ລົດບັສຄັນນຶ່ງທີ່ບັນທຸກນັກທ່ອງທ່ຽວແບລຢ້ຽມກັບຄືນບ້ານ ຫລັງຈາກໄປແລ່ນສະກີຫິມະໃນຍາມພັກ ໄດ້ເກີດອຸບັດເຫດຕໍາຝາອຸໂມງ ໃນສະວິສເຊີແລນໃນວັນອັງຄານວານນີ້ ເຮັດໃຫ້ພວກນັກທ່ອງທ່ຽວ 28 ຄົນເສຍຊີວິດຮວມທັງເດັກນ້ອຍ 22 ຄົນ.
ອຸບັດເຫດດັ່ງກ່າວເກີດຂຶ້ນໃນຂົງເຂດ Valais ໃກ້ກັບຊາຍແດນອີຕາ ລີ. ພວກນັກທ່ອງທ່ຽວ 24 ຄົນໄດ້ຖືກສົ່ງໄປໂຮງໝໍ. ພວກຄົນຂັບລົດ 2 ຄົນແມ່ນຢູ່ໃນຈໍານວນພວກທີ່ເສຍຊີວິດໄປນັ້ນ.
ຕໍາຫລວດກ່າວວ່າ ລົດບັສທີ່ບັນທຸກຄົນໂດຍສານທັງໝົດ 52 ຄົນ ພ້ອມທັງຄົນຂັບລົດ ໄດ້ເກີດອຸບັດເຫດແລ່ນຕຳຂອບຖະໜົນແລ້ວກໍ ເຈືອກໄປຕໍາຝາອຸໂມງ ຂອງຖະໜົນຫລວງສາຍນຶ່ງ. ພວກຕໍາຫຼວດກ່າວວ່າ ແຮງກະທົບເຮັດໃຫ້ຫົວລົດບັສໄດ້ຮັບຄວາມເສຍຫາຍ ຊຶ່ງເຮັດໃຫ້ຄົນໂດຍສານໃນລົດຈຳນວນນຶ່ງອອກບໍ່ໄດ້ ຈົນຈໍາເປັນຕ້ອງຕັດເບາະນັ່ງຂອງເຂົາເຈົ້າອອກ.
ທ່ານ Elio Di Rupo ນາຍົກລັດຖະມົນຕີແບນລຢ້ຽມເອີ້ນອຸບັດເຫດນີ້ວ່າເປັນມື້ທີ່ນໍາຄວາມໂສກເສົ້າທີ່ສຸດມາໃຫ້ປະຊາຊົນແບລຢ້ຽມທັງປວງ ແລະທ່ານວາງແຜນ ທີ່ຈະບິນໄປຍັງບ່ອນເກີດເຫດໃນວັນພຸດມື້ນີ້.