ໃນອາທິດນີ້, ລັດຖະບານກໍາປູເຈຍ ໄດ້ເຫັນວ່າ ມີການສະໜັບສະໜູນຫຼວງຫຼາຍລັ່ງໄຫລເຂົ້າມາຈາກບັນດານັກຂ່າວ, ບັນດາກຸ່ມສື່ມວນຊົນ ແລະບັນດາສະຖານທູດ ໃຫ້ແກ່ ທ່ານ ເມກ ດາຣາ, ເຊິ່ງເປັນນຶ່ງໃນບັນດານັກຂ່າວອິດສະຫຼະຄົນສຸດທ້າຍຂອງປະເທດ, ຜູ້ທີ່ຖືກຈັບໂຕເມື່ອໄວໆມານີ້ ແລະ ຖືກກ່າວໂທດວ່າ ທໍາການປຸກລະດົມ.
ສະຖານທູດສະຫະລັດປະຈໍາກຳປູເຈຍ ໄດ້ອອກມາໂພສ ໃນເວທີສື່ສັງຄົມ X ວ່າ ຕົນມີຄວາມວິຕົກກັງວົນຢ່າງໜັກຕໍ່ການຈັບກຸມໃນວັນຈັນແລ້ວນີ້ ແລະຮຽກຮ້ອງໃຫ້ປ່ອຍໂຕ ທ່ານ ເມກ ດາຣາ.
ສະຖານທູດໄດ້ທໍາການໂພສລົງໃນສື່ສັງຄົມ X ໂດຍໃຫ້ຂໍ້ສັງເກດວ່າ ລາວໄດ້ຮັບການມອບລາງວັນໃຫ້ ໂດຍລັດຖະມົນຕີການຕ່າງປະເທດສະຫະລັດ ທ່ານ ແອນໂທນີ ບລິງເກັນ ໃນປີແລ້ວນີ້ ສໍາລັບວຽກງານຂອງລາວ ໃນການດໍາເນີນງານເພື່ອຕ້ານການຄ້າມະນຸດ.
ສະຖານທູດກ່າວໂດຍພັນລະນາເຖິງ ທ່ານ ດາຣາ ວ່າ ເປັນຜູ້ສະໜັບສະໜູນສິດເສລີໃນການສະແດງອອກ ເຊິ່ງໄດ້ຮັບການຮັບປະກັນໃນລັດຖະທຳມະນູນຂອງກຳປູເຈຍ, ພວກເຮົາຂໍສະໜັບສະໜູນໃຫ້ໜ່ວຍງານທີ່ກ່ຽວຂ້ອງ ດ້ວຍການນໍາໃຊ້ສຽງທີ່ແຕກຕ່າງກັນ ແລະສົ່ງເສີມເສລີພາບຂອງອົງການຂ່າວ ອິດສະຫຼະ.”
ອົງການຂ່າວຂອງລັດຖະບານກຳປູເຈຍ ຢືນຢັນວ່າ ທ່ານ ດາຣາ ອາຍຸ 36 ປີ, ຖືກກ່າວໂທດໃນຂໍ້ຫາປຸກລະດົມ ທີ່ພົວພັນກັບການປະກາດໃນສື່ສັງຄົມທີ່ລາວໄດ້ໂພສລົງ ເມື່ອທ້າຍເດືອນກັນຍາທີ່ຜ່ານມານີ້. ປັດຈະບັນ, ລາວຖືກກັກຂັງໄວ້ກ່ອນການພິຈາລະນາຄະດີ ແລະສາມາດປະເຊີນກັບການຕິດຄຸກຮອດ 2 ປີ ໃນຂໍ້ຫາທີ່ລາວກະທຳຜິດ.
ສື່ມວນຊົນທ້ອງຖິ່ນໄດ້ອ້າງຈາກຄຳເວົ້າຂອງສະມາຊິກຄອບຄົວຄົນນຶ່ງ ທີ່ກ່າວວ່າ ລົດຂອງ ທ່ານ ດາຣາ ຖືກຄັດຂວາງໃນຂະນະທີ່ລາວກຳລັງເດີນທາງຈາກນະຄອນສີຫານຸກວີລ ໄປຫານະຄອນຫຼວງພະນົມເປັນ ແລະເຈົ້າໜ້າທີ່ຕໍາຫຼວດເດີນທາງມາຮອດ ດ້ວຍຍານພາຫະນະຕໍາຫຼວດທະຫານ ພ້ອມດ້ວຍຍານພາຫະນະອື່ນໆອີກ 5 ຄັນ. ຍາດພີ່ນ້ອງກ່າວວ່າ ເຈົ້າໜ້າທີ່ຕຳຫຼວດໄດ້ອ້າງເຖິງໃບຈັບກຸມ, ຍຶດເອົາໂທລະສັບຂອງ ທ່ານ ດາຣາ ແລະໄດ້ຂໍໃຫ້ສະມາຊິກຄອບຄົວຂອງ ທ່ານ ດາຣາ ນັ່ງລໍຖ້າຢູ່ໃນລົດ.
