ບັນດາເຈົ້າໜ້າທີ່ທະຫານອີຣັກກ່າວວ່າ ພວກນັກລົບຊົນເຜົ່າ
ຊູນນີ່ຊ່ອຍ ໃນການຄວບຄຸມພື້ນທີ່ໃນເມືອງ Ramadi ຫຼັງຈາກ
ທີ່ກອງທັບບົກໄດ້ຂັບໄລ່ ພວກຫົວຮຸນແຮງລັດອິສລາມ ອອກໄປ
ຈາກບໍລິເວນສ່ວນໃຫຍ່ ຂອງເມືອງສຳຄັນດັ່ງກ່າວ ທີ່ຕັ້ງຢູ່ທາງ
ພາກຕາເວັນຕົກຂອງນະຄອນຫຼວງ Baghdad.
ຍັງມີ ກຸ່ມນ້ອຍຈຳນວນໜຶ່ງ ທີ່ຕໍ່ສູ້ຕ້ານຢັນ ຢູ່ໃນເມືອງ Ramadi
ຫຼັງຈາກທີ່ກຳລັງຂອງອີຣັກ ທີ່ໜູນຫຼັງໂດຍການໂຈມຕີທາງອາກາດ
ຂອງແນວໂຮມ ພາຍໃຕ້ການນຳພາໂດຍສະຫະລັດ ໃນໄລຍະ
ອາທິດໜຶ່ງທີ່ຜ່ານມາ ໄດ້ເປີດສາກບຸກໂຈມຕີເພີ້ມຂຶ້ນ ເພື່ອເຂົ້າ
ຢຶດເອົາສູນກາງໂຮງການລັດຖະບານຄືນ ແລະ ການເດີນທາງໄປ
ຢ້ຽມຢາມ ໃນວັນອັງຄານ ວານນີ້ ຂອງນາຍົກລັດຖະມົນຕີ ອີຣັກ ທ່ານ Haider al-Abadi.
ເຊີນຊົມ ວີດີໂອ ລາຍງານຂອງວີໂອເອ
ໂຄສົກທ່ານນຶ່ງ ຂອງກຸ່ມແນວໂຮມ ພັນເອກ Steve Warren ແຫ່ງ ກອງທັບສະຫະລັດ
ໄດ້ກ່າວ ໃນວັນອັງຄານວານນີ້ ວ່າ ຍັງມີພວກນັກລົບລັດອິສລາມ 150 ຫາ 250 ຄົນ ຫລົງ
ເຫຼືອຢູ່ ຊຶ່ງຫລຸດລົງຈາກຈຳ ນວນສູງສຸດ 1,000 ຄົນ. ທ່ານກ່າວຕື່ມວ່າ ໄດ້ມີການໂຈມຕີ
ທາງອາ ກາດຫຼາຍກວ່າ 600 ຖ້ຽວ ຢູ່ອ້ອມແອ້ມເມືອງ Ramadi ໃນລະຫວ່າງ 6 ເດືອນ
ທີ່ຜ່ານມາ.
ບັນດາເຈົ້າໜ້າທີ່ ອີຣັກ ແລະ ສະຫະລັດ ໄດ້ກ່າວວ່າ ພວກນັກລົບຊູນນີ່ ບໍ່ມີບົດບາດຫຍັງ
ຫຼາຍ ໃນການເຂົ້າຢຶດເອົາເມືອງ Ramadi ຄືນມາ ແຕ່ໃນວັນພຸດມື້ນີ້ ໄດ້ຄວບຄຸມບໍລິເວນ
ຕ່າງໆທີ່ໄດ້ຖືກປົດປ່ອຍແລ້ວນັ້ນ. ກຳລັງຊົນເຜົາຊູນນີ່ ແມ່ນມີບົດບາດສຳຄັນໃນຄວາມ
ສຳເລັດຕໍ່ສູ້ຕ້ານຢັນພວກນັກລົບອິສລາມ ຂອງສະຫະລັດ ຢູ່ໃນຂົງເຂດດັ່ງກ່າວ ໃນໄລຍະ
ປີ 2006 ແລະ 2007 ຜ່ານມາ ແລະ ຫຼາຍຄົນມອງເຫັນຄວາມຈຳເປັນ ໃນການໃຊ້ນັກລົບ
ໃນທ້ອງຖິ່ນ ເພື່ອທີ່ຈະສາມາດຢືນຂຶ້ນຕໍ່ສູ້ກັບການຂົ່ມຂູ່ຂອງພວກລັດອິສລາມ.
ທ່ານ Abadi ໄດ້ປະຕິຍານວ່າ ເປົ້າໝາຍຕໍ່ໄປ ກໍແມ່ນເມືອງ Mosul ເມືອງໃຫຍ່ອັນດັບ
ສອງຂອງອີຣັກ ບ່ອນທີ່ຊາວຊູນນີ່ ເປັນຄົນກຸ່ມໃຫຍ່ນັ້ນ. ກຸ່ມລັດອິສລາມ ໄດ້ເຂົ້າຄວບຄຸມ
ເມືອງນີ້ ນັບຕັ້ງແຕ່ເດືອນມິຖຸນາ ປີ 2014 ເປັນຕົ້ນມາ ໃນເວລາກຸ່ມດັ່ງກ່າວ ໄດ້ເຄື່ອນໄຫວ
ບຸກເຂົ້າຢຶດເອົາພື້ນທີ່ອັນກວ້າງໃຫຍ່ ຢູ່ທາງພາກເໜືອ ແລະພາກຕາເວັນຕົກຂອງ ອີຣັກ
ແລະ ທາງພາກຕາເວັນອອກຂອງຊີເຣຍ ຢ່າງສາຍຟ້າແລບ.
ຢູ່ທາງພາກເໜືອ ແລະ ພາກຕາເວັນອອກຂອງເມືອງ Mosul ກຳລັງຊາວເຄີດກໍປະສົບ
ຄວາມສຳເລັດໃນການຂັບໄລ່ພວກລັດອິສລາມອອກໄປ ແຕ່ພວກເຂົາເຈົ້າມີຄວາມເປັນ
ຫ່ວງ ໃນການປະຕິບັດການຢູ່ນອກພື້ນທີ່ອັນດັ້ງເດີມຂອງພວກເຂົາເຈົ້າ.
