ລິ້ງ ສຳຫລັບເຂົ້າຫາ

ວັນຈັນ, ໑໕ ກໍລະກົດ ໒໐໒໔

ການສະໜັບສະໜູນຢູເຄຣນ ແມ່ນຈຸດສຳຄັນ ໃນຂະນະທີ່ ເນໂຕ້ ເປີດກອງປະຊຸມສຸດຍອດໃນ ວໍຊິງຕັນ


ປ້າຍກອງປະຊຸມ ຖືກ​ເຫັນ​ຢູ່​ນອກ​ສູນ​ປະຊຸມ Walter E. Washington,ທີ່ຖືກ​ດ້ວຍຕິດ​ປ້າຍກອງປະຊຸມ ກ່ອນ​ກອງ​ປະຊຸມ​ສຸດ​ຍອດ​ຂອງ​ນາ​ໂຕ້, ວັນ​ທີ 8 ກໍລະກົດ 2024.
ປ້າຍກອງປະຊຸມ ຖືກ​ເຫັນ​ຢູ່​ນອກ​ສູນ​ປະຊຸມ Walter E. Washington,ທີ່ຖືກ​ດ້ວຍຕິດ​ປ້າຍກອງປະຊຸມ ກ່ອນ​ກອງ​ປະຊຸມ​ສຸດ​ຍອດ​ຂອງ​ນາ​ໂຕ້, ວັນ​ທີ 8 ກໍລະກົດ 2024.

ອົງການ ເນໂຕ້ ຈະເລີ່ມ​ກອງ​ປະຊຸມ​ສຸດ​ຍອດ​ໃນ​ວັນ​ອັງຄານ​ມື້​ນີ້ ທີ່​ນະຄອນ ຫຼວງ​ວໍ​ຊິງ​ຕັນ ດ້ວຍ​ການສະໜັບສະໜູນສຳ​ລັບ​ການ​ຕໍ່ສູ້​ຂອງ​ຢູ​ເຄຣນ ຕໍ່​ການ​ຮຸກຮານ​ຂອງຣັດ​ເຊຍ ເປັນວາລະສູງ​ສຸດ​ໃນ​ກອງ​ປະ​ຊຸມ.

ຄາດ​ວ່າ​ບັນດາ​ຜູ້ນຳ​ຂອງອົງການ ເນໂຕ້ ​ຈະ​ສຳ​ເລັດ​ແຜນການ​ທີ່​ຈະ​ນຳ​ເອົາ​ສິ່ງ​ທີ່​ ປະຈຸບັນ ເປັນ​ຄວາມ​ພະຍາຍາມ​ລະດັບ​ຊາດ​ຂອງແຕລະ​ປະເທດ ເພື່ອ​ໃຫ້ການ​ຊ່ວຍ​ເຫຼືອ​ກອງທັບ​ຂອງ​ຢູ​ເຄຣນ ​ເຂົ້າສູ່​ໂຄງການ​ນຶ່ງທີ່ ເນໂຕ້ ປະສານ​ງານ​ ​ເພື່ອ​ສະໜອງການຊ່ວຍເຫຼືອໃຫ້ແກ່ກອງ​ກຳລັງຂອງ​ຢູ​ເຄຣນ.

ການ​ຊ່ວຍ​ເຫຼືອ​ດັ່ງກ່າວ ​ຍັງ​ຖືກກຳນົດໃຫ້​ຂະຫຍາຍອອກ​ໄປພ້ອມກັບ​ການ​ໃຫ້​ຄຳ​ໝັ້ນ​ສັນຍາ​ໃໝ່ ກ່ຽວກັບ​ລູກປືນ, ​ການປ້ອງ​ກັນໄພທາງ​ອາກາດ ​ແລະ​ການ​ຊ່ວຍ​ເຫລືອ​ອື່ນໆ ​ເພື່ອ​ຕອບ​ສະໜອງ​ຄຳຮ້ອງຂໍ ​ຊ້ຳ​ແລ້ວ​ຊ້ຳ​ອີກ​ຂອງ​ຜູ້ນຳ​ຢູ​ເຄຣນ ທີ່​ກ່າວ​ວ່າ ພວກເຂົາ​ຕ້ອງການ​ການຊ່ວຍ​ເຫລືອເພີ້ມຕື່ມ ​ເພື່ອ​ປ້ອງ​ກັນນ່ານ​ຟ້າ​ຂອງ​ປະ​ເທດຂອງພວກ​ເຂົາ ​ຈາກ​ການ​ໂຈມ​ຕີ​ທາງ​ອາກາດ ​ແລະເພື່ອ​ຂັບໄລ່​ກອງກຳລັງຂອງຣັດ​ເຊຍຕາມແນວໜ້າ ອອກໄປ.

