ບັນດາເຈົ້າໜ້າທີ່ຮັກສາຄວາມປອດໄພອີຣັກ ກ່າວວ່າ ພວກກໍ່ການຮ້າຍລັດອິສລາມ ໄດ້ສັງຫານຢ່າງໜ້ອຍ 35 ຄົນ ແລະໄດ້ຮັບບາດເຈັບອີກຈຳນວນນຶ່ງໃນຕອນແລງວັນພະຫັດວານນີ້ ໃນການໂຈມຕີວັດ Shi’ite ຢູ່ທາງພາກເໜືອ ນະຄອນຫຼວງ Bagdad.
ການໂຈມຕີຢູ່ທີ່ວັດ Sayyid Mohammed ຮວມທັງຜູ້ວາງລະເບີດສະຫລະຊີບຫລາຍຄົນ ການໃຊ້ປືນ ແລະຍິງປືນຄົກ ແລະມີຂຶ້ນບໍ່ເທົ່າໃດມື້ຫລັງຈາກຫລາຍຮ້ອຍຄົນໄດ້ເສຍຊີວິດແລະໄດ້ຮັບບາດເຈັບ ໃນການໂຈມຕີຢູ່ສູນກາງການຄ້າທີ່ມີຄົນໜາແໜ້ນຢູ ນະຄອນ Bagdad ຊຶ່ງເປັນການວາງລະເບີດທີ່ຮ້າຍແຮງສຸດໃນປະຫວັດສາດຂອງອີຣັກ.
ການໂຈມຕີວັດຢູ່ໃນເມືອງ Balad 75 ກິໂລແມັດທາງພາກເໜືອຂອງ Bagdad ໄດ້ເລີ້ມຂຶ້ນໂດຍການຍິງປືນຄົກ ກ່ອນພວກຫົວຮຸນແຮງລັດອິສລາມສາມຄົນໄດ້ໄປເຖິງ ແລະເລີ້ມເປີດສາກຍິງປືນເຂົ້າໃສ່ຜູ້ຄົນຢູ່ທາງໃນ.
ຕໍ່ມາຜູ້ໂຈມຕີສອງຄົນໄດ້ບີບຄະນວນລະເບີດໃຫ້ແຕກຂຶ້ນ ຢູ່່ທີ່ຕະຫລາດໃກ້ກັບວັດ. ຜູ້ວາງລະເບີດອີກຄົນນຶ່ງ ໄດ້ພະຍາຍາມທີ່ຈະລະເບີດຕົນເອງ ແຕ່ໄດ້ຖືກສັງຫານກ່ອນທີ່ລາວຈະມີໂອກາດ ອີງຕາມພວກເຈົ້າໜ້າທີ່ຕຳຫລວດ.
ຢູ່ໃນບ່ອນອື່ນໆນັ້ນ ນາຍົກລັດຖະມົນຕີອີຣັກ ທ່ານ Haider al-Abadi ໄດ້ປົດຫົວໜ້າຮັກສາຄວາມປອດໄພໃນນະຄອນຫຼວງ Bagdad ແລະບັນດາເຈົ້າໜ້າທີ່ຮັກສາຄວາມປອດໄພຄົນອຶ່ນໆອອກຈາກໜ້າທີ່ ຫລັງຈາກໄດ້ມີການວາງລະເບີດສະຫລະຊີບຄັ້ງໃຫຍ່ທີ່ນະຄອນຫລວງອີຣັກ.
