ຜູ້ປ່ອນບັດຊາວສະວິດເຊີແລນ ໄດ້ປະຕິເສດດ້ວຍຄະແນນສຽງ
ຄັດຄ້ານຢ່າງຖ້ວມລົ້ນ ຕໍ່ຂໍ້ສະເໜີໃຫ້ຈຳກັດຈຳນວນຄົນເຂົ້າເມືອງ
ຢ່າງໃຫຍ່ ໃນການລົງປະຊາມະຕິ ເມື່ອວັນອາທິດວານນີ້ ທີ່ພວກ
ຄັດຄ້ານຕີລາຄາວ່າ ເປັນຄວາມຍ້ານກົວຊາວຕ່າງຊາດ ແລະ
ເປັນຄວາມຫາຍະນະ ສຳຫລັບເສດຖະກິດນັ້ນ.
ພວກລົງປະຊາມະຕິ ຈຳນວນ 74 ເປີເຊັນ ໄດ້ຄັດຄ້ານຕໍ່ຂໍ້ສະເໜີ
ໃຫ້ຈຳກັດການຂະຫຍາຍໂຕຂອງຄົນເຂົ້າເມືອງ ໃຫ້ຢູ່ໃນອັດຕາ
0.2 ເປີເຊັນຂອງຈຳນວນປະຊາກອນ ຫຼືໃຫ້ເພີ້ມຂຶ້ນ 16,000 ຄົນ
ຕໍ່ປີ ແທນອັດຕາໃນປັດຈຸບັນ ຄື 80,000 ຄົນຕໍ່ປີນັ້ນ. ຂໍ້ສະເໜີ
ດັ່ງກ່າວ ຍັງຮຽກຮ້ອງໃຫ້ ສະວິດເຊີແລນນຳໃຊ້ 10 ເປີເຊັນຂອງ
ງົບປະມານຊ່ອຍເຫຼືອສຳລັບການພັດທະນາຕ່າງປະເທດນັ້ນ ເຂົ້າໃນໂຄງການວາງແຜນ ຄອບຄົວຢູ່ຕ່າງປະເທດ ຊຶ່ງເປັນການເຄື່ອນໄຫວທີ່ ບັນດານັກວິຈານ ກ່າວວ່າ ເປັນ
“ລັດທິຫົວເມືອງຂຶ້ນແບບໃໝ່.”
ບັນດາຜູ້ສະໜັບສະໜຸນຂໍ້ສະເໜີດັ່ງກ່າວເວົ້າວ່າ ການຫລັ່ງໄຫລເຂົ້າ ມາຂອງຊາວຕ່າງຊາດ ແມ່ນກຳລັງເພີ້ມຈຳນວນປະຊາກອນໃນປະເທດທີ່ຕັ້ງຢູ່ໃນເຂດພູເຂົາ Alpine ແຫ່ງນັ້ນ ຂຶ້ນຢ່າງຫລວງຫລາຍ ແລະ ເຮັດໃຫ້ດິນແດນອັນເຕັມໄປດ້ວຍປ່າດົງຂຽວ ທີ່ກວ້າງໃຫຍ່ ແລະ ສວຍງາມນັ້ນ ຄັບແຄບລົງ.
ການປ່ອນບັດໃນວັນອາທິດວານນີ້ ແມ່ນເປັນເທື່ອທີສອງໃນປີນີ້ ທີ່ສະວິດເຊີແລນໄດ້ຈັດ ໃຫ້ມີການລົງປະຊາມະຕິກ່ຽວກັບຄົນເຂົ້າເມືອງ.
ໃນຂະນະດຽວກັນ ພວກລົງຄະແນນສຽງ 77 ເປີເຊັນ ກໍໄດ້ປະຕິເສດ ຕໍ່ຂໍ້ສະເໜີອີກສະບັບນຶ່ງ ທີ່ຮຽກຮ້ອງໃຫ້ທະນາຄານກາງສະວິດເຊີແລນ ເພີ້ມຈຳນວນຄຳສຳລອງຂຶ້ນນັ້ນ. ອີກຂໍ້ສະເໜີນຶ່ງທີ່ໃຫ້ລົບລ້າງການຍົກ ເວ້ນພາສີອັນໃຫຍ່ທີ່ສຸດ ໃຫ້ແກ່ບັນດາຄົນຕ່າງປະເທດທີ່ຮັ່ງມີ ທີ່ອາໄສຢູ່ໃນສະວິດເຊີແລນເສຍຫາຍ ກໍໄດ້ຖືກປະຕິເສດເຊັ່ນກັນ.
