ເຮືອບິນບໍ່ມີຄົນຂັບຫລືໂດຣນ ທີ່ສົງໄສວ່າເປັນຂອງເກົາຫຼີເໜືອຫຼາຍລຳໄດ້ບຸກເຂົ້າໄປໃນເຂດຫນ່ານຟ້າຂອງເກົາຫຼີໃຕ້ ໃນວັນຈັນມື້ນີ້, ອີງຕາມການກ່າວຂອງກອງທັບເກົາຫຼີໃຕ້, ທີ່ໄດ້ຕອບໂຕ້ດ້ວຍເຮືອບິນລົບອາຍພົ່ນ ແລະເຮລິຄັອບເຕີໂຈມຕີ.
ກອງທັບເກົາຫຼີໃຕ້ກ່າວວ່າ ຕົນໄດ້ຍິງປືນເຕືອນ ແລະພະຍາຍາມຍິງເຮືອບິນບໍ່ມີຄົນຂັບຢ່າງໜ້ອຍນຶ່ງລຳຕົກ ແຕ່ໄດ້ອະທິບາຍວ່າສະຖານະການດຳເນີນໄປເປັນເວລາ 6 ຊົ່ວໂມງເຄິ່ງ ຫຼັງຈາກມັນໄດ້ເລີ່ມຂຶ້ນ.
ເຮືອບິນບໍ່ມີຄົນຂັບລຳທຳອິດໄດ້ບິນຂ້າມຜ່ານເສັ້ນຊາຍແດນທາງທະຫານ ຫຼື MDL ໃນເຂດຊາຍແດນຂອງແຂວງກີວຢອງກີ (Gyeonggi) ໃນເວລາ 10:25 ໂມງ ຕອນເຊົ້າຕາມເວລາໃນທ້ອງຖິ່ນ ແລະຈາກນັ້ນກໍມີໂດຣນລຳອື່ນຫລາຍລຳຕາມມາ, ອີງຕາມເຈົ້າໜ້າທີ່ທະຫານເກົາຫຼີໃຕ້. ເຈົ້າໜ້າທີ່ກ່າວອີກວ່າ ຈຳນວນແນ່ນອນຂອງເຮືອບິນບໍ່ມີຄົນຂັບ ແມ່ນຍັງບໍ່ເປັນທີ່ຈະແຈ້ງເທື່ອ ແຕ່ຮູ້ວ່າໜ້ອຍກວ່າ 10 ລຳ.
ເຈົ້າໜ້າທີ່ເກົາຫຼີໃຕ້ກ່າວອີກວ່າ ເຂົາເຈົ້າບໍ່ຮູ້ວ່າ ໂດຣນເຫຼົ່ານັ້ນຖືກຕິດອາວຸດ ຫຼື ບໍ່, ແຕ່ກໍເວົ້າວ່າມັນມີຂະໜາດນ້ອຍ ແລະປາກົດວ່າ ມີລັກສະນະຄ້າຍກັບເຮືອ ບິນບໍ່ມີຄົນຂັບຂອງເກົາຫຼີເໜືອ ທີ່ສ້າງຂຶ້ນແບບປະຖົມປະຖານ ທີ່ພົບເຫັນຢູ່ ໃນເຂດຊາຍແດນຕິດກັບເກົາຫຼີໃຕ້ເມື່ອປີ 2014.
ກອງທັບເກົາຫຼີໃຕ້ ໄດ້ຮີບເລັ່ງເອົາເຮືອບິນລົບອາຍພົ່ນ ແລະ ເຮລິຄັອບເຕີບິນ ຂຶ້ນໄປ ເພື່ອຕອບໂຕ້ການບຸກລຸກໃນວັນຈັນມື້ນີ້. ເຮືອບິນລຳນຶ່ງຂອງເກົາຫຼີໃຕ້ ທີ່ມີສ່ວນຮ່ວມໃນການຕອບໂຕ້ ຊຶ່ງກໍຄືເຮືອບິນໂຈມຕີເບົາ KA-1 ໄດ້ຕົກ ຢູ່ທາງທິດຕາເວັນອອກຂອງນະຄອນຫລວງໂຊລ, ແຕ່ວ່າພວກເຈົ້າໜ້າທີ່ບໍ່ໄດ້ ອະທິບາຍວ່າເປັນຍ້ອນຫຍັງ. ເຈົ້າໜ້າທີ່ກ່າວວ່າບໍ່ມີນັກບິນຄົນໃດໃນເຮືອບິນລຳນັ້ນໄດ້ຮັບບາດເຈັບ.
ກອງທັບເກົາຫຼີໃຕ້ກ່າວວ່າ ໃນເບື້ອງຕົ້ນ ຕົນບໍ່ໄດ້ພະຍາຍາມທີ່ຈະຍິງເຮືອບິນບໍ່ມີຄົນຂັບໃຫ້ຕົກ ຍ້ອນຄວາມເປັນຫ່ວງກ່ຽວກັບອັນຕະລາຍຕໍ່ພົນລະເຮືອນ.
ເຈົ້າໜ້າທີ່ກ່າວວ່າ ເຮືອບິນບໍ່ມີຄົນຂັບທີ່ສົງໄສວ່າເປັນຂອງເກົາຫຼີເໜືອໄດ້ຖືກພົບເຫັນຢູ່ໃນເຂດຊາຍແດນຫຼາຍແຫ່ງ ໃນພາກຕາເວັນອອກສຽງເໜືອຂອງເກົາຫຼີໃຕ້, ລວມທັງເກາະກາງກວາ (Ganghwa), ກິມໂປ (Gimpo), ແລະ ປາຈູ (Paju). ໂດຣນລຳນຶ່ງໄດ້ບິນຜ່ານນະຄອນຫຼວງໂຊລ ຂອງເກົາຫລີໃຕ້ເປັນເວລາສັ້ນໆ ອີງຕາມອົງການຂ່າວ News 1.