ທ່ານນາງອອງຊານ ຊູຈີ ຜູ້ນໍາປະຊາທິປະໄຕມຽນມາກ່າວວ່າ ທ່ານນາງ ມີຄວາມລະມັດລະວັງໃນການສະໜັບສະໜຸນຂໍ້ສະເໜີໃຫ້ຍົກເລີກການລົງໂທດຂອງສະຫະລັດຕໍ່ມຽນມານັ້ນຢູ່.
ທ່ານນາງອອງຊານ ຊູຈີ ກ່າວອີກວ່າ ທ່ານນາງສະໜັບສະໜຸນຄວາມພະ ຍາຍາມຕ່າງໆໂດຍສະມາຊິກສະພາສູງສະຫະລັດທ່ານ ຈອນ ແມັກເຄນ ເພື່ອໃຫ້ໂຈະການລົງໂທດ ໄວ້ຊົ່ວຄາວກ່ອນ ແທນທີ່ຈະຍົກເລີກໄປເລີຍ. ທ່ານນາງກ່າວຕື່ມວ່າ ນັ້ນມັນອາດຈະສົ່ງຂໍ້ຄວາມ ທີ່ເຂັ້ມແຂງຢ່າງນຶ່ງວ່າ ສະຫະລັດສະໜັບສະໜຸນການເຄຶ່ອນໄຫວໄປສູ່ປະຊາທິປະໄຕຂອງມຽນມາ ແຕ່ຖ້າຍັງບໍ່ໄດ້ຮັບນັ້ນ ພວກເຂົາເຈົ້າກໍຈະຄິດພິດຈາລະນາ ເອົາບາດກ້າວຢ່າງອື່ນ ເພື່ອຊ່ວຍເຫລືອປະຊາຊົນມຽນໃຫ້ບັນລຸເປົ້າໝາຍຂອງພວກເຂົາເຈົ້າໄດ້.
ທ່ານນາງອອງຊານ ຊູຈີ ໄດ້ສະແດງຄວາມຄິດເຫັນຂອງທ່ານນາງເມື່ອ ວັນອັງຄານວານນີ້ ໃນລະຫວ່າງການໂອ້ລົມໂດຍຜ່ານທາງວີດີໂອ ທີ່ຈັດຂຶ້ນໂດຍສະຖາບັນປະທານາທິບໍດີ George W. Bush ທີ່ວໍຊິງຕັນ.
ທ່ານນາງກ່າວຕື່ມວ່າ ລັດຖະບານມຽນມາຈະຕ້ອງຮັບຮູ້ຄວາມມຸ້ງມາດປາດ ຖະໜາຂອງບັນດາຊົນຊາດຊົນເຜົ່າທັງໝົດ ໂດຍກ່າວວ່າ ການຢຸດຍິງເປັນ ພຽງແຕ່ຂັ້ນເລີ່ມຕົ້ນເທົ່ານັ້ນແລະຈະບໍ່ສາມາດແທນການຕົກລົງກັນທາງການເມືອງໄດ້.
ນອກນີ້ ທ່ານນາງອອງຊານ ຊູຈີ ຍັງເວົ້າອີກວ່າ ທ່ານນາງບໍ່ເຫັນພັກຂອງ ທ່ານນາງກົດດັນໃຫ້ມີການແກ້ໄຂໃດໆ ຕໍ່ລັດຖະທໍາມະນູນໂດຍທັນທີ ໃນເມື່ອວ່າສະມາຊິກສະພາຕໍ່າ 25 ຄົນຂອງສະພາແຫ່ງຊາດ ເປັນສະມາຊິກ ຂອງຝ່າຍທະຫານທີ່ບໍ່ໄດ້ຖືກເລືອກຕັ້ງນັ້ນ.