ທີ່ປະເທດສະວີເດັນ ຕໍາຫລວດທີ່ເມືອງ Gothenburg ທາງກໍ້າຕາເວັນຕົກສຽງໃຕ້ຂອງ ປະເທດ ກ່າວວ່າ ພວກເຂົາເຈົ້າໄດ້ຈັບກຸມສີ່ຄົນ ທີ່ຕ້ອງສົງໃສວ່າ ໄດ້ວາງແຜນທໍາການ ໂຈມຕີກໍ່ການຮ້າຍ.
ການປະກາດຂ່າວການຈັບກຸມດັ່ງກ່າວໄດ້ມີຂຶ້ນ ຫລັງຈາກມີການຍົກຍ້າຍປະຊາຊົນຫລາຍ ຮ້ອຍຄົນອອກຈາກຕຶກ Rodan Sten ຂອງເມືອງ Gothenburg ເມື່ອຕອນແລງວັນ ເສົາວານນີ້. ຕຶກດັ່ງກ່າວເປັນບ່ອນຈັດ ງານສະແດງສິນລະປະ ທຸກໆສອງປີ.
ພວກເຈົ້າໜ້າທີ່ປະຈໍາສູນສິນລະປະກ່າວວ່າ ຕໍາຫລວດໄດ້ສັ່ງໃຫ້ຍົກຍ້າຍພວກຄົນອອກ ຈາກຕຶກດັ່ງກ່າວ ແລະຫລັງຈາກນັ້ນ ພວກຕໍາຫລວດກໍໄດ້ກວດຄົ້ນຕຶກ.
ຕໍາຫລວດບໍ່ໄດ້ໃຫ້ລາຍລະອຽດກ່ຽວກັບພວກສີ່ຄົນທີ່ຖືກຈັບກຸມ ຫລືສະພາບການກ່ຽວກັບ ການຈັບກຸມ.
ເວລານີ້ຍັງບໍ່ເປັນທີ່ແຈ້ງຂາວເທື່ອວ່າ ການຈັບກຸມທີ່ວ່ານີ້ພົວພັນກັບວັນຄົບ ຮອບສິບປີຂອງ ການໂຈມຕີສະຫະລັດອາເມຣິກາ ໂດຍພວກກໍ່ການຮ້າຍ ເມື່ອວັນທີ່ 11 ເດືອນກັນຍາ ປີ 2001 ນັ້ນຫລືບໍ່.
