ລິ້ງ ສຳຫລັບເຂົ້າຫາ

ທ່ານນາງ ຊູຈີ ຢ້ຽມຢາມ ຄ້າຍອົບພະຍົບເຜົ່າກະຫຼ່ຽງ ໃນໄທ

  • ທອງປານ Thepvongsa

ທ່ານນາງອອງຊານ ຊູຈີ ຂະນະຢ້ຽມຢາມກຄ້າຍອົບພະຍົບກະຫຼ່ຽງແມ່ລາ ຈັງຫວັດແມ່ສອດຂອງໄທ ຊຶ່ງເປັນການຢ້ຽມຢາມບ່ອນສຸດທ້າຍກ່ອນຈະເດີນທາງກັບຄືນມຽນມາ

ທ່ານ​ນາງ​ອອງຊານ ຊູ​ຈີ ຜູ້​ນໍາ​ຝ່າຍ​ຄ້ານ​ຂອງ​ມຽນມາ ​ໄດ້​ສິ້ນ​ສຸດການຢ້ຽມຢາມປະ​ເທດໄທ
ໃນ​ວັນເສົາ​ວານ​ນີ້ ​ໂດຍ​ໄດ້​ໄປ​ຢ້ຽມຢາມ​ຄ້າຍ​ອົບ​ພະຍົບ ກະຫຼ່ຽງ​ແຫ່ງ​ນຶ່ງ​ ​ແຕ່​ທ່ານ​ນາງ​ຜູ້​ນໍາ
​ປະຊາທິປະ​ໄຕ ບໍ່​ສາມາດກ່າວ​ຄໍາ​ປາ​ໃສ​ຕໍ່​ຊາວ​ອົບ​ພະຍົບຕາມ​ທີ່​ໄດ້​ວາງ​ແຜນ​ໄວ້.

ທ່ານ​ນາງ​ອອງຊານ ຊູ​ຈີ ​ໄດ້​ໄປ​ຢ້ຽມຢາມ​ຄ້າຍ​ອົບ​ພະຍົບ​ແມ່​ລາ ທີ່ຈັງ​ຫວັດແມ່​ສອດ​ຂອງ​ໄທ ​
ໃນ​ເຊົ້າ​ວັນ​ເສົາ​ວານ​ນີ້ ຊຶ່ງ​ເປັນ​ບ່ອນ​ສຸດ​ທ້າ​ຍຂອງ ການ​ຢ້ຽມຢາມ​ຕ່າງປະ​ເທດ​ເທື່ອ​ທໍາ​ອິດ​
ຂອງ​ທ່ານ​ນາງ​ ນັບ​ຕັ້ງ​ແຕ່​ປີ 1988 ​ເປັນ​ຕົ້ນ​ມາ ​ເວລາ​ທ່ານ​ນາງ​ກັບ​ເມືອມຽນມາ​ ເພື່ອໄປ​ດູ
​ແລ​ແມ່​ທີ່​ເຈັບປ່ວຍ ໃນ​ເວລາ​ນັ້ນ.

ການ​ຢ້ຽມຢາມ​ທີ່​ມີ​ການ​ຄາດ​ຫວັງ​ໄວ້​ຢ່າງ​ສູງ​ນັ້ນ ສ້າງ​ຄວາມ​ຜິດ​ຫວັງ​ໃຫ້​ແກ່ຊາວ​ອົບພະ​ຍົບ 50,000 ຄົນ ຊື່​ງສ່ວນ​ໃຫຍ່​ເປັນ​ຊາວເຜົ່າ​ກະຫລ່ຽງ ທີ່​ໄດ້​ຫລົບໜີ​ມາຈາກ​ສົງຄາມ​ກາງ​ເມືອງ ທີ່​ມີ​ມາ​ເປັນ​ເວລາ 40 ປີ​ຢູ່ໃນ​ລັດ​ກະຫລ່ຽງ​ນັ້ນ. ​ທາງ​ການ​ຄ້າຍ​ອົບ​ພະ​ຍົບ​ໄດ້​ກຽມເດີ່ນ​ກິລາ​ບານ​ເຕະ​ຂອງ​ຄ້າຍ​ໄວ້ ​ແຕ່​ປາກົດ​ວ່າ​ມີ​ຝຸງ​ຊົນ​ກຸ່ມ​ນ້ອຍ​ ພຽງ​ປະມານ 1,000 ຄົນ ທີ່ໄດ້​ຮັບອະນຸຍາດ​ໃຫ້ເຕົ້າ​ໂຮມ​ກັນ​ຢູ່​ທີ່ເດີ່ນ​ກີລາ ຊຶ່ງມີ​ກໍາລັງ​ທະຫານ ​ແລະ​ກໍາລັງ​ຮັກສາ​ຄວາມ​ປອດ​ໄພ​ຍາມ​ຄຸ້ມ​ກັນ​ຢ່າງ​ໜາ​ແໜ້ນ.

