ທ່ານ ໂກຟີ ອັນນັນ ຜູ້ໄກ່ເກ່ຍຂອງອົງການສະຫະປະຊາຊາດແລະສັນນິ ບາດອາຣັບ ມີກໍານົດຈະລາຍງານສັ້ນໆຕໍ່ສະພາຄວາມໝັ້ນຄົງ ແລະສະມັດຊາໃຫຍ່ອົງການສະຫະປະຊາຊາດກ່ຽວກັບສະຖານະການໃນຊີເຣຍ ໃນຂະນະທີ່ພວກນັກເຄຶ່ອນໄຫວໄດ້ກ່າວຫາພວກທະຫານບ້ານທີ່ນິຍົມລັດຖະບານແລະກໍາລັງຮັກສາຄວາມປອດໄພຂອງລັດຖະບານວ່າ ໄດ້ທໍາການສັງຫານໝູ່ຄັ້ງໃໝ່ ຢູ່ໃນແຂວງ Hama ທາງພາກກາງຂອງປະເທດ.
ພວກນັກເຄຶ່ອນໄຫວກ່າວວ່າ ປະຊາຊົນຢ່າງໜ້ອຍ 78 ຄົນ ໂຮມທັງແມ່ ຍິງແລະເດັກໄດ້ຖືກສັງຫານເມື່ອວັນພຸດວານນີ້. ພວກເຂົາເຈົ້າກ່າວວ່າ ພວກທີ່ຖືກຂ້າຕາຍບາງຄົນນັ້ນ ແມ່ນຢູ່ໃນໝູ່ບ້ານ al-Kubeir ແລະ Maazarif ຊຶ່ງໄດ້ຖືກແທງຈົນຕາຍ ແລະຢ່າງໜ້ອຍອີກ 12 ຄົນຖືກເອົາໄຟຈູດ.
ກຸ່ມສິ້ງຊອມສິດທິມະນຸດຊີເຣຍ ທີ່ມີສໍານັກງານຢູ່ອັງກິດ ກ່າວວ່າ ກຸ່ມທະ ຫານບ້ານ shabiha ທີ່ມີປືນແລະມີດເປັນອາວຸດ ໄດ້ບຸກໂຈມຕີຫຼັງຈາກ ກໍາລັງທະຫານຂອງລັດຖະບານໄດ້ຍິງປືນໃຫຍ່ຖະຫຼົ່ມເຂດດັ່ງກ່າວແລ້ວນັ້ນ.
ກຸ່ມຝ່າຍຄ້ານພັດຖິ່ນ Syrian National Council ຫຼືສະພາປົກຄອງແຫ່ງຊາດຊີເຣຍ ໄດ້ຮຽກຮ້ອງໃຫ້ກອງທັບຊີເຣຍເສລີ ແລະພັກຝ່າຍຄ້ານທີ່ປະກອບອາວຸດອື່ນໆຈົ່ງຕອບໂຕ້ເພີ່ມການຕ້ານຢັນຂອງພວກເຂົາເຈົ້າ.
ທ່ານ David Cameron ນາຍົກລັດຖະມົນຕີອັງກິດ ໄດ້ເອີ້ນການໂຈມຕີທີ່ລາຍງານມານັ້ນວ່າ ໄຮ້ສະຕິແລະປ່າເຖື່ອນ ແລະກ່າວວ່າ ຖ້າມັນເປັນ ເລຶ່ອງຈິງແລ້ວ ປະຊາຄົມນາໆຊາດກໍຈະຕ້ອງປະຕິບັດການເພີ່ມຕື່ມເພື່ອປະນາມຢ່າງເດັດດ່ຽວ ຕໍ່ລັດຖະບານຂອງປະທານາທິບໍດີ Bashar al- Assad ນັ້ນ.
ຝ່າຍລັດຖະບານຊີເຣຍ ໄດ້ຖິ້ມໂທດໃສ່ ກຸ່ມກໍ່ການຮ້າຍສໍາລັບເຫດການຄວາມຮຸນແຮງຄັ້ງນີ້.
ຂະນະດຽວກັນ ບັນດານັກການທູດກ່າວວ່າ ທ່ານ ອັນນັນ ຊຶ່ງເປັນຜູ້ໄກ່ເກ່ຍຂອງອົງການສະຫະປະຊາຊາດແລະສັນນິບາດອາຣັບ ກໍາລັງຕຽມນໍາສະເໜີຕໍ່ສະພາຄວາມໝັ້ນຄົງ ແຜນການໃໝ່ຊຸດນຶ່ງ ເພື່ອກອບກູ້ແຜນສັນ ຕິພາບທີ່ບໍ່ປະສົບຜົນສໍາເລັດຂອງທ່ານສໍາລັບຊີເຣຍນັ້ນ.
ພວກເຂົາເຈົ້າກ່າວວ່າ ແຜນການໃໝ່ຂອງທ່ານ ອັນນັນ ນັ້ນຈະຈັດຕັ້ງກຸ່ມ ຕິດຕໍ່ປະສານງານກຸ່ມນຶ່ງຂຶ້ນສໍາລັບຊີເຣຍ ທີ່ໂຮມທັງຫ້າປະເທດສະມາຊິກ ຖາວອນຂອງສະພາຄວາມໝັ້ນຄົງ ແລະບັນດາປະເທດທີ່ມີບົດບາດສໍາຄັນ ຢູ່ໃນຂົງເຂດ ທີ່ມີອິດທິພົນຕໍ່ດາມັສກັສຫຼືພັກຝ່າຍຄ້ານ ເຊັ່ນ Saudi Arabia, Qatar, Turkey ແລະອິຣ່ານ. ກຸ່ມດັ່ງກ່າວຈະພະຍາຍາມ ວາງແຜນການເພື່ອການປ່ຽນແປງທາງການເມືອງທີ່ນໍາໄປສູ່ການລົງຈາກອໍານາດຂອງປະທານາທິບໍດີ ອາຊັສ ແລະຈັດການເລືອກຕັ້ງທີ່ເສລີຂຶ້ນ.