ທ່ານ Romney ໄດ້ຊະນະອະດີດສະມາຊິກສະພາສູງຈາກລັດ Pennsylvania ທ່ານ
Rick Santorum ດ້ວຍຄະແນນສຽງໃກ້ຄຽງກັນຫຼາຍ ຢູ່ທີ່ລັດ Ohio ຊຶ່ງເປັນລັດທີ່ມີ
ການແຂ່ງຂັນກັນຢ່າງດຸເດືອດສຸດ ໃນຈຳນວນທັງໝົດ 10 ລັດທີ່ມີການເລືອກຕັ້ງຂັ້ນຕົ້ນ
ແລະກອງປະຊຸມຄັດເລືອກຜູ້ສະມັກຂອງພັກໃນມື້ວານນີ້ ທີ່ເອີ້ນກັນວ່າ Super Tues-
day.
ນອກນັ້ນທ່ານ Romney ຍັງໄດ້ຮັບໄຊຊະນະທີ່ລັດຂອງທ່ານຄືລັດ Massachusetts
ກັບລັດ Virginia ລັດ Vermont ແລະລັດ Idaho ນຳດ້ວຍ.
ດ້ວຍໄຊຊະນະດັ່ງກ່າວ ທ່ານ Romney ໄດ້ເສີມຂະຫຍາຍການມີຄະແນນນຳໜ້າກ່ຽວ
ກັບຈຳນວນຜູ້ຕາງໜ້າພັກນັ້ນລື່ນທ່ານ Santorum ແລະຜູ້ສະມັກຂອງພັກຣີພັບບລີກັນ
ອີກ 2 ຄົນຄືອະດີດປະທານສະພາຕໍ່າສະຫະລັດ ທ່ານ Newt Gingrich ແລະສະມາ
ຊິກສະພາຕໍ່າຈາກລັດເທັກຊັສ ທ່ານ Ron Paul.
ການຢັ່ງຫາງສຽງພວກທີ່ໄປປ່ອນບັດ ສະແດງໃຫ້ເຫັນວ່າ ທ່ານ Romney ໄດ້ຮັບຄະ
ແນນສຽງສະໜັບສະໜຸນ ຫຼາຍທີ່ສຸດ ຈາກບັນດາຜູ້ມີສິດປ່ອນບັດ ນິຍົມແນວທາງປານ
ກາງຂອງພັກຣີພັບບລີກັນທີ່ພວມຊອກສະແຫວງຫາຜູ້ສະມັກທີ່ເຂັ້ມແຂງເພື່ອໄປແຂ່ງກັບ
ປະທານາທິບໍດີບາຣັກ ໂອບາມາ ໃນເດືອນພະຈິກປີນີ້.
ທ່ານ Romney ໄດ້ກ່າວຕໍ່ພວກສະໜັບສະໜຸນ ທີ່ສຳນັກງານໂຄສະນາຫາສຽງຂອງ
ທ່ານ ຢູ່ລັດ Massachusetts ໃນຄືນວານນີ້.
ທ່ານ Romney ເວົ້າວ່າ “ສຳຫຼັບຊາວອາເມຣິກັນຫຼາຍລ້ານຄົນ ທີ່ເບິ່ງໄປອ້ອມ
ຂ້າງ ແລະສາມາດເຫັນແຕ່ ວຽກງານຕ່າງໆ ທີ່ພວກເຂົາເຈົ້າ ບໍ່ສາມາດເຂົ້າ
ໄປເຮັດໄດ້ແລະຄ່າໃຊ້ຈ່າຍຕ່າງໆ ທີ່ພວກເຂົາເຈົ້າບໍ່ສາມາດຈ່າຍໄດ້ນັ້ນ ຂ້າ
ພະເຈົ້າມີສານ ສຳຫຼັບພວກທ່ານ. ພວກທ່ານບໍ່ໄດ້ປະສົບກັບຄວາມລົ້ມແຫຼວ
ດອກ ແຕ່ພວກທ່ານມີປະທານາທິບໍດີທີ່ເຮັດໃຫ້ພວກທ່ານຜິດຫວັງ ແລະນັ້ນ
ແມ່ນກຳລັງຈະມີ ການປ່ຽນແປງແລ້ວ.”
ເຖິງແມ່ນໄດ້ເສຍໄຊຢ່າງຫວຸດຫວິດທີ່ລັດ Ohio ກໍຕາມ ແຕ່ທ່ານ Santorum ກໍໄດ້
ຮັບໄຊຊະນະຈຳນວນນຶ່ງ ໃນວັນອັງຄານວານນີ້ ຮວມທັງໄຊຊະນະທີ່ລັດ Tennessee
ລັດ Oklahoma ແລະ ລັດ Dakota ເໜືອ. ການໄດ້ຮັບຄະແນນສຽງສະໜັບສະໜຸນ
ຢ່າງແຂງຂັນຂອງທ່ານ Santorum ໃນບັນດາລັດເຫຼົ່ານີ້ ໃຫ້ສັນຍານວ່າການແຂ່ງຂັນ
ຂອງພັກຣີພັບບລີກັນມີທ່າທາງວ່າ ຍັງຈະດຳເນີນຕໍ່ໄປອີກຢ່າງນ້ອຍເປັນເວລາຫຼາຍໆອາ
ທິດ.
