ມີການໂຈມຕີສະຫຼະຊີບຕໍ່ບ່ອນກໍ່ສ້າງທີ່ບໍລິຫານງານໂດຍອີຣ່ານທີ່ເມືອງ Dibis ໃນພາກເໜືອ ຂອງປະເທດອີຣັກ ໃນວັນສຸກມື້ນີ້ ທີ່ໄດ້ສັງຫານຢ່າງໜ້ອຍ 11 ຄົນ ໃນຂະນະທີ່ຕຳ ຫຼວດອີຣັກ 6 ຄົນ ແລະພວກນັກລົບຂອງກຸ່ມລັດອິສລາມ 12 ຄົນໄດ້ຖືກຂ້າຕາຍ ໃນການໂຈມຕີທີ່ຄ້າຍຄືກັນ ກ່ອນໜ້ານີ້ ຕໍ່ກອງບັນຊາການຕຳຫຼວດ ແລະສະຖານທີ່ແຫ່ງອື່ນໆໃນເມືອງ Kirkuk.
ໃນລະຫວ່າງການໂຈມຕີກອງບັນຊາການຕຳຫຼວດນັ້ນໄດ້ຍິນສຽງລະເບີດຫຼາຍໆລູກແຕກຂຶ້ນຢູ່ທີ່ນັ້ນ ແລະສຽງປືນຍິງຕໍ່ສູ້ກັນດັງຂຶ້ນບໍ່ດົນຕໍ່ມາ. ຮູບຈາກລາຍງານຂ່າວໂທລະພາບທ້ອງຖິ່ນສະແດງໃຫ້ເຫັນວ່າມີຄວັນສີດຳກຸ້ມຂຶ້ນ ໃນບໍລິເວນໂຮງການແລະໄດ້ຍິນສຽງປືນກົນດັງຢູ່ທາງເບື້ອງຫລັງ.
ມີນັກລົບຂອງກຸ່ມລັດອິສລາມຢ່າງໜ້ອຍ 5 ຄົນໂຈມຕີດ້ວຍລະເບີດສະຫຼະຊີບຕໍ່ກອງບັນ ຊາການຕຳຫຼວດ. ນຶ່ງໃນນັ້ນ ໄດ້ຖືກຍິງຕາຍ ໂດຍຕຳຫຼວດ ກ່ອນທີ່ຜູ້ກ່ຽວຈະສາມາດບີບຄະນວນລະເບີດທີ່ບັນຈຸຢູ່ໃນເສື້ອຄຸມໃຫ້ແຕກຂຶ້ນໄດ້.
ກຸ່ມລັດອິສລາມໄດ້ອ້າງເອົາຄວາມຮັບຜິດຊອບໃນທັນທີກ່ຽວກັບການໂຈມຕີດັ່ງກ່າວ.
ມີການອ້າງຄຳເວົ້າເຈົ້າແຂວງໆ Kirkuk ທ່ານ Najmadin Karim ໂດຍສະຖານີໂທລະ ພາບ Rudaw ຂອງຊາວເຄີດທີ່ກ່າວວ່າ ພວກຫົວຮຸນແຮງບໍ່ໄດ້ຍຶດເອົາຕຶກໂຮງການລັດ ຖະບານໃດໆໃນເມືອງ Kirkuk ແຕ່ພວກນັກລົບ 2 ຄົນ ຂອງກຸ່ມດັ່ງກ່າວໄດ້ເຂົ້າຍຶດເອົາໂຮງແຮມແຫ່ງນຶ່ງ. ການປະທະກັນ ຢ່າງກະຈັດກະຈາຍ ຍັງດຳເນີນຢູ່ຕໍ່ມາ ໃນບາງເຂດຂອງເມືອງ Kirkuk.
ຫລາຍໆຊົ່ວໂມງຫລັງຈາກທີ່ໄດ້ມີການໂຈມຕີຕໍ່ກອງບັນຊາການຕຳຫຼວດແລ້ວ ຜູ້ໂຈມຕີສະຫຼະຊີບ 3 ຄົນ ກໍໄດ້ບຸກເຂົ້າໄປໃນບໍລິເວນໂຮງໄຟຟ້າແຫ່ງນຶ່ງທີ່ພວມມີການກໍ່ສ້າງຢູ່ອ້ອມແອ້ມ Kirkuk ຄືທີ່ເມືອງ Dibis ແລະໄດ້ບີບຄະນວນລະເບີດ ໃຫ້ແຕກຂຶ້ນ ເຮັດໃຫ້ຢ່າງໜ້ອຍ 11 ຄົນເສຍຊີວິດ.
ຍັງບໍ່ທັນມີກຸ່ມໃດອ້າງເອົາຄວາມຮັບຜິດຊອບກ່ຽວກັບການໂຈມຕີດັ່ງກ່າວນີ້ເທື່ອ.