ກອງ​ປະ​ຊຸມ​ສຸດຍອດດັ່ງກ່າວ ​ຍັງ​ຈະ​ກ່າວ​ເຖິງ​ເສັ້ນ​ທາງ​ຂອງ​ຢູ​ເຄຣນ​ໃນ​ການ​ເຂົ້າ​ເປັນ​ສະ​ມາ​ຊິກ​ຂອງ​ນາ​ໂຕ້.

ກອງ​ປະຊຸມ​ໃນ​ວັນ​ອັງຄານ​ມື້​ນີ້ ລວມມີ​ການ​ປະຊຸມ​ໂຕະ​ມົນ​ກ່ຽວ​ກັບ​ແມ່ຍິງ, ສັນຕິພາບ ​ແລະ​ຄວາມ​ໝັ້ນຄົງ ທີ່​ເປັນ​ເຈົ້າພາບ​ໂດຍ​ລັດຖະມົນຕີ​ການ​ຕ່າງປະ​ເທດ​ສະຫະລັດ ທ່ານ ແອນໂທນີ ບລິງເກັນ.

​ເລຂາທິການ​ໃຫຍ່ ອົງການ ເນໂຕ້ ທ່ານ ເຈັນສ໌ ສໂຕລເຕັນເບີກ ມີ​ກຳນົດ​ຈະ​ກ່າວ​ເຖິງກອງ​ປະຊຸມ​ຂອງບັນດາ​ຜູ້ນຳ​ອຸດສາຫະກຳ​ປ້ອງ​ກັນ​ປະ​ເທດ ​ແລະ ບັນດາ​ເຈົ້າ​ໜ້າ​ທີ່​ຈາກ​ບັນດາ​ປະ​ເທດ​ສະມາຊິກ ເນໂຕ້, ​ໂດຍຈະມີ​ການ​ປຶກສາ​ຫາລື​ກ່ຽວ​ກັບ​ວິທີເພີ້ມ​ການ​ຜະລິດ​ດ້ານ​ການ​ປ້ອງ​ກັນ​ປະ​ເທດ​ໃນ​ຂະນະ​ທີ່​ສົງຄາມ​ ຢູ່ໃນ ຢູ​ເຄຣນ ດຳ​ເນີນຕໍ່ໄປ.

ການຂະຫຍາຍການຜະລິດ ແລະ ການເສີມກຳລັງອາວຸດຍຸດໂທປະກອນ ແລະ ລູກປືນ ຄືນໃໝ່ ແມ່ນຈຸດສຸມຂອງບັນດາພັນທະມິດຂອງອົງການນາໂຕ້ ໃນຂະນະທີ່ພວກເຂົາ ພະຍາຍາມ ທັງສະໜັບສະໜູນກອງທັບຂອງຢູເຄຣນ ແລະ ຮັບປະກັນວ່າພັນທະມິດ ຈະມີສິ່ງທີ່ຈຳເປັນສຳລັບການປ້ອງກັນຕົນເອງ.

ປະທານາທິບໍດີ ໄບເດັນ ຂອງສະຫະລັດ ຈະ​ກ່າວ​ຄຳ​ປາ​ໄສ​ໃນ​ວັນ​ອັງຄານ​ມື້​ນີ້ ​ເພື່ອ​ສະ​ເຫຼີ​ມສະຫຼອງ​ວັນ​ຄົບຮອບ 75 ປີ​ຂອງ​ອົງການ ເນໂຕ້.

ອ່ານຂ່າວເປັນພາສາອັງກິດ:

ຟໍຣັມສະແດງຄວາມຄິດເຫັນ

XS
SM
MD
LG