ລິ້ງ ສຳຫລັບເຂົ້າຫາ

ວັນສຸກ, ໒໙ ມີນາ ໒໐໒໔

ເທີກີ ພົບສົບນັກບິນ ຂອງເຮືອບິນ ທີ່ຊີເຣຍຍິງຕົກ ນັ້ນແລ້ວ


ຍົນໄອພົ່ນລົບຂອງເທີກີ ຊະນິດທີ່ຖືກຊີເຣຍຍິງຕົກນັ້ນ
ຍົນໄອພົ່ນລົບຂອງເທີກີ ຊະນິດທີ່ຖືກຊີເຣຍຍິງຕົກນັ້ນ

ກອງທັບ​ເທີ​ກີ​ກ່າວ​ວ່າ ​ ສົບ​ຂອງ​ນັກ​ບິນສອງ​ຄົນ ປະ​ຈໍາ​ເຮືອບິນ ອາຍ​ພົ່ນ F-4 ທີ່​ຖືກ​ຍິງ​ຕົກ​ໂດຍ​ກອງທັບ​ຊີ​ເຣຍ​ເມື່ອເດືອນ​ຜ່ານ​ມາ​ນັ້ນ ໄດ້​ຖືກຄົ້ນ​ພົບ​ແລ້ວ ທີ່​ບໍລິ​ເວນ​ພື້ນ​ທະ​ເລ Mediterranean ກໍ້າ​ຕາ​ເວັນ​ອອກ ​ໃນ​ຂະນະທີ່​ເຫດການ​ຄວາມ​ຮຸນ​ແຮງ​ຍັງ​ດໍາ​ເນີນ​ສືບ​ຕໍ່​ໄປ​ຢູ່​ທົ່ວ​ຊີ​ເຣຍນັ້ນ.

ຄວາມ​ສໍາພັນ​ລະຫວ່າງ​ອັງກາ​ຣາ ​ແລະ​ດາ​ມັສກັສ ​ແມ່ນໄດ້ຊຸດ​ໂຊມ​ລົງ​ຫຼັງ ຈາກ​ຊີ​ເຣຍ​ໄດ້​ຍິງ​ເຮືອບິນ​ລາດຕະ​ເວນ​ຂອງ​ເທີ​ກີຕົກ ​ເມື່ອ​ວັນ​ທີ່ 22 ​ເດືອນ​ມິຖຸນາ​ຜ່ານ​ມາໂດຍ​ທີ່​ເທີ​ກີ​ເຕືອນວ່າ ​ຕົນ​ຈະຕອບ​ໂຕ້​ຢ່າງ​ເດັດຂາດ. ແນວ​ ໃດ​ກໍ​ດີ​ທັງ​ສອງ​ປະ​ເທດກ່າວ​ວ່າ ພວກຕົນ​ບໍ່​ຕ້ອງການໃຫ້​ເຫດ​ຮ້າຍ​ນີ້ນໍາພາ ໄປ​ສູ່​ການ​ປະ​ທະ​ກັນ​ດ້ວຍ​ກຳລັງ​ອາວຸດ.

ຄວາມ​ເຄັ່ງ​ຕຶງ​ໄດ້​ເພີ່ມ​ທະວີ​ຂຶ້ນ​ເປັນ​ເວລາຫຼາຍ​ເດືອນມາ​ແລ້ວ​ລະຫວ່າງ​ບັນ ດາອະດີດ​ປະ​ເທດ​ເພື່ອນ​ບ້ານ​ທີ່​ໃກ້ຊິດ ຍ້ອນ​ການ​ປາບ​ປາມ​ກົດ​ຂີ່​ຮ້າຍ​ແຮງ ຂອງ​ລັດຖະບານ​ຊີ​ເຣຍ ຕໍ່​ການ​ລຸກ​ຮື​ຂຶ້ນ ​ເປັນ​ເວລາ 16 ​ເດືອນ​ແລ້ວນັ້ນ. ​ເທີ​ກີ​ໄດ້​ໃຫ້​ບ່ອນ​ລີ້​ຊ່ອນແກ່​ພວກ​ກະບົດ​ຊີ​ເຣຍຕາມ​ເຂດຊາຍແດນ ​ຕິດ​ກັບ​ຊີ​ເຣຍຂອງ​ຕົນ ​ແລະ​ຊາວ​ອົບ​ພະຍົບຊີ​ເຣຍອີກ​ຫຼາຍພັນຄົນ​ໄດ້​ອາໄສ​ຢູ່​ຕາມ​ຄ້າຍ​ອົບ​ພະ​ຍົບ​ໃນ​ເທີ​ກີ.

ນອກ​ນີ້​ ​ເມື່ອ​ວັນ​ພຸດ​ວານ​ນີ້ ນາຍ​ພົນ​ຊີ​ເຣຍຄົນ​ນຶ່ງ​ໄດ້​ໂຕນ​ໜີ​ໄປ​ຮ່ວມ​ກັບ ພວກ​ຝ່າຍ​ຄ້ານ ຊຶ່ງນັບ​ວ່າ​ເປັນ​ນາຍ​ທະຫານ​ລະດັບ​ສູງ​ຄົນ​ທີ່ 15 ທີ່​ຫຼົບໜີ​ເຂົ້າໄປ​ຍັງ​ດິນ​ແດນ​ເທີ​ກີ. ​ເວລາ​ນີ້ ​ເທີ​ກີ​ໄດ້​ໃຫ້ບ່ອນ​ເພິ່ງ​ພິງ​ ແກ່​ນາຍ​ທະ ຫານຊີ​ເຣຍປະມານ 250 ຄົນ ທີ່​ໄດ້​ໂຕນ​ໜີ​ໄປ​ຮ່ວມກັບ​ກອງທັບ​ປົດ​ປ່ອຍ ​ຊີ​ເຣຍ​ເສລີ ທີ່ແຂວງ Hatay ທາງ​ພາກ​ໃຕ້​ຂອງ​ຕົນ ​ແລະ​ກໍ​ໄດ້​ຊ່ວຍ​ເຫຼືອ ດ້ານ​ພະລາທິການ​ໃຫ້​ແກ່​ກອງທັບ​ກະບົດ​ດັ່ງກ່າວ ​ແຕ່ກໍ​ປະຕິ​ເສດ​ວ່າ​ບໍ່​ໄດ້​ໃຫ້​ອາວຸດ​ໃດໆ.

XS
SM
MD
LG