ຕຳຫຼວດສະວີເດັນ ໄດ້ປ່ອຍໂຕຜູ້ໂດຍສານຄົນນຶ່ງທີ່ຕົນໄດ້ ກັກໂຕໄວ້ໃນເຫດການທີ່ພົວພັນກັບການຂູ່ວ່າ ມີລະເບີດຢູ່ ເທິງເຮືອບິນອາຍພົ່ນໂດຍສານຂອງປາກິສຖານລໍານຶ່ງ ທີ່ ຕ້ອງໄດ້ ປ່ຽນທິດທາງໄປລົງຈອດສຸກເສີນທີ່ນະຄອນຫລວງ ສະຕອັກໂຮມຂອງສະວີເດັນ ໃນຕອນເຊົ້າວັນເສົາວານນີ້.
ຕຳຫຼວດເວົ້າວ່າ ເຮືອບິນປາກິສຖານລໍານັ້ນ ທີ່ມີຜູ້ໂດຍສານແລະລູກເຮືອ 273 ຄົນ ໄດ້ເດີນທາງອອກຈາກການາດາ ໄປຍັງປາກິສຖານ ແຕ່ຖືກສັ່ງໃຫ້ໄປລົງຈອດທີ່ສະວີເດັນ ຫລັງຈາກທີ່ຕໍາຫຼວດການາດາ ໄດ້ຮັບໂທລະສັບຈາກແມ່ ຍິງຄົນນຶ່ງ ທີ່ແຈ້ງວ່າ ຜູ້ໂດຍສານຄົນນຶ່ງ ມີລະເບີດຕິດໂຕ ໃນຖ້ຽວບິນຈາກນະຄອນໂຕຣອນໂຕ ໄປຍັງນະຄອນກາຣາຈີ ນັ້ນ. ເຈົ້າໜ້າທີ່ໄດ້ຍົກຍ້າຍຜູ້ຄົນທັງໝົດອອກຈາກເຮືອບິນ ເພື່ອທໍາການກວດຄົ້ນໂຕ ແລະກໍໄດ້ຄວບຄຸມໂຕຜູ້ໂດຍສານ ຄົນນຶ່ງ ທີ່ເປັນຄົນສັນຊາດການາດາ ເຊື້ອສາຍປາກິສຖານ ໄວ້ສອບປາກຄໍາ.
ການຄົ້ນເຮືອບິນປາກົດວ່າ ບໍ່ໄດ້ພົບເຫັນສິ່ງທີ່ຕ້ອງສົງໄສໃດໆ ແລະ ຫລາຍໆຊົ່ວໂມງຕໍ່ມາ ເຮືອບິນກໍໄດ້ຮັບອະນຸຍາດໃຫ້ເດີນທາງຕໍ່ໄປຍັງປາກິສຖານໄດ້. ຕໍາຫຼວດກ່າວວ່າ ຫຼັງຈາກທີ່ເຮືອບິນອອກເດີນທາງໄປແລ້ວ ຊາຍຄົນທີ່ຖືກກັກໂຕໄວ້ ກໍໄດ້ຖືກປ່ອຍໂຕໂດຍບໍ່ໄດ້ຖືກກ່າວຫາແຕ່ຢ່າງໃດ.
ຕໍາຫຼວດການາດາກ່າວວ່າ ເວລານີ້ ເຂົາເຈົ້າກໍາລັງສືບສວນເຫດການນີ້ ໂດຍຖືວ່າ ອາດຈະເປັນການຫລອກຫລີ້ນຊື່ໆກໍໄດ້. ຕໍາຫຼວດບໍ່ໄດ້ບົ່ງຊື່ຊາຍຜູ້ທີ່ຖືກກັກໂຕ ແຕ່ກໍກ່າວວ່າ ຜູ້ກ່ຽວບໍ່ໄດ້ມີຊື່ຢູ່ໃນບັນຊີດໍາຂອງພວກກໍ່ການຮ້າຍລະຫວ່າງຊາດ.
