ບັນດານັກເຄຶ່ອນໄຫວຊາວຊີເຣຍ ກ່າວວ່າ ການປະທະກັນຫຼາຍບັ້ນ ລະຫວ່າງກໍາລັງຂອງລັດຖະບານ ແລະຝ່າຍກະບົດ ທີ່ຍັງດໍາເນີນໄປຢ່າງບໍ່ລົດລະໃນເມືອງ Aleppo ໃນຂະນະທີ່ຝ່າຍທະຫານລັດຖະບານ ຍິງຖະ ຫຼົ່ມໃສ່ເຂດຕ່າງໆທີ່ຄວບຄຸມໂດຍພວກຝ່າຍຄ້ານໃນຫົວເມືອງໃຫຍ່ທີ່ສຸດ ຂອງຊີເຣຍນັ້ນ.
ກໍາມະການປະສານງານທ້ອງຖິ່ນ ແລະກຸ່ມສິ້ງຊອມສິດທິມະນຸດຊີເຣຍ ໄດ້ ລາຍງານກ່ຽວກັບການສູ້ລົບກັນ ເມື່ອວັນພະຫັດມື້ນີ້ ຢູ່ໃນຫຼາຍໆເຂດຂອງເມືອງ Aleppo.
ກອງທັບຊີເຣຍ ໄດ້ເປີດສາກໂຈມຕີຈາກສອງດ້ານ ໃສ່ເມືອງດັ່ງກ່າວເມື່ອວັນພຸດວານນີ້ ໂດຍໃຊ້ເຮືອບິນລົບອາຍພົ່ນ ແລະເຮລິຄອບເຕີ ຖິ້ມລະເບີດລົງໃສ່ ໃນຂະນະທີ່ກໍາລັງພາກພື້ນດິນໄດ້ແນເປົ້າໂຈມຕີທີ່ໝັ້ນຕ່າງໆຂອງຝ່າຍກະບົດນັ້ນ.
ຂະນະດຽວກັນ ພັນທະມິດຂອງຊີເຣຍ ຄືອິຣ່ານ ກໍາລັງພະຍາຍາມສ້າງ ຄວາມຄືບໜ້າໃນການແກ້ໄຂວິກິດການນີີ້ ດ້ວຍການເປີດເຈລະຈາ ໃນວັນພະຫັດມື້ນີ້ ທີ່ນະຄອນຫຼວງເຕຫະຣ່ານ ຂອງອິຣ່ານ.
ທ່ານ Ali Akbar Salehi ລັດຖະມົນຕີຕ່າງປະເທດອິຣ່ານກ່າວວ່າ ອິຣ່ານ ກໍາລັງເປັນເຈົ້າພາບຈັດກອງປະຊຸມບັ້ນນຶ່ງຂຶ້ນ ຂອງບັນດາປະເທດ ທີ່ມຸ້ງໝັ້ນຈະໃຫ້ມີການຈັດຕັ້ງປະຕິບັດສັນຍາຢຸດຍິງໂດຍທັນທີ່ ຈັດສົ່ງການຊ່ວຍເຫຼືອດ້ານມະນຸດສະທໍາໄປຍັງຊີເຣຍ ແລະຕຽມການໂອ້ລົມສົນທະນາກັນ.
ສ່ວນຣັດເຊຍ ກໍກໍາລັງສົ່ງເອກອັກຄະລັດຖະທູດຂອງຕົນໄປຍັງອິຣ່ານ ເພື່ອເຂົ້າຮ່ວມການເຈລະຈາກັນດັ່ງກ່າວ ແຕ່ເວລານີ້ຍັງບໍ່ປະກົດເປັນທີ່ແຈ້ງຂາວເທື່ອວ່າ ມີປະເທດໃດແດ່ຈະເຂົ້າຮ່ວມໃນກອງປະຊຸມຄັ້ງນີ້.
ເບິ່ງສະໄລດ໌ ກ່ຽວກັບເລື້ອງນີ້