ຊາວສະວິດເຊີແລນ ພາກັນໄປປ່ອນບັດອອກສຽງ ໃນວັນອາທິດ
ມື້ນີ້ ເພື່ອຕັດສິນວ່າ ຈະວາງຂອບເຂດທີ່ຮຸນແຮງ ຕໍ່ການຮັບເອົາ
ຄົນເຂົ້າເມືອງ ຫຼືບໍ່ ຊຶ່ງເປັນການລົງປະຊາມະຕິ ທີ່ພວກຄັດຄ້ານ
ຕີລາຄາວ່າ ເປັນຄວາມຍ້ານກົວຊາວຕ່າງຊາດ ແລະ ເປັນຄວາມ
ຫາຍະນະ ສຳຫລັບເສດຖະກິດ.
ຂໍ້ສະເໜີໃຫ້ລົງປະຊາມະຕິດັ່ງກ່າວ ທີ່ເອີ້ນວ່າ “Ecopop” ນັ້ນ
ຈະຈຳກັດການຂະຫຍາຍໂຕ ຂອງຄົນເຂົ້າເມືອງ ໃຫ້ຢູ່ໃນອັດຕາ
0.2 ເປີເຊັນຂອງຈຳນວນປະຊາກອນ ຫຼືໃຫ້ເພີ້ມຂຶ້ນ 16,000 ຄົນ
ຕໍ່ປີ ແທນອັດຕາໃນປັດຈຸບັນ ຄື 80,000 ຄົນຕໍ່ປີນັ້ນ. ຂໍ້ສະເໜີດັ່ງ
ກ່າວ ຍັງຮຽກຮ້ອງໃຫ້ ສະວິດເຊີແລນນຳໃຊ້ 10 ເປີເຊັນຂອງງົບ
ປະມານຊ່ອຍເຫຼືອ ໃນການພັດທະນາຕ່າງປະເທດນັ້ນ ເຂົ້າໃນໂຄງການວາງແຜນຄອບຄົວ ຢູ່ຕ່າງປະເທດ ຊຶ່ງເປັນການເຄື່ອນໄຫວທີ່ ບັນດານັກວິຈານ ກ່າວວ່າ ເປັນ “ລັດທິຫົວເມືອງຂຶ້ນແບບໃໝ່.”
ບັນດາຜູ້ສະໜັບສະໜຸນຂໍ້ລິເລີ້ມ Ecopop ກ່າວວ່າ ການຫລັ່ງໄຫລເຂົ້າມາຂອງຊາວ
ຕ່າງຊາດ ແມ່ນກຳລັງເພີ້ມຈຳນວນປະຊາກອນໃນ ປະເທດທີ່ຕັ້ງຢູ່ໃນເຂດພູເຂົາ Alpine
ແຫ່ງນັ້ນ ຂຶ້ນຢ່າງຫລວງຫລາຍ ແລະ ເຮັດໃຫ້ດິນແດນອັນເຕັມໄປດ້ວຍປ່າດົງຂຽວ ທີ່
ກວ້າງໃຫຍ່ ແລະ ສວຍງາມນັ້ນ ຄັບແຄບລົງ.
ການຢັ່ງຫາງສຽງປະຊາຊົນ ຊີ້ແນະວ່າ ຂໍ້ລິເລີ້ມ Ecopop ຈະບໍ່ຜ່ານ ການລົງປະຊາມະຕິ
ພ້ອມກັນກັບຂໍ້ສະເໜີອີກ 2 ຂໍ້.
ຂໍ້ສະເໜີສະບັບນຶ່ງ ຮຽກຮ້ອງໃຫ້ ທະນາຄານກາງສະວິດເຊີແລນເພີ້ມຈຳນວນຄຳສຳລອງ
ຂຶ້ນອີກ ໃນຂະນະທີ່ອີກສະເໜີນຶ່ງ ຈະຍົກເລີກ ການຍົກເວ້ນພາສີອັນໃຫຍ່ທີ່ສຸດ ໃຫ້ແກ່
ບັນດາຄົນຕ່າງປະເທດທີ່ຮັ່ງມີ ຊຶ່ງຈະເຮັດໃຫ້ຊື່ສຽງຂອງສະວິດເຊີແລນເສຍຫາຍ ໃນຖານະ ທີ່ເປັນປະເທດບ່ອນຫລົບໜີພາສີນັ້ນ.
