ສື່ມວນຊົນຂອງລັດຊີເລຍກ່າວວ່າ ກໍາລັງທະຫານຂອງ ຝ່າຍລັດຖະບານ ໄດ້ປະທະກັນກັບພວກມືປືນໃນເມືອງນຶ່ງ ທາງພາກເໜືອຂອງປະເທດ ໃນວັນອາທິດມື້ນີ້ ໃນຂະນະ ທີ່ຄວາມໂກດແຄ້ນຂອງປະຊາຄົມນາໆຊາດເພີ້ມ ທະວີຂຶ້ນ ຕໍ່ການກວາດລ້າງພວກປະທ້ວງຢ່າງໂຫດຮ້າຍປ່າເຖື່ອນຂອງ ລັດຖະບານຊີເຣຍນັ້ນ.
ລັດຖະບານໄດ້ກ່າວຫາວ່າ “ພວກແກ໊ງປະກອບອາວຸດ” ໃນເມືອງ Jisr al-Shughour ໄດ້ສັງຫານພວກກໍາລັງ ຮັກສາຄວາມປອດໄພ ແລະສື່ມວນຊົນ ຂອງລັດກ່າວວ່າ ກໍາລັງທະຫານໄດ້ຕັ້ງທີ່ໝັ້ນຢູ່ໃນແລະອ້ອມແອ້ມຕົວເມືອງ ເພື່ອປະເຊີນໜ້າກັບພວກແກ໊ງເຫລົ່ານັ້ນ.
ເມືອງດັ່ງກ່າວທີ່ຕັ້ງຢູ່ໃກ້ເຂດຊາຍແດນຕິດກັບປະເທດເທີກີ ແມ່ນໄດ້ເປັນຈຸດສຸມຂອງການ ປະຕິບັດການທາງທະຫານເປັນເວລາຫລາຍມື້ ທີ່ຍັງຜົນ ໃຫ້ປະຊາຊົນຫລາຍພັນຄົນ ຕ້ອງພາກັນອົບພະຍົບເຂົ້າໄປຍັງປະເທດເທີກີ ເພື່ອຫລົບໜີຈາກເຫດການນອງເລືອດນັ້ນ.
ວັນເສົາວານນີ້ ສະຫະລັດໄດ້ກ່າວຫາລັດຖະບານຊີເຣຍວ່າ ກໍ່ວິກິດການດ້ານມະນຸດສະທໍາ ຂຶ້ນໃນເຂດພາກເໜືອຂອງປະເທດ ແລະຮຽກຮ້ອງໃຫ້ ດາມັສກັສ ຈົ່ງຍຸຕິການກໍ່ຄວາມ ຮຸນແຮງຂອງຕົນທີ່ແນເປົ້າໃສ່ພວກປະທ້ວງ ນັ້ນ.
