ພວກຫົວຮຸນແຮງ ສັງຫານ 11 ຄົນ ໃນການໂຈມຕີ ຢູ່ ໄນຈີເຣຍ

ຊາວບ້ານ​ຢູ່​ໃນ ​ໄນ​ຈີ​ເຣຍ ກ່າວ​ວ່າ ພວກ​ທີ່​ສົງ​ໄສ​ເປັນ​ກຸ່ມ​ຫົວ​ຮຸນ
​ແຮງ​ອິສລາມ ​ໄດ້​ເປີດ​ສາກ​ຍິງປືນໃສ່​ເຈົ້າ​ໜ້າ​ທີ່​ຕໍາ​ຫລວດແລະ
​ພົນລະ​ເຮືອນ ຢູ່ທີ່​ເມືອງ​ແຫ່ງນຶ່ງ ​ທາງພາກ​ຕາ​ເວັນ​ອອກສຽງ​
ເໜືອ​ຂອງ​ປະ​ເທດ ​ເຮັດ​ໃຫ້​ມີ​ຜູ້​ເສຍ​ຊີ​ວິດ ​ຢ່າງ​ໜ້ອຍ 11 ຄົນ.

ບັນດາ​ຜູ້​ເຫັນ​ເຫດການ​ ກ່າວ​ວ່າ ພວກ​ມື​ປືນ​ໄດ້​ໂຈມ​ຕີ​ເມືອງ
Damboa ຢູ່​ໃນລັດ Borno ​ໃນ​ຕອນ​ແລງ​ຂອງ​ວັນ​ພະຫັດຜ່ານ
​ມາ ໂດຍ​ໄດ້ຍິງປືນໃສ່ຜູ້ຄົນແລະ​ຈູດ​ເຜົາ​ເຮືອນຊານ.

​ໃນ​ຕອນ​ຕົ້ນອາທິດ ພວກ​ທີ່​ສົງ​ໄສເປັນ​ກຸ່ມ​ຫົວ​ຮຸນ​ແຮງອິສລາມ ​ໄດ້​ໂຈມຕີ​ວັດ​ມຸສລິ​ມ ​ແລະອ້ອມ​ບ້ານ​ເຮືອນ​ຂອງ​ປະຊາ​ຊົນ ​ຢູ່ທີ່ເມືອງ​ Konduga ​ໃນ​ລັດ Borno ຄື​ກັນ ໂດຍ​ໄດ້ສັງຫານ​ຢ່າງ​ໜ້ອຍ 47 ຄົນ.

ຍັງບໍ່​ທັນມີ​ກຸ່ມ​ໃດ ອ້າງ​ເອົາ​ຄວາມ​ຮັບຜິດຊອບໃນ​ການ​ໂຈມຕີດັ່ງກ່າວ ​ແຕ່​ເຈົ້າ​ໜ້າທີ່ສົງ​ໄສ​ວ່າ ​ເປັນນໍ້າມື​ຂອງກຸ່ມ​ອິສລາມຫົວ​ຮຸນ​ແຮງ Boko Haram ທີ່ຢູ່​ເບື້ອງຫລັງການ​ກໍ່​ຄວາມຮຸນ​ແຮງ​ເຫຼົ່ານີ້.

ກຸ່ມ Boko Haram ​ໄດ້​ອ້າງ​ເອົາ​ຄວາມ​ຮັບຜິດຊອບ ​ໃນ​ການ​ໂຈມ​ຕີຄັ້ງ​ກ່ອນໆ ​ໃນ​ພາກ​ຕາ​ເວັນອອກສຽງ​ເໜືອ​ຂອງໄນ​ຈີ​ເຣຍ ຮວມ​ທັງ​ວັດ​ມຸສລິ​ມຈໍານວນ​ນຶ່ງ ​ທີ່​ບັນດາ​ອາຈານ ພາກັນ​ປະນາມພວກ​ນັບຖືສາສະໜາ​ແບບ​ຮຸນ​ແຮງ​ຈັດ.