ພວກນັກເຄຶ່ອນໄຫວຊີເຣຍກ່າວວ່າ ທະຫານຂອງລັດຖະບານ ທີ່ໜຸນຫລັງ ໂດຍລົດຖັງ ໄດ້ສັງຫານສາມຄົນຢູ່ໃກ້ເມືອງຫລວງດາມັສກັສ ແມ່ນແຕ່ໃນ ຂະນະທີ່ທ່ານ ໂຄຟີ ອັນນັນ ທູດພິເສດຂອງນາໆຊາດ ໄດ້ເອີ່ຍເຖິງການຕັດສິນໃຈຂອງສະພາຄວາມໝັ້ນຄົງສະຫະປະຊາຊາດທີ່ຈະສົ່ງນັກສັງເກດ ການຢຸດຍິງ ຈໍານວນ 300 ຄົນ ໄປຍັງຊີເຣຍວ່າ ເປັນຊ່ວງຫົວລ້ຽວຫົວຕໍ່ ສໍາລັບປະເທດດັ່ງກ່າວ.
ກຸ່ມສິ້ງຊອມສິດທິມະນຸດຊີເຣຍ ທີ່ມີສໍານັກງານຢູ່ອັງກິດ ລາຍງານວ່າ ມີການລະດົມຍິງປືນໃຫຍ່ແລະອາວຸດໜັກ ໃນວັນອາທິດມື້ນີ້ ເວລາກໍາລັງທີ່ຈົ່ງຮັກພັກດີຕໍ່ປະທານາທິບໍດີ Bashar al-Assad ບຸກຖະລົ່ມເມືອງດູມາ ຢູ່ເຂດຊານເມືອງຫລວງດາມັສກັສນັ້ນ.
ພວກນັກເຄຶ່ອນໄຫວຝ່າຍຄ້ານກ່າວວ່າ ເມືອງ Homs ຊຶ່ງເປັນຈຸດທີ່ມີການສູ້ລົບກັນຢ່າງຮຸນແຮງຕະຫລອດມານັ້ນ ກໍໄດ້ຖືກຍິງຖະລົ່ມຢ່າງໜັກ ໜ່ວງອີກມື້ນຶ່ງໃນມື້ນີ້ ຫລັງຈາກໄດ້ຢຸດຊົ່ວຄາວໄປ ນຶ່ງມື້ກ່ອນພວກທີມສັງເກດການລ່ວງໜ້ານ້ອຍໆທີມນຶ່ງຂອງຢູແອັນ ໄດ້ໄປທ່ຽວເລາະສັງເກດການໃນຕົວເມືອງດັ່ງກ່າວ. ນັກສັງເກດການສອງຄົນໄດ້ນອນພັກຄ້າງຄືນ ຢູ່ໃນເມືອງ Homs.
ວີໂອເອບໍ່ສາມາດໄດ້ຮັບການຢືນຢັນລາຍງານຂ່າວກ່ຽວກັບເຫດການກໍ່ຄວາມຮຸນແຮງ ແລະຈໍານວນຜູ້ເສຍຊີວິດເຫລົ່ານີ້ໄດ້ ຈາກແຫລ່ງຂ່າວອິດສະລະ ເນຶ່ອງຈາກລັດຖະບານຊີເຣຍໄດ້ຫ້າມບໍ່ໃຫ້ສື່ມວນຊົນນາໆຊາດ ເຂົ້າໄປໃນເຂດດັ່ງກ່າວ.
ທີ່ນະຄອນເຈນີວາ ປະເທດ Switzerland ທ່ານ ໂຄຟີ ອັນນັນ ໄດ້ຮຽກຮ້ອງໃຫ້ທັງສອງຝ່າຍ ກໍຄືຝ່າຍລັດຖະບານຊີເຣຍ ແລະພວກນັກລົບຂອງຝ່າຍຄ້ານ ຈົ່ງພາກັນວາງອາວຸດ ແລະໃຫ້ຮ່ວມປະຕິບັດງານກັບພວກນັກສັງເກດການ ທີ່ບໍ່ຖືອາວຸດນັ້ນ ເພື່ອສ້າງຄວາມເຂັ້ມແຂງການຢຸດຍິງທີ່ຍັງແຕກຫັກໄດ້ງ່າຍ ທີ່ໄດ້ມີການຈັດຕັ້ງປະຕິບັດເມື່ອສິບວັນຜ່ານມານັ້ນ.
ທ່ານອັນນັນ ກ່າວວ່າ ໂດຍສະເພາະແມ່ນຝ່າຍລັດຖະບານນັ້ນ ຈະຕ້ອງຍຸຕິການໃຊ້ອາວຸດໜັກທັງຫລາຍ ຖອນກໍາລັງທະຫານຂອງຕົນອອກຈາກເຂດທີ່ມີປະຊາຊົນອາໃສຢູ່ ແລະຈັດຕັ້ງປະຕິບັດພັນທະຕ່າງໆຂອງຕົນຢ່າງເຕັມສ່ວນ ພາຍໃຕ້ແຜນສັນຕິພາບຫົກຂໍ້ ທີ່ທັງສອງຝ່າຍໄດ້ຮັບຮອງເອົາ ເພື່ອຍຸຕິຄວາມຮຸນແຮງທີ່ຍືດເຍື້ອມາໄດ້ 13 ເດືອນແລ້ວນັ້ນ.