ສະຫະລັດໄດ້ປະນາມ ໂດຍໃຊ້ຄຳເວົ້າທີ່ແຮງສຸດ ຕໍ່ການໂຈມຕີດ້ວຍລະເບີດ 2 ຄັ້ງຊ້ອນ ທີ່ເກີດຂຶ້ນຢູ່ທາງເຂົ້າໃຫຍ່ສະໜາມບິນນະຄອນຫຼວງ Mogadishu ໃນລະຫວ່າງຊົ່ວໂມງເຂົ້າການຕອນເຊົ້າຂອງວັນອັງຄານວານນີ້ ທີ່ເຮັດໃຫ້ມີຜູ້ເສຍຊີິວິດຢ່າງໜ້ອຍ 13 ຄົນ.
ໂຄສົກສະພາຄວາມໝັ້ນຄົງແຫ່ງຊາດຂອງສະຫະລັດ ທ່ານ Ned Price ກ່າວ ໃນວັນອັງ ຄານວານນີ້ວ່າ ສະຫະລັດແມ່ນຢືນຢູ່ຄຽງຂ້າງກັບໂຊມາເລຍແລະພາຄີຂອງພວກເຮົາໃນການຕໍ່ສູ້ ຕ້ານການກະທຳທີ່ຕ່ຳຊ້າ ຂອງພວກກໍ່ການຮ້າຍ ທີ່ຊອກຫາຊ່ອງທາງເພື່ອສ້າງຄວາມບໍ່ທຸ່ນທ່ຽງໃນໂຊມາເລຍ. ທ່ານກ່າວວ່າສະຫະລັດຍັງມີຄວາມໝາຍໝັ້ນທີ່ຈະຊ່ອຍໃຫ້ໂຊມາເລຍກ້າວໄປໜ້າຕາມເສັ້ນທາງສູ່ສັນຕິພາບແລະຄວາມອຸດົມຮັ່ງມີພ້ອມທັງເອົາຊະນະກຸ່ມກໍ່ການຮ້າຍຕ່າງໆນຳດ້ວຍ.
ກຸ່ມ Al-Shabab ຊຶ່ງເປັນເຄືອຂ່າຍຂອງພວກກໍ່ການຮ້າຍ al-Qaida ໃນໂຊມາເລຍໄດ້ ອ້າງເອົາຄວາມຮັບຜິດຊອບໃນການໂຈມຕີຜ່ານທາງສະຖານີວິທະຍຸ Andalus ຂອງກຸ່ມ ດັ່ງກ່າວ. ພວກເຈົ້າໜ້າທີ່ຮັກສາຄວາມປອດໄພກ່າວວ່າ 7 ຄົນ ຂອງຈຳນວນພວກທີ່ເສຍຊີວິດທັງໝົດ 13 ຄົນນັ້ນ ແມ່ນຍາມຂອງອົງການສະຫະປະຊາຊາດ.
ທາງເຂົ້າສະໜາມບິນ ທີ່ເປັນເປົ້າໃນການໂຈມຕີດ້ວຍລະເບີດຄັ້ງນີ້ ແມ່ນໄດ້ຖືກໃຊ້ໂດຍ ພວກພະນັກງານທີ່ເຮັດວຽກຢູ່ສະໜາມບິນເປັນປະຈຳແລະຕັ້ງຢູ່ໃກ້ກັບຕຶກຂອງອົງການ ສະຫະປະຊາຊາດ ແລະສະຫະພາບອາຟຣິກາ ທີ່ຕິດກັບສະໜາມບິນນັ້ນ.
ປະຊາຊົນ ທີ່ອາໄສຢູ່ໃນບໍລິເວນນັ້ນ ລາຍງານວ່າ ໄດ້ຍິນສຽງລະເບີດ ແຕກຂຶ້ນຢ່າງແຮງ 2 ຄັ້ງໃນເວລາປະມານ 9 ໂມງເຊົ້າຕາມເວລາທ້ອງຖິ່ນ.
ອີງຕາມການລາຍງານ ຈາກຜູ້ທີ່ອາໄສຢູ່ໃນບໍລິເວນດັ່ງກ່າວແລ້ວ ຜູ້ໂຈມຕີດ້ວຍລະເບີດ ສະຫຼະຊີບໄດ້ພະຍາຍາມຈະຂັບລົດທີ່ບັນຈຸລະເບີດເຕັມຄັນຜ່ານປ້ອມກວດຄວາມປອດ ໄພຂອງໂຊມາເລຍ ແລະຕໍ່ມາໄດ້ບີບຄະນວນລະເບີດໃຫ້ແຕກຂຶ້ນເຮັດໃຫ້ມີຜູ້ເສຍຊີວິດ ແລະໄດ້ຮັບບາດເຈັບ.
ຫຼັງຈາກນັ້ນຕໍ່ມາ ບໍ່ເທົ່າໃດວິນາທີ ລົດອີກຄັນໜຶ່ງ ກໍໄດ້ເດີນທາງໄປຮອດ ແລະເທື່ອນີ້ຜູ້ໂຈມຕີດ້ວຍລະເບີດສະຫຼະຊີບ ໄດ້ບີບຄະນວນລະເບີດ ທີ່ຫ້າງໃສ່ລົດຢູ່ໃກ້ໆ ກັບກຳລັງ ຮັກສາຄວາມປອດໄພ ແລະກອງກຳລັງສະຫະພາບອາຟຣິກາທີ່ຢູ່ໃກ້ຄຽງກັນ.
ແຫຼ່ງຂ່າວດ້ານຄວາມປອດໄພ ໄດ້ກ່າວຕໍ່ວີໂອເອວ່າ ເຈົ້າໜ້າທີ່ຮັກສາຄວາມປອດໄພເອ ກະຊົນ ທີ່ຮັບຜິດຊອບໃນການປົກປ້ອງເຈົ້າໜ້າທີ່ສະຫະປະຊາຊາດຢູ່ນອກຄ້າຍຂອງສະ ຫະພາບອາຟຣິກາ ກໍໄດ້ຢູ່ທີ່ດ່ານກວດໃນເວລາທີ່ມີການໂຈມຕີນັ້ນ.
ຍັງບໍ່ທັນເປັນທີ່ຮູ້ກັນເທື່ອວ່າ ມີເຈົ້າໜ້າທີ່ສະຫະປະຊາຊາດຄົນໃດ ກຳລັງກຽມເດີນທາງ ອອກຈາກສະໜາມບິນໃນເວລາທີ່ການໂຈມຕີໄດ້ເກີດຂຶ້ນ. ເຈົ້າໜ້າທີ່ຮັກສາຄວາມປອດ ໄພເອກະຊົນ ໄດ້ຄຸ້ມກັນບັນດາເຈົ້າໜ້າທີ່ສະຫະປະຊາຊາດແລະຍານພາຫະນະຕ່າງໆ ອອກໄປຈາກເຂດອ້ອມແອ້ມສະໜາມບິນ.
ແຫຼ່ງຂ່າວຮັກສາຄວາມປອດໄພ ແຈ້ງວ່າ ພວກໂຈມຕີບໍ່ໄດ້ລ່ວງລ້ຳເຂົ້າໄປ ໃນບໍລິເວນ ສະໜາມບິນ ຊຶ່ງບາງສ່ວນເປັນທີ່ຕັ້ງ ຂອງສຳນັກງານໃຫຍ່ສະຫະພາບອາຟຣິກາ ພ້ອມ ກັບສະຖານທູດຂອງປະເທດຕ່າງໆ.