ປະທານາທິບໍດີປະເທດຊູດານ ແລະຊູດານໃຕ້ ໄດ້ພົບປະກັນທີ່ນະຄອນຫຼວງ Addis Ababa ປະເທດອີທິໂອເປຍ ແລະທັງສອງຜູ້ນໍາໄດ້ໃຫ້ຄໍາໝັ້ນສັນຍາວ່າຈະເຈລະຈາຫາທາງແກ້ໄຂຄວາມເຫັນແຕກຕ່າງກັນຢ່າງສັນຕິວິທີ.
ປະທານາທິບໍດີ Oma al-Bashir ຂອງປະເທດຊູດານ ແລະປະທານາທິບໍດີ Salva Kiir ຂອງຊູດານໃຕ້ ໄດ້ພົບປະກັນເມື່ອວັນເສົາວານນີ້ ຢູ່ນອກກອງປະຊຸມສຸດຍອດບັ້ນນຶ່ງຂອງສະຫະພາບອາຟຣິກາ ຫຼືເອຢູ. ຊຶ່ງ ນັບວ່າເປັນການພົບປະກັນເທື່ອທໍາອິດ ຂອງທັງສອງຜູ້ນໍາ ນັບຕັ້ງແຕ່ປະເທດຂອງພວກທ່ານ ເກືອບເກີດສົງຄາມກັນ ໃນເດືອນເມສາຜ່ານມາກ່ຽວກັບຂໍ້ຂັດແຍ້ງເລຶ່ອງລາຍໄດ້ຂາຍນໍ້າມັນ ເລຶ່ອງເຂດຊາຍແດນ ແລະບັນຫາ ຄວາມໝັ້ນຄົງອື່ນໆ.
ຫຼັງຈາກເກີດຂໍ້ຂັດແຍ້ງກັນມາໄດ້ຫຼາຍປີ ລະຫວ່າງຊາວມຸສລິມຊຶ່ງເປັນຊົນກຸ່ມໃຫຍ່ໃນພາກເໜືອຂອງປະເທດ ແລະຊາວຄຣີສຕຽນຊຶ່ງເປັນຊົນກຸ່ມໃຫຍ່ໃນພາກໃຕ້ນັ້ນ ສັນຍາສັນຕິພາບປີ 2005 ແມ່ນໄດ້ແຜ້ວທາງໄປສູ່ການເປັນເອກກະລາດຂອງຊູດານໃຕ້ ໃນປີ 2011.
ທັງສອງປະເທດປະເຊີນກັບການຖືກລົງໂທດຈາກສະພາຄວາມໝັ້ນຄົງອົງ ການສະຫະປະຊາຊາດ ເວັ້ນເສຍແຕ່ວ່າທັງສອງປະເທດຈະທໍາການແກ້ໄຂບັນຫາຂັດແຍ້ງກ່ຽວກັບເງິນລາຍໄດ້ຈາກການຂາຍນໍ້າມັນແລະການປັກຫຼັກໝາຍເຂດຊາຍແດນໃຫ້ທັນຕາມກຳນົດເສັ້ນຕາຍ ໃນວັນທີ 2 ສິງຫາເດືອນໜ້ານີ້.