ກອງທັບຊີເຣຍສືບຕໍ່ທໍາການໂຈມຕີຕໍ່ທີ່ໝັ້ນຂອງຝ່າຍກະບົດ ໃນວັນອາທິດມື້ນີ້ ໃນ
ເມືອງອາແລັບໂປ ທາງພາກເໜືອຂອງປະເທດ ໂດຍການລະດົມຍິງປືນໃຫຍ່ໃສ່ ແລະ
ໃຊ້ເຮືອບິນເຮລີຄອບເຕີ້ປະກອບອາວຸດ.
ອາແລັບໂປ ເມືອງທີ່ໃຫຍ່ທີ່ສຸດຂອງຊີເຣຍໄດ້ກາຍມາເປັນສະໜາມລົບອັນສໍາຄັນໃນ
ການລຸກຮືຂຶ້ນມາເປັນເວລາເກືອຍປີເຄິ່ງ ຕໍ່ຕ້ານການປົກຄອງຂອງປະທານາທິບໍດີ
Bashar al-Assad ໃນຂະນະທີ່ມີລາຍງານວ່າ ຝ່າຍລັດຖະບານກໍພວມລະດົມກໍາລັງ
ຢ່າງໃຫຍ່ ເພື່ອກຽມໂຕສໍາລັບອັນທີ່ຄາດກັນວ່າ ຈະເປັນການເປີດສາກບັ້ນໂຈມຕີຢ່າງ
ໜັກຕ້ານພວກຝ່າຍຄ້ານ.
ໃນຂະນະດຽວກັນ ສື່ຂອງອີຣ່ານລາຍງານຂ່າວໃນວັນອາທິດມື້ນີ້ວ່າ ລັດຖະບານກຸງ
ເຕ່ຮະຣ່ານ ໄດ້ຂໍຮ້ອງໃຫ້ເທີກີ ແລະກາຕາ ຊ່ວຍໃຫ້ມີການປ່ອຍໂຕຄົນສັນຊາດອີຣ່ານ
48 ຄົນ ທີ່ຖືກລັກພາຕົວໄປໃນວັນເສົາວານນີ້ ທີ່ນະຄອນຫລວງດາມັສກັສນັ້ນ. ອີຣ່ານ
ເວົ້າວ່າ ຜູ້ໄດ້ຮັບເຄາະຮ້າຍ ແມ່ນຜູ້ສະແຫວງບຸນທາງສາສະໜາ ແຕ່ວ່າ ໂທລະພາບ
Al-Arabiya ເວົ້າວ່າ ພວກກະບົດໃນຊີເຣຍກ່າວວ່າ ຄົນພວກນີ້ ເປັນສະມາຊິກຂອງ
ໜ່ວຍພິທັກການປະຕິວັດ ຫລືກອງກໍາລັງຊັ້ນຫົວກະທິຂອງອີຣ່ານ.
ອີຣ່ານເປັນຜູ້ໜູນຫລັງລັດຖະບານຊີເຣຍ ໃນຂະນະທີ່ເທິກີ ແລະກາຕາແມ່ນໃຫ້ການ ສະໜັບສະໜູນແກ່ຝ່າຍຕໍ່ຕ້ານລັດຖະບານຊີເຣຍ.
ໃນອີກຂ່າວນຶ່ງນັ້ນ ຄາດວ່າລັດຖະມົນຕີກະຊວງການຕ່າງປະເທດສະຫະລັດ ທ່ານນາງ
Hillary Clinton ຈະເດີນທາງໄປຢ້ຽມຢາມເທີກີ ໃນວັນເສົາໜ້າ ເພື່ອສົນທະນາຫາລື
ກ່ຽວກັບ ສະພາບການທີ່ຮ້າຍແຮງລົງໃນຊີເຣຍ ປະເທດເພື່ອນບ້ານຂອງເທີກີນັ້ນ.
ເຈົ້າໜ້າທີ່ກະຊວງການຕ່າງປະເທດສະຫະລັດທ່ານນຶ່ງ ໄດ້ອອກຄໍາປະກາດດັ່ງກ່າວ ໃນ
ວັນອາທິດມື້ນີ້ ໃນຂະນະທີ່ ທ່ານນາງ Clinton ກໍາລັງຢ້ຽມຢາມປະເທດມາລາວີ.
