນເສຍຊີວິດໃນວັນອາທິດມື້ນີ້.
ໄດ້ມີການບຸກໂຈມຕີບັ້ນນຶ່ງອີກຕ່າງຫາກໃນວັນເສົາວານນີ້ ໃນຂົງເຂດ Qusair ໃກ້ໆກັບຊາຍແດນເລບານອນ ບ່ອນທີ່ພວກນັກເຄື່ອນໄຫວກ່າວວ່າ ຢ່າງໜ້ອຍປະຊາຊົນຄົນນຶ່ງເສຍຊີວິດຢູ່ທີ່ນັ້ນ.
ຄວາມວຸ້ນວາຍດັ່ງກ່າວມີຂຶ້ນຫລັງຈາກມີລາຍງານວ່າ ພວກກໍາລັງຮັກ ສາຄວາມປອດໄພໄດ້ເຂັ່ນຂ້າປະຊາຊົນຕາຍໄປຢ່າງໜ້ອຍ 19 ຄົນໃນທົ່ວປະເທດ.
ພວກນັກເຄື່ອນໄຫວແລະພວກເຫັນເຫດການກ່າວວ່າ ເຄາະຮ້າຍເຫລົ່ານັ້ນສ່ວນຫລາຍແມ່ນເສຍຊີວິດ ຫລັງຈາກພວກປະທ້ວງພາກັນເດີນຂະບວນໄປຕາມຖະໜົນຫົນທາງສາຍຕ່າງໆ ແລະຮຽກຮ້ອງອີກໃໝ່ໃຫ້ປະທານາທິບໍດີ Bashar al-Assad ລາອອກຈາກຕໍາແໜ່ງ.
ໃນຂະນະດຽວກັນ ລາຍງານສະບັບນຶ່ງຢູ່ໃນວາລະສານກອງທັບອີສຣາແອນກ່າວວ່າ ອີສຣາແອນໄດ້ຝັງລະເບີດຝັງດິນໄວ້ອີກຄັ້ງໃໝ່ ຢູ່ເລາະຕາມຊາຍແດນຂອງຕົນຕິດກັບຊີເຣຍນັ້ນ ໃນຄວາມພະຍາຍາມເພື່ອຂັດ ຂວາງ ພວກປະທ້ວງບໍ່ໃຫ້ລຸຫລັ່ງເຂົ້າໄປໃນເຂດພູ Golan Heights ນັ້ນ.
