ໂທລະພາບລັດຂອງຊີເຣຍ ເວົ້າວ່າ ມືລະເບີດສະຫຼະຊີບຄົນນຶ່ງ ໄດ້ໂຈມຕີ ຕຶກສຳນັກງານຄວາມໝັ້ນຄົງແຫ່ງຊາດ ທີ່ນະຄອນຫຼວງດາມັສກັສ ຂອງຊີເຣຍ ທີ່ໄດ້ສັງຫານທ່ານ Daoud Rajha ລັດຖະມົນຕີປ້ອງກັນປະເທດ ແລະບັນດາເຈົ້າໜ້າທີ່ອື່ນໆອີກຫຼາຍຄົນບາດເຈັບ.
ການໂຈມຕີດັ່ງກ່າວເມື່ອວັນພຸດມື້ນີ້ ເກີດຂຶ້ນທ່າມກາງການປະທະກັນຫຼາຍ ມື້ ລະຫວ່າງກໍາລັງຂອງພວກກະບົດ ແລະຂອງລັດຖະບານໃນເມືອງນະຄອນຫຼວງດາມັສກັສ.
ຂະນະດຽວກັນ ສະພາຄວາມໝັ້ນຄົງອົງການສະຫະປະຊາຊາດຄາດວ່າຈະລົງຄະແນນສຽງກັນໃນວັນພຸດມື້ນີ້ ກ່ຽວກັບມະຕິທີ່ຕໍ່ອາຍຸການປະຕິບັດພາ ລະກິດຂອງນັກສັງເກດການອົງການສະຫະປະຊາດໃນຊີເຣຍອອກໄປອີກ ນັ້ນ.
ຄໍາສັ່ງມອບໝາຍການປະຕິບັດພາລະກິດດັ່ງກ່າວຈະໝົດອາຍຸລົງໃນວັນສຸກຕໍ່ໜ້ານີ້ແລະສະມາຊິກສະພາຄວາມໝັ້ນຄົງຍັງມີຄວາມເຫັນບໍ່ລົງຮອຍ ກັນກ່ຽວກັບວ່າ ມະຕິສະບັບໃໝ່ນີ້ຈະໂຮມທັງການຂົ່ມຂູ່ວ່າຈະທຳການລົງໂທດຕໍ່ລັດຖະບານຂອງປະທານາທິບໍດີ Bashar al-Assad ນັ້ນຫຼືບໍ່.
ອັງກິດ ຝຣັ່ງ ສະຫະລັດ ແລະເຢຍຣະມັນ ໄດ້ສະເໜີຮ່າງຍັດຕິດັ່ງກ່າວ ທີ່ຮຽກຮ້ອງໃຫ້ມີການລົງໂທດນໍາ ຖ້າຫາກວ່າຊີເຣຍບໍ່ຈັດຕັ້ງປະຕິບັດແຜນການສັນຕິພາບຂອງທ່ານ ໂກຟີ ອັນນັນ. ຝ່າຍຣັດເຊຍກໍໃຫ້ສັນຍາວ່າ ຈະໃຊ້ສິດຍັບຍັ້ງຕໍ່ຮ່າງມະຕິດັ່ງກ່າວ ຊຶ່ງຮ່າງຍັດຕິຂອງຣັດເຊຍບໍ່ໄດ້ລວມເອົາການລົງໂທດເຂົ້ານໍາ.