ຄໍາ​ປາໄສ​ຂອງ​ທ່ານ​ນາງ​ອອງຊານ ຊູ​ຈີ ທີ່​ໄດ້​ຕຽມ​ໄວ້​ນັ້ນ ກໍ​ໄດ້​ຖືກ​ຍົກ​ເລີກໄປ ເຊ່ນ​ດຽວ​ກັນ​ກັບການ​ພົບ​ປະກັນ​ກັບ​ບັນດາ​ຜູ້​ນໍາ​ຊົນ​ເຜົ່າ. ​ແຕ່​ແນວ​ໃດ​ກໍ​ດີ ທ່ານນາງ​ກໍ​ໄດ້​ພົບ​ປະ​ກັບ​ບັນດາ​ຜູ້ນໍາ​ຄ້າຍ​ອົບ​ພະຍົບ ​ແລະ​ຈາກ​ນັ້ນ​ກໍ​ໄດ້​ໄປຢ້ຽມ​ຢາມ​ສຸກ​ສາລາ​ແຫ່ງ​ນຶ່ງ​ທີ່​ຕິດ​ກັບ​ເດີ່ນ​ກີລາ ບ່ອນທີ່​ທ່ານ​ນາງ​ໄດ້​ໂອ້ລົມ​ກັບ​ພວກ​ຄົນ​ເຈັບ. ທ່ານ​ນາງ​ໄດ້​ກ່າວ​ຄໍາ​ປາໄສ​ຢ່າງ​ສັ້ນໆ​ກັບ​ຝຸງ​ຊົນ ກຸ່ມ​ນ້ອຍໆ ​ທີ່​ໄດ້​ເຕົ້າ​ໂຮມ​ກັນ​ຢູ່​ອ້ອມຮົ້ວ​ສຸກສາລາ​ດັ່ງກ່າວ ​ແຕ່​ມີ​ພຽງບໍ່​ເທົ່າ​ໃດ​ຄົນໄດ້​ຍິນຄວາມ​ເຫັນ​ຂອງ​ທ່ານ​ນາງ ຍ້ອນ​ວ່າ​ທ່ານ​ນາງບໍ່​ໄດ້​ຮັບ ອະນຸຍາດ​ໃຫ້​ໃຊ້​ໄມ​ໂຄໂຟນ. ຢ່າງ​ໃດ​ກໍ​ຕາມ ​ທ່ານ​ນາງ​ໄດ້​ບອກ​ພວກ​ເຂົາ​ເຈົ້າວ່າ:

“ຂ້າພະ​ເຈົ້າຈະ​ບໍ່​ມີ​ວັນ​ລືມ​ເລືອນ​ພວກ​ທ່ານດອກ ບໍ່​ຕ້ອງ​ເປັນ​ຫ່ວງ ຂ້າພະ​ເຈົ້າຈະພະຍາຍາມ​ທີ່​ສຸດ ​ເພື່ອ​ໃຫ້​ເປັນ​ທີ່​ແນ່​ໃຈ​ວ່າ​ ພວກ​ທ່ານ​ຈະສາມາດ ກັບ​ຕ່າວຄືນ​ບ້ານໄດ້ ໃນ​ບໍ່​ຊ້າ​ນີ້.”

XS
SM
MD
LG