ທ່ານ Santorum ຍັງສືບຕໍ່ໄດ້ຮັບສຽງສະໜັບສະໜຸນ ຈາກບັນດາຜູ້ມີສິດປ່ອນບັດນິຍົມ
ແນວທາງເດີມໂດຍສະເພາະແລ້ວພວກທີ່ມີຄວາມວິຕົກກັງວົນກ່ຽວກັບບັນຫາດ້ານສັງຄົມ
ແລະການຕັດອຳນາດຂອງລັດຖະບານກາງໃຫ້ຫຼຸດນ້ອຍລົງ.
ທ່ານ Santorum ໄດ້ກ່າວຕໍ່ພວກສະໜັບສະໜຸນທ່ານທີ່ລັດ Ohio.
ທ່ານ Santorum ເວົ້າວ່າ “ພວກເຮົາບໍ່ແມ່ນປະເທດທີ່ຍິ່ງໃຫຍ່ຍ້ອນວ່າພວກ
ເຮົາມີລັດຖະບານທີ່ຍິ່ງໃຫຍ່ ແລະມີຄວາມເຂັ້ມແຂງ. ພວກເຮົາເປັນປະເທດ
ທີ່ຍິ່ງໃຫຍ່ ຍ້ອນພວກເຮົາ ມີຄວາມເຊື່ອວ່າ ສິດທິຕ່າງໆບໍ່ໄດ້ມາຈາກລັດຖະ
ບານ ແຕ່ດັ່ງທີ່ບັນທຶກໄວ້ໃນເອກະສານສ້າງຕັ້ງປະເທດ ກໍຄືຄຳປະກາດເອກະ
ລາດຂອງສະຫະລັດນັ້ນ ແມ່ນວ່າ ພວກເຮົາໄດ້ຮັບສິດທິຂອງພວກເຮົາຈາກ
ພະຜູ້ເປັນເຈົ້າ."
ສ່ວນທ່ານ Newt Gingrich ໄດ້ຟື້ນໂຕຄືນເລັກນ້ອຍ ໃນວັນອັງຄານວານນີ້ ໂດຍໄດ້
ຮັບໄຊຊະນະໃນອະດີດລັດບ້ານເກີດຂອງທ່ານຄືລັດຈໍເຈຍ ແຕ່ທ່ານບໍ່ສາມາດຂະຫຍາຍ
ຂອບເຂດຂອງຄວາມສຳເລັດຂອງທ່ານໄປສູ່ລັດພາກໃຕ້ອື່ນໆໄດ້ເຊັ່ນລັດ Tennessee
ແລະລັດ Oklahoma ຊຶ່ງທັງສອງລັດນີ້ໄດ້ຊະນະໂດຍທ່ານ Santorum.
ທ່ານ Ron Paul ມີຄະແນນສຽງລາກທ້າຍໝູ່ ຢູ່ໃນບັນດາລັດສ່ວນໃຫຍ່ທີ່ມີການແຂ່ງ
ຂັນກັນທີ່ເອີ້ນກັນວ່າ Super Tuesday ໃນວັນອັງຄານວານນີ້ ແຕ່ທ່ານກໍຍັງຈະສືບຕໍ່
ດຳເນີນການແຂ່ງຂັນຕໍ່ໄປ ເຖິງແມ່ນທ່ານບໍ່ໄດ້ຮັບໄຊຊະນະຫຍັງຫຼາຍກໍຕາມ.
ການແຂ່ງຂັນໃນ 10 ລັດ ໃນວັນອັງຄານວານນີ້ ແມ່ນເພື່ອຍາດແຍ່ງເອົາຜູ້ຕາງໜ້າໄປ
ຮ່ວມໃນກອງປະຊຸມຫລວງຂອງພັກຣີພັບບລີກັນ ຈໍານວນຫຼາຍກວ່າ 400 ຄົນ ຊຶ່ງເປັນ
ການແຂ່ງຂັນພາຍໃນມື້ດຽວທີ່ໃຫຍ່ທີ່ສຸດ ໃນການເລືອກຕັ້ງຂັ້ນຕົ້ນຂອງພັກຣີພັບບລິກັນ
ທີ່ເລີ້ມມາແຕ່ເດືອນມັງກອນແລະຈະສິ້ນສຸດລົງໃນເດືອນມິຖຸນາຈະມາເຖິງນີ້.
ຜູ້ທີ່ຢາກສະມັກເລືອກຕັ້ງປະທາ
ນາທິບໍດີ ຂອງພັກຣີພັບບລິກັນ
ນັ້ນ ຈະຕ້ອງໄດ້ຮັບສຽງສະໜັບ
ສະໜຸນຈາກຜູ້ຕາງໜ້າ ໃນກອງ
ປະຊຸມພັກຈໍານວນ 1,144 ຄົນ
ຈຶ່ງຈະໄດ້ຮັບການແຕ່ງຕັ້ງ ຈາກ
ພັກ ແລະຫຼັງຈາກນັ້ນສະມາຊິກ
ພັກຣີພັບບລີກັນກໍສະເໜີຊື່ແຕ່ງ
ຕັ້ງຜູ້ສະມັກຢ່າງເປັນທາງການຢູ່
ທີ່ກອງປະຊຸມຫຼວງຂອງພັກ ທີ່
ນະຄອນ Tampa ໃນລັດຟລໍຣິ
ດາ ໃນເດືອນສິງຫາປີນີ້.