ກະຊວງການຕ່າງປະເທດຂອງອັງກິດ ກໍາລັງຮຽກຮ້ອງໃຫ້ຊາວອັງກິດທີ່ຢູ່ໃນຊີເຣຍຈົ່ງຮີບ ພາ ກັນໜີອອກຈາກຊີເຣຍໃນທັນທີ ເນຶ່ອງຈາກວິກິດການການເມືອງໃນຊີເຣຍກໍາລັງ ຊຸດໂຊມລົງໄປເລື້ອຍໆ
ໃນຄໍາເຕືອນກ່ຽວກັບການເດີນທາງສະບັບນຶ່ງທີ່ອອກເມື່ອວັນເສົາວານນີ້ ພວກເຈົ້າໜ້າທີ່ ອັງກິດກ່າວວ່າ ມີທາງເປັນໄປໄດ້ນ້ອຍຫລາຍ ທີ່ວ່າທາງ ສະຖານທູດອັງກິດໃນນະຄອນ ຫລວງດາມັສກັສຂອງຊີເຣຍ ຈະສາມາດຊ່ວຍເຫລືອໄດ້ ຖ້າຫາກວ່າສະຖານະການ ຊໍ້າຮ້າຍລົງໄປກວ່ານີ້.
ການຕຸກເຕືອນດັ່ງກ່າວ ມີຂື້ນໃນຂະນະທີ່ກອງທະຫານຂອງຊີເຣຍທີ່ໄດ້ຮັບການເສີມກໍາລັງ ດ້ວຍລົດຖັງ ແລະຍິງປືນກົນໜັກ ໄດ້ບຸກເຂົ້າໄປໃນໝູ່ບ້ານແຫ່ງນຶ່ງໃກ້ເຂດຊາຍແດນ ເທີກີເມື່ອວັນເສົາວານນີ້ ອັນເປັນພາກສ່ວນຂອງ ການຂະຫຍາຍການກວາດລ້າງພວກປະທ້ວງຕໍ່ຕ້ານລັຖະບານ ອອກໄປອີກ ຂອງລັດຖະບານ
ພວກນັກເຄຶ່ອນໄຫວດ້ານສິດທິ ແລະພວກເຫັນເຫດການກ່າວວ່າ ກໍາລັງ ທະຫານຂອງຝ່າຍ ລັດຖະບານພ້ອມດ້ວຍລົດຖັງ ແລະລົດຫຸ້ມເກາະບັນທຸກກໍາລັງພົນ ໄດ້ບຸກເຂົ້າໄປຍັງວເມືອງ Bdama ແລະໄດ້ຈັບກຸມຢ່າງໜ້ອຍ 70 ຄົນ. ພວກເຫັນເຫດການກ່າວວ່າກໍາລັງທະຫານ ຂອງຝ່າຍລັດຖະບານ ໄດ້ຈູດເຮືອນ ຢ່າງໜ້ອຍສອງຫລັງ.
ເມືອງ Bdama ຕັ້ງຢູ່ບໍ່ຫ່າງໄກຈາກເຂດຊາຍແດນຕິດກັບເທີກີ ນັກເຄຶ່ອນໄຫວດ້ານສິດທິ ຄົນນຶ່ງປະຈໍາອົງການສິ້ງຊອມສິດທິທະນຸດຂອງ ຊີເຣຍ ທີ່ຕັ້ງຢູ່ໃນອັງກິດກ່າວວ່າພວກຊາວ ເມືອງດັ່ງກ່າວ ໄດ້ຊ່ວຍເຫລືອ ພວກອົບພະຍົບໃນຂະນະທີ່ພວກເຂົາເຈົ້າຫລົບໜີອອກ ນອກປະເທດຂ້າມຊາຍແດນ ໄປສູ່ຄ້າຍຜ້າເຕັ້ນທີ່ພັກຊົ່ວຄາວໃນເທີກີ ຊຶ່ງໃນປັດຈຸບັນນີ້ ມີ ຊາວຊີເຣຍຈໍານວນຫລາຍກວ່າ 10,000 ຄົນອາໃສຢູ່.
ຂະນະດຽວກັນ ທາງເລບານອນກໍໄດ້ສົ່ງກໍາລັງທະຫານໄປຍັງເມືອງ Tripoli ທາງພາກເໜືອ ຂອງປະເທດໃນວັນເສົາວານນີ້ ຫລັງຈາກການເກີດປະທະກັນຢ່າງຮຸນແຮງ ລຸນຫລັງການ ໂຮມຊຸມນຸມບັ້ນນຶ່ງເພື່ອສະແດງການສະໜັບສະໜຸນ ຕໍ່ພວກຝ່າຍຄ້ານຂອງຊີເຣຍ.
